2 करिन्थ5
1काहाके आपाआ यी धरतीपोर्योअ कोअ जिहींम आपू रोतेहे, ओं आरवात जाय, ताहां आथोवाअहीं बोणावल्यो कोअ नाहां, पोन सोताहा देवे बोणावल्यो हादाजल्म्योंअ कोअ आपुहूं होरगाम जोड़े, ओं आमुहूं मुंदू होये.2या कोअमेहें तोम आमू कांहताहा, आन आमाआं होरगामेर्योअ कोओहो पेवित लेअलोअ आमाआं जास्ती इश्शा होये.3आमू एहें कोइत पेवित लेहूं, ताहां उगड़ाअला ने सापड़ाअहूं जोवे.4काहाके आमू यी दुन्यादारीइ तंबामेहें रोता जात, वोजा वाअहीं दाबाइत कांहयां कोअताहा; काहाके आमाआं एं आंगड़े ने काडुहूं जोवे, पोन पेवुहूं जोवे, मोन्ज्ये जों आरवाअनारो होय, तों जिवनोमेहें बोदलात जाअहूं जोवे.5जिये आमुहूं यीज गोठीइ कोअते तियार कोअयाहा, तो देव होय, जिये आमुहूं बियानामेहें आत्मा बी आप्युहू.6ताहां आमू सादाज पुरी हिम्मत तोइत रोताहा, आन ओं जाईंत के, आमू जाअहूं जाआं दुन्यादारीइ तंबामेहें होय, ताअहूं जाआं प्रभु रोत सेटे होय.7काहाके आमू रुप देखीत नाहां, पोन विश्वासो वाअहीं सालताहा.8तियाहा काजे आमू धिर खेटीत रोताहा, आन शरीररुप कोअ सोड़ी देत प्रभुउरी होरगामेर्याआ कोअमेहें रोअलोअ जाअखो पसन कोअताहा.9काहाके आमू इंहीं रोंव नेत तिहीं रोंव, तेबी देवोहो गोमुहूं जोवे काजे मेहेंनत कोअताहा.10काहाके आपू हारेक जोओंहों, ख्रिस्ताआ न्यायगादीइ सामने उबो रोअहूं पोड़े; एताआ काजे के जें जें कामें दुन्यामेहें रोत कोइत कोअयेहे तियांआं बोदलू जोड़ुहूं जोवे. तें हाजे ओय नेत बाक्ते ओय.11देवोहो बित सालीइलोअ कि होय तों आमुहूं मुंदू होये; तिहीं वाअहीं आमू माअहुंहूं समजाड़ताहा, पोन देव आमुहूं ओलखेहे, आन माआं आशा होये के, तुमू बी आमुहूं वारुहूं ओलखीइतेहे.12आमू तुमाआं सामने सोताआ वोडाय नाहां कोअता, पोन तुमुहूं आमाआं बाप्तिम वोडाय कोइलोअ जागू आपताहा; काहाके जे मोनोम नाहां, पोन तियांआं उपर्याआ रुपोहो देखीत वोडाय कोअताहा, तियांआं काजे तुमापोअ कि तेबी उत्तर जोवे.13जर आमू गांडा बोण्या तेबी देवोअ वोतीइ; आन हुशार ओवा ताहां तुमाआं काजे होय.14काहाके ख्रिस्ताआ मेर आमापोअ राज कोअहे; तियाहा काजे आमू एहेलोहो मानताहा के, एक आखाआ वोतीइ मोयू ताहां आखे मोइत गोये.15आन तो एताआ काजे आखाआ वोतीइ मोयू के, जें जिवते रोय तें आगाड़ी रोत सोताआ काजे नाहां, पोन तियाआ काजे जिवा, जो तियांआं काजे मोइत गोयू आन फाशुउ जिवतु बी ओवू.16तियाहा काजे ओमें रोत आमू कोडाहा, मुखोअ दशा देखीत नाहां ओलखीइता; भले, आमू ख्रिस्ताहा तियाआ मुख देखीत ओलख्युतो, पोन तेबी ओमें रोत तियाहा आमू तेहें कोइत नाहां ओलखीइता.17तियाहा काजे जर एखू ख्रिस्तामेहें ओय, ताहां तों नोवो बोण्योहों; जुनी गोठी जाती रोयी; पाला, आखी गोठी नोवी ओत गोयीही.18ए आखी गोठी देवोप रोत ओवीही, तियेज ख्रिस्ता वाअहीं सोताअरी आपाआ होमजोण कोअयी आन बिहीराहा बी तियाअरी होमजोण कोइलोअ काम आपुहूं होप्योहो.19मोन्ज्ये देव दुन्याआ गुनाआं ईसाब दुन्यापोअ ने लेदू, पोन ख्रिस्ता वाअहीं तिये सोताअरी होमजोण कोअयी, आन तों होमजोण कोइलोअ काम आपुहूं होप्योहो.20तियाहा काजे, आमू ख्रिस्ताआ राजदुत होय; देव आमा वाअहीं तुमुहूं विनंती कोअत्लू जेहें होय. आमू ख्रिस्ताआ पक्शाम रोत तुमुहूं विनंती कोअताहा के, तुमू देवोअरी होमजोण काडीत ल्या.21जियाहा पाप कि होय तोज ने मुंदू ओतो, तियाहा तिये आपाआ वोतीइ पाप ठरव्यू, मोन्ज्ये आपू तियाम रोत कोइत देवोअरी धर्मीपणोअ भागिदार बोणुहूं जोवे.
The Word for the World International