1 पेत्र2
1तियाहा काजे आक्खी जातीइ फोगाय, ठोगोअ कामें, ढोंगड़ाय, खोद्राय, निंदा कोइलोअ एहलोहो आखो सेटे कोइत,2ओमे उब्जीइल्या हाना पोर्याअ होस, सोका आत्मिक दुदोअ तर्ह्ये बोणा, ताहां यावाईं तुमू तारणोअ काजे वादते रोहा.3काहाके देव हाजू होय एहें कोइत तुमू फारकीत लेदोहो.4ख्रिस्ताआ जागे आवा, जियाहा माअहें रिकामू समज्यु, पोन देवोअ नजरेमेहें तो निवड़ीइल्यु आन महत्वाआ जिवतु डोण एहेलुहू होय.5तुमू बी जिवता डोणोअ होस आत्मिक कोअ बोणते जातेहे, जिहीं तुमू सोका पुंजारहांआं होस सेवा कोअहा, तियाहा आत्मिक दान आन पोटे एहेलोहो गाराहा ईसु ख्रिस्ता वाअहीं देवोहो आपा.6देवोअ वसन एहें कोइत कोहे के:“आंय खास कामोअ डोण निवड़्यु,जियाहा आंय कोपराअ डोण एहेंकोत सियोनोम बोहाड़्युहू;तियापोअ जों बी विश्वास मिके तों केदिहीं ने होरमाय.”7तियाहा कोत तुमू विश्वास मिकनाराआ कोअते तो खास होय; पोन जे विश्वास नाहां मिकते तियांहां,“मिस्त्र्यां जिया डोणोहों बिनकामोअ समजीइयूतोज कोपराआ डोण ओत गोयू.”8आन बिहीरी जागे वसन एहें कोहे के,“ओ ठोकात पोड़ीइलाआ डोणआन अटकाव कोअनारु डोण एहेलुहू ओत गोयुहू.”तें ठोकाअये काहाके तियां तियाआ वसनोहो ने मान्ये; याअ कोअते ते निवड़ीइल्ये ओते9पोन तुमू एक निवड़ीइल्यी पारवाड़, राज-पुंजाराआ समाज, सोको देस, देवोअ खाजगी माअहें एहलेहे होय, याअ कोअता, काहाके, जिये तुमुहूं आंदाराम रोत वोडा उजालाम हाद्येहे, तिया देवोअ गुण देखाड़ुहूं जोवे.10पेल तुमू तेहलेहे माअहें ने ओते, ओमे तुमू देवोअ माअहें होय; तुमुहूं दया ने जोड़्यीते, पोन ओमे दया जोड़्यीही.11माआं मेराला दोस्ता, जे तुमू वाटहारा आन परदेसी होय, तियाहा कोत तुमुहूं आंय विनंती कोअहो के, जिवात्माअरी लड़ाय कोअनारी दुन्यादारीइ लालसो रोत सेटे रोवा;12परदेसी माअहूंमेहें तुमाआं सोभाव हाजू मिकजा, काहाके, तें जियी गोठीइ बाप्तिमेहें तुमुहूं खाराब समजीइतेहें, तेबी तुमाआं हाजे कामे पालीत तियाआ आविइलोअ दिही देवोअ महिमा कोइत सेके.13प्रभुउ कोअता तुमू माअहूं बोणावल्या हारेक नियमोअ पालन कोअजा; राजा आखाआ डायु होय कोत, तियाआ आधिकारोम रोवा;14आन आधिकारी ए बाक्तो कोअनाराहां डोंड आपे तेहें आन हाजो कोअनाराअ नाव वोडो कोइलाआ कोए तेहें काजे तिये मोकल्याहा, तियाहा कोत तियांआं बी ताबाम रोवा.15देवोअ इश्शा ए होय के, तुमू हाजे कामे कोइत विणहान्या माअहुंउं खाराब कामे बंद कोई देअहूं जोवे.16तुमू सोताहा सुटले होय एहेंकोत होमजा, पोन यी सुटकाहा तुमू खाराब कामोंअ कोअता मा वापराहा, पोन तुमू सोताहा देवोअ सेवक एहेंकोत समजीत साला.17आखाहा मानपान आपा; आखा पाव्हीइलापोअ मेर कोआ, देवोहो बित साला, राजाहा मानपान आपा.18सेवकों, तुमू तुमाआं मालख्योअ ताबाम रोवा; जे हाजा आन हाजो कोअताहा तियांआं एतोज नाहां, पोन जे जोराखा होय तियांआं बी आथोअ निसे रोवा.19जर एखाहा देवोअ वाखरी विण सुकीज तारास वेठुहूं पोड़तोय, ताहां तों हाजो होय.20काहाके पाप कोइत ठावकोज मार खाअहूं पोड़े, तिहींम कि वोडाय होय? पोन हाजो कोइत बी दुख वेठुहूं पोड़तोय, ताहां तों हाजो होय, ओं ते देवोहो गोमेहें.21काहाके याअ काजेज देवे तुमाआं निवड़ कोअयीही; जेहेंकोइत ख्रिस्ते बी तुमाआ कोअते दुख वेठ्यो तेहेंज कोइत के तुमू बी तियाआ पायरोपोअ पायर मिकीत सालुहूं जोवे.22तिये पाप नाहां कोअयू, आन तियाआ जिबानीम रोत वाहीं खोटी जिबान नाहां उनाअहूं जोड़्यी.23तो गाई उनात बी फाशुउ फिरीत गाईत ने देतुतो; दुख वेठीत बी कोडाहा धमकी ने देदुतो; पोन खोरी निती वाईं न्याय कोअनारा देवोअ आथोम होपात जातुतो.24ख्रिस्ते सोताहा आपाआ आखु पाप सोताआ डिलोपोअ उसलीत कोइत क्रुस खांबोपोअ सोढ़्यू, तो याअ कोअते के आपू पापोअ कोअते मोइत, हाजी गोठीइ कोअते जिवन जिवुहूं जोवे. ईसुउ मार खाद्ला वाअहीं तुमुहूं नेराय जोड़्यीही.25तुमू वाट पुलवाअला मेडाआं होस भटकीइतेते; पोन ओमे तुमू तुमाआं सारवाल्योअ फाटी जो तुमाअ जिवोअ राखवाली कोअहे, तियाआ जागे वापिस आवित लागेहे.
The Word for the World International