2 करिन्थ4

1आमापोअ देवोअ दया ओवीही, तियाहा काजे ए सेवा आमुहूं होपाअयीही, तिहींवाअहीं आमू हिम्मत नाहां सोड़ता.2पोन आमू लाज आवे एहेलेहे गुप्त्ये कामे सोड़ी देदेहे, आमू लबाड़ी नाहां कोअता, आन देवोअ वसनोअ गलत परसार नाहां कोअता; पोन देवोअ सामने सत्य उगाड़ीत देखाड़ताहा, आन आखा माअहुंहूं हाजी ओकल देखाड़ताहा.3पोन जर आमाआं हाजी बातमीपोअ पोड़दू टापाइत होय, ताहां तो तियां आरवाअनाराआं कोअतेज टापाइत होय.4ख्रिस्त जो देवोअ रुपोमेहें होय, तियाआ उजालावाली हाजी बातमीइं उजालो तियांपोअ ने पोड़ुहूं जोवे कोत जें विश्वास नाहां कोअते, तियांआं बुद्धीही यी दुन्याआ देवों आंद्ली कोइ देदीही.5काहाके आमू सोताआ परसार नाहां कोअता, पोन ईसु ख्रिस्ताआ परसार कोअताहा के तो मालिख होय; आन आमू ईसु ख्रिस्ताआ वाखरी तुमाआं सेवक होय कोत समजीइताहा.6काहाके जिये देवे कोयो, “आंदारामेहें उजालो समकुहूं जोवे!” तियेज देवे ईसु ख्रिस्ताआ सेहरापोअ समकेहे तों देवोअ महिमाआ ज्ञानोअ उजालो आपाआ मोनोपोअ पाड़्यो.
7पोन आपापोअ ओं धन कादवोअ बासनोमेहें मिक्योहो, मोन्ज्ये याआ अर्थ ओं होय के, ए वोडाम वोडी सेक्ती आपाअहें रोत नाहां, पोन देवोअहेंज रोत होये ओं खुल्लो होय.8आमू शारी वोलेहे रोत अड़सनेमेहें पोड़ताहा, पोन तेबी नाहां दाबाअता; आमू पुलवात होय, पोन नाराज नाहां ओवता;9आमुहूं तारास देनारे जाअखीलेहे होय, पोन तेबी आमू ओड़ीत नाहां काडाअता; आमू निसे ताहराआ पोड़ल्या होय, पोन तेबी नाहां आरवाअया.10ईसुउ जिवन आमामेहें देखाअहूं जोवे कोत आमू कायम ईसुउ मोत आमाआं डिलोमेहें लेत फिरताहा.11काहाके आमू जिवता जिव ईसुउ वाखरी कायम मोतोअ आथोम होपाअताहा, मोन्ज्ये ईसुउ जिवन बी आमाआं आरवाअनारा डिलोमेहें देखाअहूं जोवे.12एहें कोइत मोत आमाम काम कोअहे, पोन जिवन तुमाम काम कोअहे.
13देवोअ वसन कोहे, “आंय विश्वास कोअयू, तियाहा काजे आंय गोग्यू.” तियाज आत्माआं विश्वास होय, तिहीं वाअहीं आमू बी विश्वास कोअताहा तियाहा काजे गोगताहा.14काहाके आमुहूं ओ मुंदू होय के, जिये प्रभु ईसुहू जिवाड़्यू, तोज आमुहूं बी ईसुमेहें भागीदार जाईंत कोइत जिवाड़े, आन आमुहूं बी तुमाअरी तियाआ सामने हजर कोए.15आखी गोठी तुमाआं कोअतेज होय, एताआ काजे के, मेरवानी वादार जोओं वाअहीं वोदीत कोइत देवोअ महिमाआ काजे धन्यवाद बी वोदुहूं जोवे.
16तियाहाज काजे आमू हिम्मत नाहां सोड़ता; आमाआं बारथेए डिल आरवाअतो जाहे, तेबी आमाआं मांयतेए सोभाव दाड़ख्युउ नोवू बोणतु जाहे.17काहाके आमाआं थोड़ाज दिहोअ ओल्कू तारास आमाआं काजे खुब कामोंअ होय, आन जलमजुग्यीइ महिमा उत्पन्न कोअतू जाहे.18आन आमू तोम देखाअनारी वस्तुहू नाहां, पोन ने देखाअनारी वस्तुहू देखता रोताहा; काहाके देखाअनारी वस्तु थोड़ाज दिहोअ काजे होय, पोन ने देखाअनारी वस्तु जलमजुग्‍यीइ होय.

The Word for the World International

https://app.library.bible/content/6cbf4027f9a13b9c