Read Kesikpɛkpɛ 27

Kesikpɛkpɛ27

Yakɔb Ayɛkɛ Isak yɛ Tiyuyulà

¹Kibeɛ gɛ Isak eshè pɛ yɛanhũɔ̃ ezĩ pɛ atɛka mɔ̃ɔ, ekulu yɛeyianyɛ sheshèɛ Esawu pɛ etseɖe yɛasɛ, "Mɛeyianyɛ."
Adɛmɛ akɔɛ asɛ, "Mɛ naalɛ."

²Isak etseɖe yɛasɛ, "Otsialɛ idzì anɔ sheshè kɛlɛ itinyi kiwui nɔnɔ gɛ ɛbatsí.³Otsiɛ nɛ kibè ɛlɛ mɛɛ, lɔkɔ wɔ keyuta bɔdɔ̃ɔ-wɔ bɔnyɔ̃ nɛ̀ wɔ bɔnyɔ̃ ɔkpɛtɛ̀-tɛ ɔvɛ ayakpa mɛ tɛ ɔdɛtá ayakpa mɛ bagã teli ɔmanà mɛ.⁴Tɔ kɛŋaŋã dzyɛdzyɛ̃ nɔnɔ ɛbui gɛ ɛdɛmɛ́, tɛ ɔlɔkɔ ɔmana mɛ tɛ mɛŋã, sɛ tɛ ɛlɔkɔ mɛ tiyuyula kɔ wɔ flogo tɛ ɛbatsí."

⁵Kibe ɛlɛ mɛ Rebeka azã taatɔ̃ gɛ Isak azaɖɔ kibuiɛ etseɖe yɛeyianyɛ Esawu. Kibeɛ gɛ Esawu ashɛ avɛ ayakpa mɛ tɛ adɛ ta bagãa tɛ alɔkɔ amanaa,⁶Rebeka etseɖe yɛeyianyɛ Yakɔb asɛ, "Ɖi, ilũ gɛ wɔaka etseɖe wɔadzya Esawu asɛ,⁷'Mana mɛ ayakpa mɛ baagã teli tɛ ɔbɔtɔ kɛŋaŋã dzyɛdzyɛ̃ teli akɔ mɛ tɛ mɛŋã, sɛ tɛ ɛbalɔkɔ mɛ tiyuyula kɔwɔ nɛ Apaleteɛ namɛ flogo tɛ ɛba tsí.'⁸Otsiɛ nɔ mɛeyianyɛ, taatɔ̃ piapi tɛ ɔbhɛtɛ kibui nɔnɔ gɛ itseɖe wɔ:⁹Vɛ baagã bɔkã mɛ tɛ obu beepigya taabha manà mɛ, sɛ tɛ ɛlɔkɔ tɔ kɛŋaŋã dzyɛdzyɛ̃ teli akɔ wɔaka, nɛ kana gɛ apɛ nulũ.¹⁰Tɛ ɔlɔkɔ ɔvɛnɔ wɔaka yɛaŋã, sɛ tɛ alɔkɔ yɛ tiyuyulà akɔ wɔ flogo tɛ ebetsí."

¹¹Yakɔb etseɖe yɛelĩ Rebeka asɛ, "Pɔ mɛadzya Esawu enu anyɛ gɛ tɛkã lɛ yɛishupiɛ, kɛlɛ mɛpɔ anyɛ gɛ yɛishupi dzi kplɔkplɔ mɛinu.¹²Kɛbaɛlɛ mɛ ɔsɛ mɛaka ehunũ mɛ xɔɔ? Aba mɔ mɛ asɛ ɛbhɛtɛ bɔshɛ mɛ ibui gɛ ɛba mana kibuiɖɔkpɛ anɔ nɛ mɛabha ɔdɛ tiyuyula."

¹³Yɛelĩɛ etseɖe yɛasɛ, "Mɛeyianyɛ, kɔ tɛ kibuiɖɔkpɛ anɔ alɛ ba mɛabha. Wɔ xɔnɔ bhɛtɛ kɛgɛ ɛɖɔɔ, vɔ ɔdɛ mana mɛ baagã."

