Nɔɔneŋ109
Ŋolo kaŋorokotee wose kekyaŋ man
1Me Wurubuarɛ ŋon mɛɛ lese n yele,naa kyaa yididi ya,2nawolo nyi akpanyanyaŋtena na akɛrɛɛtena,te wola be nɔɔse tee maŋ,be ta mo akɛrɛɛ laakemse kolosi tia maŋ,3Be ta mo kekɔla nɔɔwoya kilisi maŋ,bee yoo maŋ keŋ ma te yɛɛ wɔ kolo ya.4Lee maŋ kɛɛ gyae wɔ nɛ, baŋ na mo nombia bo gyakaa me dɔɔ,mɔna maŋ ne fane bo fa wɔ.5Bɛɛ mo dukum tɔ me deeli keyɛɛ kom,kekɔla tɔ ma kegyae kom.6Lese walaŋkum ŋolo kaa seŋ tia me kɔlare,yela ŋon waa kara ɔ nɔɔ nɛ kaa seŋ ɔ dunoluŋ dɔɔ.7Nyi be di ɔ nombia na, yela waa di fɔɔ,yela ɔ kefane ke bu e fɔɔ.8Ɔ weeya naa boo ya,walaŋ wɔle waa mo ɔ dekyae ŋgba siamante nɛ.9Ɔ bia baa bese yoyolobiisena ɔ wɛɛle ka bese lia alo.10Ɔ bia baa ta yeyɛɛ solee abɔɔ,baa gegi wɔ lee ba akpaŋalaŋ ŋan be yɛlɛɛ nɛ man.11Ɔ komte waa lɛo wa abɔɔ pou,ŋɔɔla baa kuu wa abɔɔ ŋan pou ɔ be yɛɛ tom nyiŋ nɛ.12Ŋolo naa yɛɛ deeli fa e,yaa waa wii ɔ bia yoyolobiisi baŋ waraŋase ya.13Ɔ duuluŋ man balaŋ baa munu,baa lese ba yela lee kalola kegyakaare keŋ gyae ke kɔŋ nɛ man.14Baa tɔɔse ɔ naanaɔ nombiakumɛɛ Degbeŋgyoo siaman,be na feefo ɔ naa nombia kumɛɛ ŋan ɔ be yɛɛ nɛ ya.15Be nombia kumɛɛ dee doo Degbeŋgyoo siaman kekpaakekpaa,na waa nyiŋ lese ba yela lee tɛɛle dɔɔ.16Nawolo nyi ɔ ta gyueŋ nyi waa yɛɛ deeli ya,mɔna ɔ naase ayematena na baŋ bɔɔ dana kolo ya,na baŋ nombia ne takaa wɔ be konɔɔ man nɛ diyem kelii yeŋ man.17Ɔ ne gyae balaŋ ke falaa,ŋe dɛɛ bese kɔŋ ɔ dɔɔ.Ɔ bɛɛ gyae kehiraa nombia ya,ke dee gyu lem lee ɔ gyaŋ.18Ɔ doona kefaala ŋgba kegba nɛ,ke ta gyoo ɔ wose man ŋgba loŋ nɛ,ke ta gyoo ɔ ŋɔɔ man ŋgba nuŋ nɛ.19Ke dɛɛ yɛɛ ŋgba kanyaŋ te ɔ moowɔ milii ɔ wose,ŋgba abɔsɔɔ te ɔ moowɔ kpaŋ kekpaakekpaa nɛ.20Kei dɛɛ yɛɛ Degbeŋgyoo kom ketɔ fa baŋ bɛɛ mo nombia gyakaa me dɔɔ,na baŋ bee kolosi ma wose man nombia kumɛɛ nɛ.21Mɔna nyaŋ Degbeŋgyoo Doŋ Pou Nyee,kyɔ maŋ lee n yele keŋ dɔɔ,lɛɛ maŋ lee n deeli na n kegyae keŋ taŋ ɔto ya dɔɔ.22Nawolo nyi me yɛɛ diyemte e, te mɔɔ dana kolo ya,te me konɔɔ te nyiŋ gyam.23Mɛɛ ŋaalaa ŋgba balinɔɔ wɔŋtaa nɛ,ba te gberaa maŋ leki ŋgba dekpataa nɛ.24Nɔɔ kebake dɔɔ ma doona ne seree,ma te nyɔe kaase ŋɔɔ.25Baŋ bɛɛ kɛrɛɛ me nɔɔse nɛ ne kulu maŋ,be naa maŋ na bee kpiisi ba nyeeya.26Degbeŋgyoo me Wurubuarɛ, kyɔ maŋ,lɛɛ maŋ lee n kegyae keŋ taŋ ɔto ya nɛ dɔɔ.27Degbeŋgyoo, yela baa gyeŋ nyi,n nyiŋmaa te n moowɔ yɛɛ ke.28Baa tale falaa, mɔna nyaŋ n ke hiraa,yela desɛŋ ke kyaŋ baŋ bee yoo maŋ nɛ,mɔna yela n tobaale kenyaŋee.29Desɛŋ dee wuu baŋ bɛɛ kɛrɛɛ me nɔɔse ŋgba mena keŋ bee wuu kanyaŋ nɛ,na desɛŋ ke milii wɔ ŋgba kegba wurikyim nɛ.30Maa mo me nɔɔ fa Degbeŋgyoo karaŋ nideli,maa lese ɔ yele balaŋ dikpii dinaa keŋ siaman.31Nawolo nyi ɔ seŋɛɛ diyemte dunoluŋ dɔɔ,nyi waa lɛɛ e lee baŋ bɔɔ bu e yeŋ fɔɔ nɛ nyiŋmaa man.The Seed Company