Nɔɔneŋ106
Wurubuarɛ deeli fa Ɔ balaŋ
1Ɛ lese Degbeŋgyoo yele,Ɛ fa Degbeŋgyoo karaŋ, nawolo nyi ɔ deiɔ kegyae kyaa kekpaakekpaa.2Amɔte ne gyaela waa tale yako nombia dinaana ŋan Degbeŋgyoo be yɛɛ,yaa waa tale kɛlɛɛ e nideli?3Balaŋ baŋ bee di nombia kegbɛɛ dɔɔ,te bɛɛ yɛɛ abɔɔ ŋan tenɛɛ debaŋ kamasɛ nɛ baŋna nyeebam.4Degbeŋgyoo, akpaa n boele n balaŋ na tɔɔse maŋ,akpaa n lɛɛ wɔ na kyɔ maŋ,5na maa nyiŋ ma wose ŋgba n balaŋ baŋ n ba lese nɛ,na maa di gyoŋ keŋ n tɛɛle kei dɔɔ balaŋ ne dii nɛ,na maa kpuna n balaŋ na dɛɛ lese n yele.6Da te yɛɛ dukum ŋgba mena keŋ de naanaɔ be yɛɛ nɛ,da te yɛɛ keŋ be dei ya, te de yɛɛ akpanyanyaŋ nombia.7De naanaɔ kekyaa Igyipite nɛ,be ta mo n gyakoloŋ nombia ŋan yɛɛ kolo ya,ba te tɔɔse n wɔe keŋ n be yɛɛ fa wɔ nɛ ya,te ba korowɔ seŋ tia neŋ Ɛpo Yayam keŋ nɔɔman.8Mɔna ɔ lɛɛ wɔ lee ɔ yele dɔɔ,na waa lese ɔ doŋ keŋ ka dokoso be kyaa ya nɛ wola.9Ɔ kalawɔna Ɛpo yayam keŋ, te ka yoowɔ,ɔ moo wɔ ta ke man lee ŋgba depampaa man nɛ.10Ɔ lɛɛ wɔ lee be kɔlara nyiŋmaa man,ɔ lɛɛ ba nyee lee be kɔlara nyiŋmaa man.11Loŋ keŋ wuuwɔ mo be kɔlara pou,be man dokoloŋ gba te nyiŋ nyeedoŋ ya.12Keŋte be lɛɛ ɔ keyakosee keŋ di,te be kpee nɔɔneŋ lese ɔ yele.13Mɔ te di weeya ya te be wolee wa ayɛŋ,keŋ ba te daa waa lese ɔ nyeeman nombii debɔɔ ya.14Weenɛɛ gyɔɔ wɔ loo nideli depampaa keŋ man,be kɛɛse Wurubuarɛ kɛɛ depampaa keŋ man.15Mena dɔɔ ɔ faa wɔ keŋ bɔɔ bɔɔse nɛ,mɔna ɔ yelaa kaweekum kaa gyɔɔ wɔ.16Be deyilae kyaa keŋ man nɛ be yoo Mosesi,na Aarɔn ŋon Degbeŋgyoo be gberaa e nɛ nuŋkurili.17Tɛɛle bɛɛwɔ te ke lila Datane,te ke wuu Abiram na ɔ balaŋ dɔɔ.18Boalaŋ mɔ kaa yalawɔ be balaŋ man,boalaŋ kpaa akpanyanyaŋtena baŋ.19Be yɛɛ nunkyuebu Horɛbe,te ba som bane ŋon bɔɔ mo nyeele yɛɛ e nɛ.20Ba yɛɛ nunkyuebu ŋon ɔ ne tao ŋale nɛ dinɔɔ,mo kyɛɛkeena be gyoorobiiri Wurubuarɛ ŋon.21Be wolee Wurubuarɛ ŋon ɔ be lɛɛ wɔ,ŋon ɔ be yɛɛ nombia dinaana Igyipite,22te ɔ be yɛɛ gyakoloŋ nombia Ham tɛɛle man,na nombia dinaana Ɛpo Yayam keŋ nɔɔman nɛ.23Mena dɔɔ ɔ yakowɔ nyi waa munu wɔ,mɔna Mosesi ŋon ɔ ba lese e nɛ,seŋawɔ Wurubuarɛ siaman sola fa wɔ,na ɔ baŋ nedoŋ be nyiŋ munu