¹⁴Kliso avɛ ediyi baagã amanà yɛelĩɛ, kɛlɛ atɔ bɔdɔ̃ dzyɛdzyɛ̃, asɛ gɛ yɛaka apɛ ana.¹⁵Kidegbaa, Rebeka adɛ lɔkɔ Esawu gɛenu yɛeyianyɛ kusiɛ yɛakpɛkpɛ gbangbã adɛ gɛ alɛ yɛahɔɛ nɛ bɔpãa mɛ, kɛlɛ alɔkɔ akpɛ akɔ yɛeyianyɛ eyideɛ Yakɔb.¹⁶Aza lɔkɔ epigyapi adã yɛhɔɛ nɛ̀ oli ɔkɔ gɛodzi kplɔkplɔ tsyɛ.¹⁷Kɛlɛ mɛ yɛalɔkɔ bɔŋaŋã dzyɛdzyɛ̃ gɛ atɔɔ nɛ̀ abolo nɔ gɛ abhɛtɛ akpɛ ahɔɛ akɔ yɛeyianyɛ Yakɔb.

¹⁸Avɛ yɛaka kɔ pɛ aɖɔ asɛ, "Mɛaka."
Adɛmɛ asɛ, "Ee yɛeyianyɛ, afa naalɛ̀?"

¹⁹Yakɔb etseɖe yɛaka asɛ, "Mɛinu Esawu wɔ eyianyɛ kusiɛ. Ɛbhɛtɛ asɛ kana gɛ otseɖe mɛ. Ɛkɔ wɔɛtakpu, lɔzã kitití tɛ ɔtã mɛ ayakpɛ mɛ kɛdzya tili sɛ tɛ ɔkɔ mɛ wɔ tiyuyulaa."

²⁰Isak ebisi yeyianyɛ asɛ, "Kɛlɛ́ kɛzã pɛ ɔtɛ dɔmɔ agã odunũ ɔlɛ, mɛeyianyɛ?"
Ebuiliulũ asɛ, "Apaleteɛ, wɔ Owusoso Akaa yɛakɔ kibuidzo."

²¹Kɛlɛ Isak etseɖe Yakɔb asɛ, "Mɛeyianyɛ tso ɔplɛnɔ mɛ tɛ mɛihunũ wɔ, tɛ mɛiti ɔsɛ kɛgbã wonu mɛeyianyɛ Esawu pɛnɔsɛ sɛ gɛnɛ yɛ dza."

²²Yakɔb etso aplɛnɔ yɛaka Isak kɛlɛ ehunũ yɛ pɛ aɖɔ asɛ, "Oliɛ mɛ oyì Yakɔb ɔyɛ, pɔ ɛhɔɛ xɔnɔ nu Esawu ɛyɛ."²³Agɛ mɔ anɔnɔ gɛ yɛenu, ɔmɔsɛ tɛkã zã yɛhɔɛ shu asɛ yɛadzya Esawu ɔyɛ ana; kliso eyulà akɔɛ.²⁴Ebisi asɛ, "Wɔonu mɛeyianyɛ Esawu kɛgbãa dza?"
Ebuiliulũ asɛ, "Yɛ mɛinu."

²⁵Kɛlɛ mɛ yɛaɖɔ asɛ, mɛeyianyɛ, manà mɛ kifutù mɛ ɛdzyaa teli mɛtã, tɛ ɛkɔwɔ mɛ tiyuyulàa."
Yakɔb alɔkɔ amanà yɛ yɛatã, kɛlɛ amana yɛ wain teli tsyɛ yɛawɔ̃ɛ.

²⁶Kɛlɛ mɛ yɛaka Isak etseɖe yɛasɛ, "Mɛeyianyɛ, ba ɛkɛlɛ tɛ ɔkpɛ ahɔɛ nɛ mɛoli."

