1 पेत्र3
1तेहेंज कोइत, बोईं, तुमू सोताआ माट्योअ ताबाम रोवा; याअ कोअते के, तियांमेएं जर एखु ओमे जाआं देवोअ वसनोपोअ विश्वास ने कोअतोय,2ताहां तों वसनोअ परमाणे तुमाआं सोकु सोभाव देखीत देवोपोअ विश्वास मिकीत सेकेहे.3तुमाआं होबा सिंग्याअ पातार गुथीइलो, होना सांदीइ गोवणो पोवीइलोअ, आन भारी भारी आंगड़े पोवीइलोअ एहलुहू उपरसोल्यू देखावू ने जोवे.4पोन तुमाआं मोनोम दोड़पाअला मोनवी सोभावोम मोन्ज्ये देवोअ नजरेमेहें जास्ती महत्वाआ एहला हानाला आन शांत आत्माआं अमर गोवणावाईं होबात रोअहूं जोवे.5काहाके एहेंज कोइत जुना वाडोमेहें देवोपोअ आशा मिकनारी सोकी बोईं बी, जिवजिवोअ माट्योअ ताबाम रोत कोइत सोताआ होबाय कोअतीते.6जेहलीही सारा अब्राहामोहो मालिख समजीत तियाआ गोठ मानित साल्यी. तेहेंज कोइत तुमू बी हाजे कामे कोअती रोहा आन कोड्लीज गोठीही ने बिहा, ताहां तुमू बी तियीइ बेटीह्ही गोणाअहा.7तेहेंज कोइत, माट्यों, तुमू बी तुमाआं बोईंइरी समजदारी वाईं जिवन जिवा, काहाके बोईंहीं नाजुक जिव समजीत तियीइ मानपान कोअजा, एहलोहो समजीत कोइत के बेनु माहें जिवनोअ वरदानोअ वारिस होय, जिहीं वाअहीं तुमाआं प्रार्थना रुकाअहूं ने जोवे.8आखरीपोअ तुमू आक्खे एक मोनोअ, पाव्हीइलापोअ दया कोअनारे, मेर कोअनारे, किइमाय कोअनारे, हानाले बोणा.9बाक्ताआ बोदले बाक्तो मा कोअहा, गाईइ बोदले गाईत मा देहा; पोन उलटे तुमू आशिर्वाद आपा. काहाके देवे तुमुहूं आशिर्वादोअ वारिस ओवे तेहें काजे हाद्येहे.10वसन एहेंकोइत कोहे के:“जो कोडो जिवीइलोअ इश्शा कोअतोयआन हाजा दिही देखीइलोअ इश्शा कोअतोय,ताहां तों सोताआ जिबीही बाक्ती गोठी गोगीइलो रोत,आन ओठोहो ठोगोअ गोठी रोत आवरुहूं जोवे.11तों बाक्ताआ हेंगात सोड़ुहूं जोवे, हाजे कामे कोअहूं जोवे;तों शांतीम रोअलोअ कोअते पुरा मोनोवाअहीं कोशित कोअहूं जोवे.12काहाके देवोअ नजर धर्मी माअहूं पोअ रोहे;आन तियाआ कान तियांआं विनंती वोल रोताहा;पोन देव बाक्तो कोअनाराआ विरुद्दाम रोहे.”13जर तुमू हाजो कोइलाअ धुंद मिकतेय, तांहा तुमाआं बाक्तो कोअनारो कोडो होय?14पोन हाजे कामे कोइलाअ कोअता दुख बी वेठीइलोअ आवे ताहां तुमू धन्य होय. तें बिवाड़े ताहां तुमू बिहा मा आन काबराअहा मा,15पोन ख्रिस्ताहा प्रभु एहें कोइत जिवज्योअ मोनोमेहें पवित्र माना; जो कोडो तुमुहूं तुमाआं आशाआ बाप्तिमेहें किबी फुसे ताहां तियांहां उत्तर आपिइलो काजे कायम तियारीजमेहें रोवा, पोन ओं वारुहूं हानालाय आन मानपानो वाईं कोअजा.16आन दिमाक बी सोकु मिका, याअ कोअते के जियी गोठीइ कोअता तुमाआ बदनामी ओवेहे, तियाआ बाप्तिमेहें तुमू ख्रिस्ता विश्वासोम हाजू सोभाव लेत सालतेहे कोत तुमांआं जें बदनामी कोअतेहे, तें लाजवाअहूं जोवे.17काहाके हाजो कोइत बी तुमू दुख वेठे एहलिही देवोअ इश्शा ओय, ताहां बाक्तो कोइत दुख वेठीइलाप रोत ओं हाजो होय.18काहाके आपुहूं देवोअ जागे लेत जाअलाअ कोअते ख्रिस्ते बी पापोअ बोद्ले, मोन्ज्ये पापीइ कोअते धर्मी माट्ये एकुज वारीम आखाआ कोअते तारास वेठ्यु, पोन शरीर रुपोमेहें तियाहा माईं देदू, आन आत्माम तो जिवतु ओवू.19तियाज आत्मावाअहीं तिये जात कोइत जेलेमेऱ्याआ आत्माहां वसन कोयो.20एं आत्मे मोन्ज्ये पेल नोहाआ दिहोमेहें जेहेलाम तो जाहाज बोणावतुतो, तेहलामेहें देव धिर खेटीत तियांआं वाट जोवतुतो, तिया वाडोहो जियां तियाआ आदेश टाली देदू तें एंज आत्मे ओते, तिया जाहाजोमेहें निस्ते आंठुज जोंएं पांअयोंम रोत वासाअये.21तिया पांअयोंअ नमुना जो बाप्तिस्मा, तियाआ अर्थ डिलोअ मोल तुवीइलो नाहां, पोन सोकु दिमाक मिकीइलाअ देवोअरी रोअलोअ होय. तों ओमे ईसु ख्रिस्ताआ फाशोअ जिवीत उठीइला वाअहीं आपाआ तारण ओवोहो.22तो होरगाम गोयुहू आन देवोअ हाजाड़्यी वोग होय, आन देवदुत, होरगामेर्युउ आधिकार आन सेक्ती तियाआ आथोम होय.
The Word for the World International