Nɔɔneŋ105
Wurubuarɛ na Ɔ balaŋ
1Ɛ lese Degbeŋgyoo yele, ɛ mo ɔ yele gyɔ dekpeŋkpeŋ,ɛ yela tɛɛlese ka gyeŋ kpene keŋ ɔ be yɛɛ.2Ɛ kpee nɔɔneŋ fa e, ɛ kpee nɔɔneŋ lese ɔ yele,ɛ kolosi lee gyakoloŋ nombia ŋan pou ɔ be yɛɛ nɛ.3Ɛ gate ɛ wose ɔ yele fereŋkyeŋ keŋ man,yela baŋ pou bɛɛ kɛo Degbeŋgyoo nɛ ke nyaŋee be konɔɔse man.4Ɛ kɛo Degbeŋgyoo na ɔ doŋ,ɛ kɛɛ ɔ siaman debaŋ kamasɛ.5Ɛ tɔɔse gyakoloŋ nombia ŋan ɔ be yɛɛ,ɔ gyakoloŋ nombia, na ɔ nombia kedi keŋ ɔ be dii,6ɛmɛɛ ɔ tewulɛɛ Aberaham duuluŋ man balaŋ,ɛmɛɛ Yakɔbe bia baŋ ɔ ba lese ŋon mo yɛɛ ɔ wui.7Ŋon yɛna Degbeŋgyoo de Wurubuarɛ,ɔ nombia kedi doo tɛɛle pou dɔɔ.8Ɔ ne tɔɔse ɔ nɔɔkebakesee kekpaakekpaa,keŋ ɔ be yakosee fa kalola kegyakaarese kakpoŋ nɛ,9nɔɔkebakesee keŋ ɛmɛɛ na Aberaham be bake nɛ,na ntam keŋ ɔ be kam fa Yisake nɛ.10Ɔ seŋawɔ ke dɔɔ fa Yakɔbe ŋgba kawola nɛ,fa Iserae ŋgba nɔɔkebakesee kekpaakekpaa nɛ.11<<Nyaŋ te maa mo Kaana tɛɛle fa,ŋgba dedii keŋ gyae ke yɛɛ n wui nɛ.>>12Debaŋ kenaŋ be ta boo ya,be yɛɛ kyomii nɛ te be yɛɛ ŋɔɔlawɔ botɔɔ,13be tɛɛwɔ yeyɛɛ lee tɛɛlese man gyu tɛɛlese man,lee gyooridedii daale man gyu wɔle man.14Ɔ te fa ŋolo gbɛɛ waa ŋere wɔ do ya,lee baŋ dɔɔ te ɔ kalawɔna gyooneŋ.15<<Ɛ naa tina ŋon mɔɔ tiu e nuŋ nɛ ya,>>ɛ naa yɛɛ me gbalara dukum daale ya.16Ɔ yelaa tanam yalawɔ tɛɛle keŋ dɔɔ,te ɔ wɔlɛɛ be weenɛɛ kenyiŋ gbɛɛneŋ pou.17Ɔ kpila walaŋ ŋolo kyaŋa wɔ gbɛɛ gyu botɔɔ,Yosɛfo ŋon bɔɔ yɔɔ e ŋgba gbeŋi nɛ.18Ba moo akyakaase do e gyamɛɛ ɔ nawɔɔ man,ba moo nyeela bibiini do e ɔ wɔŋe man,19kelii debaŋ keŋ nombii keŋ ɔ be yako nɛ kɔŋawɔ mena,kelii debaŋ keŋ Degbeŋgyoo nombia ŋan ɔ be yako kaalaŋ nɛ lesewɔ wola nyi ɔ nombia dei.20Gyoo ŋon kpilawɔ te be ka lese e,ŋon ɔ ne di balaŋ dɔɔ nɛ yelaa be tinaa e yela.21Ɔ moo e yɛɛ ɔ denimantena kegyia,na wa abɔɔ pou dɔɔ kɛɛre,22na waa wola ɔ kyaraabia keŋ ɔ ne gyae,na