²⁷Kliso avɛ yɛɔbha adɛkpɛ ahɔɛ nɛ yɛoliɛ. Gɛ Isak alɔkɔ yɛakpɛkpɛ yɛufifiɛ, eyulà akɔɛ pɛ aɖɔ asɛ,"Aa, mɛeyianyɛ nufifìɛdzi asɛ tɛlɔlɔ̃ gɛlɛ bɔyàgɛ Apaleteɛ eyula.²⁸Tɛ Owusoso Akaa akɔ wɔ kititi adzidza dɔdɔnɛ̀ kesiakpa ehoeyi bɔdɔ̃ mɔmɔ̃-tɛ wɔ bɔdɔ̃ eyuyuɔ ekpe atɔɖɔ nɛ̀ wain vɔvɔ.²⁹Tɛ amadiɛ edzi axɔɛdɛ akɔwɔtɛ banɔ akpɛ kɛtakpuesi akɔ wɔ.Ŋã Bɔpalete nɛ wɔadzya alɛ nabha,tɛ̀ wɔelĩ yɛeyianyɛ akpɛ kɛtakpuesi akɔ wɔ.Tɛ baɖɔ kibui akpɛ banɔnɔ gɛ baaɖɔ kibui akpɛ wɔɔtɛ beyulà akɔ bagɛ beyulà akɔ wɔɔ."

³⁰Gɛ Isak eyulà akɔɛ ebeke pɛ Yakɔb egitsyina kede beke nɛ yɛaka bhaa kɔo, yɛadzya Esawu tsyɛ ede baagã oyikɔ aba.³¹Yɛtsyɛ adɛ tɔ bɔdɔ̃ dzyɛdzyɛ̃ teli kɛlɛ alɔkɔ ɔlɛ amanà yɛakaa. Kɛlɛ mɛ yɛetseɖe yɛasɛ, "Mɛaka, lɔzã kitití tɛ ɔtã mɛ kifutù mɛ bɔdzyaa teli, sɛ tɛ ɔkɔ mɛ wɔ tiyuyulàa."

³²Yɛaka Isak ebisi yɛasɛ, "Wɔonu afana?"
Ebuiliulũ akɔɛ asɛ, "Mɛinu wɔeyianyɛ ekusi Esawu."

³³Isak eshuku gbagba pɛ aɖɔ asɛ, "Afa naalɛ gɛ ediyi kifutu mɛ baagã pɛ amana mɛ dza? Ɛtã beke yete pɛ oboku alɛ, kɛlɛ itiyulà kɔɛ-kɛlɛ bebe yulà akɔɛ kɛgbã tsyɛ!"

³⁴Gɛ Esawuɔ elũ ebuiɛ gɛ yɛaka aɖɔɔ, akpɛ ozĩ gagalĩ nɛ ɔmɔpɔɛ mɛ pɛ etseɖe yɛaka asɛ, "Yula kɔmɛ- mɛ tsyɛ mɛaka!"

³⁵Pɔ aɖɔ asɛ, "Wɔadzya atɛba ɔgana anɔ wɔɛwɔɛ mɛ pɛ ayɛkɛ wɔ tiyuyulà."

³⁶Esawu aɖɔ asɛ, "Gɛnɛ yɛ bekulù asɛ Yakɔb dza? Yɛawɔɛ mɛ bɔwɔɛ tɛbha ɛlɛ: Ayɛkɛ mɛ osheshe kɔɔ, kɛlɛ otsiɛ aza yɛkɛ mɛ tiyuyula tsyɛ!" Kɛlɛ mɛ yɛebisi asɛ, "Ɔgɛ balɛ tiyuyula nanà teli olu kɔ mɛ xɔnɔ dza?"

