Nɔɔneŋ103
Wurubuarɛ kegyae keŋ
1Ma woo lese Degbeŋgyoo yele,ŋan pou doo me man nɛ, dɛɛ lese ɔ yele fereŋkyeŋ keŋ.2Ma woo lese Degbeŋgyoo yele,te naa wolee wa abɔɔ kpaakpaa ŋan pou ya,3Ŋon na moona n nombiakumɛɛ pou kyɛɛ neŋ,te ɔ ne kyɔ neŋ n kaweese pou.4Ŋon lɛɛna n nyee lee yebɔɔ man,ŋon moona kegyae na waraŋase kewii gyooro kotɔtɔɔ wuu neŋ.5Ɔ na mo abɔɔ kpaakpaa ŋan n ne gyae nɛ fa neŋ,na n tobiiritɛɛ kabese wɔle ŋgba otoloku wui nɛ.6Degbeŋgyoo ne di nombia ŋan tenɛɛ,te ɔ ne di nombia ke gbɛɛdɔɔ fa baŋ bɛɛ ŋere wɔ do nɛ.7Ɔ yelaa Mosesi gyeŋa ɔ gbɛɛneŋ,te Iseraetena naa wa abɔɔ ayɛɛsa.8Degbeŋgyoo ne wii balaŋ te ɔ na boele balaŋ,ɔ bɛɛ gyeŋ baŋ bileŋbileŋ ya, te ɔ kegyae mɔ boe.9Ɔ be gyae waa kalana balaŋ debaŋ kamasɛ,yaa waa mo baŋ do ɔ konɔɔ man kekpaakekpaa ya.10Ɔ bɛɛ yɛɛ daa ŋgba mena keŋ de dukum kaboena daa,yaa waa tɔ daa kom ŋgba mena keŋ de nombiakumɛɛ doo nɛ ya.11Nawolo nyi mena keŋ adido korɛɛ kela tɛɛle nɛ,mena mɔ te ɔ kegyae boe fa baŋ bee yee e nɛ.12Mena keŋ weese dɛɛlee dana lem lee weese dɛɛyalae nɛ,mena te ɔ yelaa de nombiakumɛɛ yɛɛ lem lee de gyaŋ.13Mena keŋ kya ne wii ɔ bia waraŋase nɛ,mena te Degbeŋgyoo ne wii baŋ bee yee e nɛ waraŋase.14Nawolo nyi ɔ gyeŋ da keyɛɛ man,ɔ ne tɔɔse nyi de yɛɛ akuŋkuŋ ke.15Deniwalaŋ nyeedoŋ yɛɛ ŋgba ŋale nɛ,ŋɛɛ lee ŋgba ŋale man kyeŋkyeŋkɔɔ nɛ,16Feliŋ de gyɔ ke na ka te lam,na ka dekyae ta yoo korakora.17Mɔna Degbeŋgyoo kegyae doo fa baŋ bee yee e nɛ kekpaakekpaa,te ɔ katenee doo fa be naana naanasebia,18doo fa baŋ bee di ɔ nɔɔkebakesee dɔɔ,te bɛɛ tɔɔse di wɔ mmaraase dɔɔ nɛ.19Degbeŋgyoo ta see ɔ gyoorogbeli mokɔɔ adido,te ɔ gyooridedii ne di abɔɔ pou dɔɔ.20Ɛmɛɛ Degbeŋgyoo kpilara, ɛ lese ɔ yele,ɛmɛɛ baalabia baŋ ɛ ne di ɔ nombia dɔɔ,te ɛ ne nyii ɔ dei.21Degbeŋgyoo yoonɔɔtena pou ɛ lese ɔ yele,ɛmɛɛ ɔ tewulɛɛ baŋ ɛ ne yɛɛ ɔ kegyaebii nɛ.22Ɛmɛɛ Degbeŋgyoo nyiŋmaa man tomse pou ɛ lese ɔ yele,yenaase ŋan pou ɔ ne di gyoori.Ma woo lese Degbeŋgyoo yele.The Seed Company