waa wola ɔ kegyiise nombia.23Keŋte Iserae gyoowɔ Igyipite,Yakɔbe kyaawɔ Ham tɛɛle man ŋgba ŋɔɔle nɛ.24Degbeŋgyoo yelaa ɔ balaŋ wukuwɔ,te ɔ yelaa ba boowɔ kela be kɔlara.25Ɔ kyɛɛkee be konɔɔse nyi baa kɔla ɔ balaŋ,te ba moo adao gbɛɛ tia ɔ tewulɛɛ.26Ɔ kpila ɔ tobaale Mosesi,na Aarɔn ŋon ɔ ba lese e nɛ.27Be yɛɛ ɔ gyakoloŋ nombia be man,na ɔ nombia dinaana Ham tɛɛle man.28Ɔ kpila detiŋtɛɛ te detiŋtɛɛ gyoo tɛɛle keŋ,nawolo nyi ba korowɔ seŋ tia ɔ nombia ŋan.29Ɔ yelaa ba loŋse bese fatabo,te yela be kpebia yekeewɔ.30Apɔtɔrɔse kaa lɛɛ be tɛɛle keŋ pou,yela ba gyoowɔ be gyooneŋ denɛɛ anedoŋ man.31Ɔ kolosiwɔ te kyɔɔse dikpii,na keraase kaa lɛɛ be tɛɛle keŋ pou dɔɔ.32Ɔ yela akpeleŋkpeleŋbia yalawɔ ɔga nawɔɔ man,te ɔga keŋmaale lɛɛ be tɛɛle keŋ pou dɔɔ.33Ɔ wɔlɛɛ be gerepo wɔɔse na fiigi daase,te ɔ tekerii be tɛɛle man daase.34Ɔ kolosiwɔ te akpataana leewɔ,akpataana baŋ ŋolo be tale kala wɔ ya,35be tao ŋalese laŋ nyiŋan pou tɛɛle keŋ dɔɔ,be tao weenɛɛ pou be tɛɛle keŋ dɔɔ.36Keŋte ɔ koe bia gyaŋgba nyibaŋ pou be tɛɛle keŋ dɔɔ,bia gyaŋgba nyibaŋ baŋ pou bɔɔ lee ba teŋa man.37Ɔ lese Iserae na ɔ dana kɔba wolom na kɔba yayam,ŋolo be kyaa ba dekpaŋalaŋ man keŋ ɔ na wee ya.38Yɛɛ Igyipitetena gyoŋ ŋgba bɔɔ lam nɛ,nawolo nyi na Iseraetena keyee doo be man.39Ɔ fɛlɛɛ ŋɔma wuu be dɔɔ,na boalaŋ keŋ ne fa wɔ keŋmaŋee nelim.40Be bɔɔsewɔ te ɔ faa wɔ kooliise,ɔ faa wɔ weenɛɛ lee adido be diiwɔ baa.41Ɔ bɛɛse kpanaŋ man te loŋ puuwɔ lee,ke laŋawɔ ŋgba boo nɛ depampaa keŋ man.42Nawolo nyi ɔ tɔɔse ɔ keyakosee fereŋkyeŋ keŋ,ɔ be yako fa ɔ tobaale Aberaham nɛ.43Ɔ lese ɔ balaŋ lee botɔɔ na bɛɛ nyaŋee,ɔ balaŋ baŋ ɔ ba lese nɛ moo kenyaŋee yeesa laŋ.44Ɔ moo tɛɛlese tɛɛle pou fa wɔ,te ba moo ŋan baale be kaa nyiŋ nɛ bese be dedii,45na baa nyiŋ di ɔ kawolase dɔɔ,na baa di wɔ mmaraase dɔɔ.Ɛ lese Degbeŋgyoo yele.The Seed Company