wɔ ya.24Keŋte be bɛɛ tɛɛle kpaakpaa keŋ,ba te lɛɛ ɔ keyakosee keŋ di ya.25Ba toroŋwɔ be kanyaŋ denɛɛ man,te be te nyii Degbeŋgyoo dei ya.26Mena dɔɔ ɔ gyinaa ɔ nyiŋmaa kaŋ ntam fa wɔ,nyi waa yela baa yekee depampaa keŋ man.27Waa yela ɔ duuluŋ man balaŋ ka yekee tɛɛlese man,na waa yaasee wɔ do tɛɛle keŋ man pou.28Ba moo ba wose ka do Peo Baal ɔsom man,te be dii weenɛɛ ŋan bee deesi fa bane ŋon ɔ be dana nyeedoŋ ya nɛ.29Ba moo ba akpanyanyaŋ nombia keyɛɛ do Degbeŋgyoo baŋ,te kaweekum kaa yala wɔ.30Mɔna Finihase korowɔ gyoo ke man pataa,te kaweekum keŋ taŋawɔ.31Kei yelaa ɔ nyiŋa yele nyi ɔ tenɛɛ Wurubuarɛ siaman,kelii kalola kegyakaarese dɔɔ kekpaakekpaa.32Ba doo Degbeŋgyoo baŋ Meriba boo nɔɔman,te Mosesi nyiŋa nombia lee baŋ dɔɔ.33Nawolo nyi ba korowɔ seŋ tia Wurubuarɛ feliŋ ŋon,te nɔɔwoya ŋan tekaboena ya leewɔ Mosesi nɔɔman.34Ba te wɔlɛɛ balaŋ baŋ,ŋgba mena keŋ Degbeŋgyoo be yako wɔ nɛ ya.35Mɔna ba moo ba wose dona wɔ,te be kasee ba abɔɔ ayɛɛsa.36Ba som be bɛɛneŋ,te ŋe kaa bese kɔta kyaŋ wɔ.37Ba moo be bia alebia,na be bia tewulɛɛ deesi fa bɛɛneŋ.38Be kyɛɛkee fatabo keŋ dukum be doo ke man ya nɛ leki,be bia alebia na be bia tewulɛɛ fatabo,ŋan bɔɔ mo deesi fa Kaana bɛɛneŋ nɛ,te fatabo keŋ walaa tɛɛle keŋ.39Be walaa ba wose, lee ba abɔɔ ayɛɛsa man,te be yɛɛ kafoŋ lee ba abɔɔ ayɛɛsa man.40Mena dɔɔ Degbeŋgyoo gyeŋa baŋ nideli do ɔ balaŋ,te ɔ kɔla ɔ dedii.41Ɔ moo wɔ do tɛɛlese nyiŋmaa man,te baŋ bɛɛ kɔla wɔ nɛ dii be dɔɔ.42Be kɔlara ŋere wɔ do,te be yɔkɔse wɔ do be doŋ tɛɛ.43Ɔ lɛɛ wɔ agbaatee agbaatee,mɔna be gyakaa bo bɛɛ yɛɛ deŋele doŋ,te be yɔkɔse ba wose ba dukum keyɛɛ man.44Mɔna ɔ naa be kayeyɛɛ,debaŋ keŋ ɔ be nyii be kewii nɛ.45Lee baŋ dɔɔ ɔ tɔɔse ɔ nɔɔkebakesee keŋ,te lee ɔ kegyae dinaa keŋ dɔɔ ɔ kyɛɛkee ɔ nyeempɔ.46Ɔ yelaa baŋ pou bɔɔ kyaŋ wɔ yoo gbeŋa nɛ,wii be waraŋase.47Degbeŋgyoo de Wurubuarɛ lɛɛ daa,na n ke yilaa daa lee tɛɛlese man,na dɛɛ mo karaŋ fa n yele fereŋkyeŋ keŋ,na dɛɛ nyaŋee lese n yele.48Ɛ lese Degbeŋgyoo, Iseraetena Wurubuarɛ ŋon yele,kekpaakekpaa.Ɛ yela balaŋ pou ke yako nyi, <<Dɛɛkɔŋ mena.>>Ɛ lese Degbeŋgyoo yele.The Seed Company