³⁷Isak ebuiliulũ asɛ, "Ɛtɛ bhɛtɛ yɛ apalete nɛ wɔabha kɛlɛ ɛtɛ bhɛtɛ yɛeshopo alɛ petee sɛ badɛxɔɛ akɔɛ, kɛlɛ ɛtɛ kɔ sɛtɛ yɛ bɔdɔeyi nɛ̀ wain vɔvɔ apɛ̃ akɔɛ. Kliso kiɖe mɛzɛ babhɛtɛ kɔwɔ otsiɛ, mɛeyianyɛ?"

³⁸Esawu ebisi yɛaka asɛ, "Mɛaka, tiyuyulà tinikpo yete tɛlɛ lɛ wɔahɔɛ dza? Yula kɔ mɛ tsyɛ, mɛaka!" Kibe ɛlɛ mɛ Esawu ebieyo nɛ̀ ozĩ.

³⁹Yɛaka Isak ebuiliulũ akɔɛ asɛ,"Wɔ ɔzãkɔlobo yide nɛ kesiakpa ehoeyi bɔdɔ̃ mɔmɔ shu,lobo yide nɛ kititi adzidza dɔdɔ shu⁴⁰Bɛtɛ wɔbɔ lɔkɔ zã wɔ ɛkpã nɔkɛlɛ ɔbɔdɛ axɔɛ akɔ wɔadza.pɔ onupɛ ooshè nɛ bɔtɔ ɔlɛ mɛɛ,obo bu yɛ kakɔɔnɛ wɔ oliɛ shu."

Yakɔb Ebu Tɛtsɛɖɛ Mɛ Avɛ Laban Ɔkɔ

⁴¹Esawu adɛ kpɛ ebelà nɛ̀ yɛadza nɛ tiyuyulà gɛ yɛaka alɔkɔ akɔɛ shu. Etseɖe yɛishu asɛ, "Ewuiɛ gɛ bɔbabi yoyo nɛ mɛaka kɛtakpuɔ tsoo ba, kibe ɛlɛ mɛ ɛbayi mɛadzya Yakɔb."

⁴²Gɛ bedi tseɖe Rebeka kibuiɛ gɛ yɛeyianyɛ kusiɛ Esawu aɖɔɔ, akpɛ anɔ nɛ yɛeyianyɛ degbaa Yakɔb ɔkɔ pɛ etseɖe yɛasɛ, "Wɔadza Esawu apɛ asɛ tɛ eyi wɔ tɛ alɔkɔ ayɔ ɔmɔpɔɛ nulũ nɔ.⁴³Otsiɛ nɛ kibe ɛlɛ mɛ mɛeyianyɛ, bhɛtɛ kibui nɔnɔ gɛ itseɖe wɔ: Bu tɛtsɛɖɛ mɛ tsiɔ̃ ɔvɛ mɛadza Laban yɛɔkɔ nɛ Xaran.⁴⁴Zã yɛɔbhà kibè bɔbhlui ɔvɛnɔ sɛ wɔadzya yɛ ɔmɔpɔɛ nɔ ulũ yɔ.⁴⁵Onupɛ ɔmɔpɔɛ obele wɔadza mɛ nɛ wɔshuɔ pɛ adzɛkɛ kɛgɛ ɔbhɛtɛ nɛ yɛishuɔ, tsyɛ ɛba sɛsɛ wɔ ɔklasɔ̃ tɛ otsyina odenɔ ɛkɛlɛ ɔba. Kiɖe shu sopɛ wɔnɔ taabha obotsi kɔmɛ nɛ kiwui tinikpo abha?"

⁴⁶Kɛlɛ mɛ Rebeka etseɖe Isak asɛ, "Ɛtɔ̀ nɛ ɛkpã zazã shu nɛ Xitia adzɛ alɛ so. Onupɛ Yakɔb agbana adzɛ nɛ badzɛ alɛ nɛ kesiakpa alɛ nabha mɛɛ, odenɔ Xitianɛ adzɛɛ gɛedzi anaa mɛɛ, kedzi azaazã mɛkpã zazã shu."

The Seed Company

https://app.library.bible/content/8106f4bd10cb55b6