1 पेत्र4
1ख्रिस्ते बी शरीरोमेहें रोत कोइत दुख वेठ्यो, तेहेंज कोइत तुमू बी तेंज आथ्यारे पोवित ल्या; काहाके जिये शरीरोमेहें दुख वेठ्योहो तो पापोम रोत सुटीत गोयू;2याअ कोअते के तुमू तुमाआं उगरीइल्यो जिवन मोनवीइ लालसोअ काजे नाहां, पोन देवोअ इश्शाआ काजे जिवुहूं जोवे.3काहाके बिगर विश्वासीइ मोर्जी वाअहीं कामे कोइलो, आन लुसड़ायीइ खाराब लालस, पिद्राय , झिंगवात नासीइलोअ, होरु पिइलो, मुर्तीपुजाआ सोगदाय यामेहें आपू जेते रोये ततोज बास.4तुमू तियांआं लबाड़ीम सामिल नाहां ओवता, ओं तियांहां नाहां गोमतो, तिहींवाईं तें तुमाआं निंदा कोअतेहे.5जो जिवताआ आन मोल्याआं न्यायनिवाड़ु कोइलोअ काजे तियार होय, तियाहा तें ईसाब आपे.6काहाके हाजी बातमी मोल्याहां बी कोयीते, जिहींवाईं तियांआं न्यायनिवाड़ु माअहुंउं होस शरीरोमेहें ओवू, पोन आत्माम देवोअ होस जिवते रोअहूं जोवे.7आखी गोठी वेगीज सेलाअनारी होय; तियाहा कोत सिंहाणे रोवा, आन प्रार्थना कोइलाआ कोअते तियारीम रोवा.8आखाम रोत वोडी गोठ ए होय के, एकमेकापोअ वादार मेर कोआ; काहाके मेर पापोहो टापी देहे.9बिगर टुटण्येज एकमेकाआ पावणाय तोआ.10हारेक जोंओं देवोप रोत जों वरदान जोड़्योहो, तों बाती बातीइ वरदानोअ हाजा कारभारीइ होसे तियाहा एकमेकाआ सेवाम लागाड़जा;11जों कोडो गोगतोय, तों एहेंकोइत गोगुहूं जोवे, के आंय देवोअ वसन कोहो; जों कोडो सेवा कोअतोय, तों देव आपेहे तियी सेक्ती वाअहीं सेवा कोअहूं जोवे; तों याअ कोअते के आक्खी गोठीम ईसु ख्रिस्तावाअहीं देवोअ वोडाय ओवुहूं जोवे; महिमा आन सेक्ती पिढ़ीन पिढ़ीइ तियाज होय. आमेन.12मेराला पाव्हीइला, तुमुहूं फारकीत पालीइलाअ कोअते जे आगीइ परिक्शा तुमांपोअ पोड़कीत उठ्यीही. ओं देखीत ए काविहीं जुदीज गोठ होय कोत तुमू बोगलाअहा मा.13पोन उलटे तुमू ख्रिस्ताआ दुखोम सामिल ओवतेहे कोत, खुसी कोआ; जिहीं वाईं तियाआ महिमा प्रगट ओवे तेहेलाम तुमू वोडी खुसी वाईं सेकलाअहा.14ख्रिस्ताआ नावोअ कोअता तुमाअ निंदा ओवतीय, ताहां तुमू धन्य होय; काहाके महिमाआं आत्मा मोन्ज्ये देवोअ आत्मा तुमापोअ सावलू कोअहे.15तेबी तुमू खुन कोअनारे, बांड, खाराब कामे कोअनारे, नेत बिहीराआ कामोम आथ टाकनारे एहलेहे ओवित दुख वेठनारे मा बोणहा.16ख्रिस्ती होय कोते एखाहा दुख बी वेठुहूं पोड़तोय, ताहां तियाहा लाज ने आवुहूं जोवे; पोन यी गोठीइ कोअते देवोअ महिमा कोअहूं जोवे.17काहाके ते वेल आवित पोत्यीही के, जिहींम पेल देवोअ माअहुंउं न्यायनिवाड़ु ओवे; जाहां न्यायनिवाड़ाआ सुरवात आपाआ जागे रोतीज ओवे, ताहां तियांआं कि ओवे, जें देवोअ हाजी बातमी नाहां मानते?18जेहलोहो वसन कोहे,“धर्मी माहुंहूं जाआं कठीण मेहेंनत कोइत तारण जोड़े,ताहां ने विश्वास कोअनाराआ आन पाप्योअ कि ठिकाणो?”19तियाहा काजे जें देवोअ मोर्जीइ परमाणे दुख वेठतेहे, तें हाजे कामे कोअते जात सोताहा कोलीइ बोणावनाराआ इमानदार देवोअ आथोमेहें होपी द्या.
The Word for the World International