Nɔɔneŋ102
Ŋon ɔ ne kaa nɛ kefane
1Ao Degbeŋgyoo, tei ma kefane,yela me kewii baake kelii n gyaŋ.2Naa lese n sia yela maŋ,ma wose kekyaŋ man ya,tei maŋ,wee keŋ me baake neŋ na, kpa maŋ bileŋ.3Nawolo nyi ma weeya ne ŋaalaa ŋgba nyɔɔse nɛ,me ŋɔɔ te laŋe ŋgba kosɔ man nyewalaŋ nɛ.4Me konɔɔ te laŋe te ma botowɔ ŋgba ŋale nɛ,ma te wolee me weenɛɛ kedi gba.5Me kɛɛ keŋee keŋkeŋ dɔɔ,ma te kaa ŋɔɔŋɔɔ.6Me yɛɛ ŋgba depampaa man ɔpɛtɛɛ nɛ,ŋgba kpilim ŋon ɔ kyaa donɔɔ keŋ bɔɔ tu lee ke man nɛ.7Mɔɔ ne doo ya, ma te yɛɛŋgba gyebu ŋon ɔ kyaa deni nyee dɔɔ waageŋ nɛ.8Wee pou na me kɔlara na tee maŋ,baŋ bee kulu maŋ na mo ma yele faalaa.9Nawolo nyi mee di tɔŋ ŋgba me weenɛɛ nɛ,te mɛɛ mo siasaraŋ kyakale keŋ mɛɛ nyɔɔ nɛ man,10lee n baŋ nedoŋ keŋ dɔɔ,nawolo nyi n ta fokaa maŋ fuŋ lɔ yenaŋ.11Ma weeya yɛɛ ŋgba balinɔɔ wɔŋtaa nɛ,Me ta wolo ŋgba dugbututɛɛ ŋale nɛ.12Mɔna nyaŋ Degbeŋgyoo, n kyaa gyoorogbeli dɔɔ kekpaakekpaa,n yele doo kalola kegyakaarese pou man.13Nyaŋ ka koro na n ke wii Siyɔn waraŋase,nawolo nyi debaŋ te lii nyi nya wii e.debaŋ kenaŋ te lii.14Nawolo nyi ɔ boya na lee koya fa n tewulɛɛ,wa akuŋkuŋ ne yɛɛ wɔ waraŋase.15Tɛɛlese baa yee Degbeŋgyoo yele,tɛɛle dɔɔ gyooneŋ pou baa mo obuo fa n gyoorobiiri.16Nawolo nyi Degbeŋgyoo waa bese baŋ Siyɔn,na waa lese ɔ wose ɔ gyoorobiiri man.17Waa nyii ayematena kefane,ɔ be gyae waa bɛɛ be kasola ya.18Ɛ yela baa ŋmarase kei see kalola kegyakaare baŋ baa kɔŋ nɛ,nyi balaŋ baŋ be ta lolata wɔ ya nɛ baa lese Degbeŋgyoo yele.19<<Degbeŋgyoo kyaa ɔ dekyae fereŋkyeŋ keŋ man adido te ɔ tisinaa ɔ sia kɛɛ tɛɛle man,ɔ kyaa adido te ɔ kɛɛ tɛɛle keŋ,20na waa nyii balaŋ baŋ bɔɔ kyam tɔ deni nɛ katoroŋ,na waa yela baa tina baŋ bɔɔ bu wɔ yeŋ fɔɔ nɛ yela.>>21Na baa gyɔ Degbeŋgyoo yele dekpeŋkpeŋ Siyɔn,na baa lese ɔ yele Yerusalɛm,22debaŋ keŋ balaŋ na gyooridediise,de gyaŋee nyi baa som Degbeŋgyoo.23Me biatɛɛ te Degbeŋgyoo yɔkɔse me doŋ,ɔ te kɔɔkee ma weeya.24Mena dɔɔ me yakowɔ nyiaa,<<Ao me Wurubuarɛ, naa lese maŋ lee ma weeya nsana ya,n kulutooneŋ doo kalola kegyakaarese pou man.25Leenaŋ kewalaŋ te n see tɛɛle kei mokɔɔ,te adido mɔ yɛɛ n nyiŋmaa man tom ke.26Ŋe gyae ke wɔlɛɛ, mɔna nyaŋ kyaa,ŋe gyae ke lɔɔree ŋgba kanyaŋ nɛ.Nyaŋ ke kyɛɛkee ŋa ŋgba kanyaŋse nɛ,na ŋa te wɔlɛɛ.27Mɔna nyaŋ doo n kedoobii,te n kulutooneŋ be dana ɔto ya.28N tewulɛɛ baŋ bia baa baŋ lila n siaman,be duuluŋ man balaŋ baa kyaa gbeli n siaman.>>The Seed Company