BaHebhelu4
1Nokudalo, kana chibimbiso chokungwina mulunyetutuko lulwe chichipo, atityeni kutila kuti kusibe noumwe wenu uchawhi wakonelwa kuswika paluli.2Nokuti iNdebo iMbuya yakezha kwatili sokwabali, koga iwhi lyabakawha ibo alijakababhancha, nokuti yabo bakaliwha abajakalishanganisa nokudimbwa.3Nokuti isu takadimbwa tinongwina mulunyetutuko yolo, sezwaakaleba eti,“Ndinokowa mubukali bwangu nditi,‘Abatoofa bangwina mulunyetutuko lwangu,’ ”Kojoba mishingo iye yakabapela kuvila pakupatulwa kwenyika.4Nokuti pana pamwe paakaleba nezhuba lyashanu linamabili eti, “Mwali wakanyetutukwa nezhuba lyashanu linamabili kumishingo iye yose.”5Akale mundebo yeyi wakati, “Abatoofa bangwina mulunyetutuko lwangu.”6Sezwo kunooba nabamwe banootubula kungwina, koga yabo bakaba batambula iNdebo iMbuya bakakonwa kungwina pezhulu pokusowhilila,7akale wakashala limwe izhuba eti “Nasi,” elebeleka kupindila munaDavidi kwapinda nshaji undefu mumawhi abandwa kale,“Nasi, mungowha iwhi lilye,musikomise myoyo yenu.”8Nokuti ngana Joshuwa akabapa lunyetutuko, Mwali aajaloolebeleka nezwe limwe izhuba.9Nezwo, kunosala izhuba lyesabata lyokunyetutuka kwabanhu baMwali,10nokuti ani naani unongwina mulunyetutuko lwaMwali, unonyetuka mumishingo yiye somwaakata Mwali kumishingo yiye.11Nokudalo ngatikwejeni kungwina mulunyetutuko yolo, kuti kusibe nomwe uchawila muchitiko chakadalo chokusowhilila.12Nokuti iwhi lyaMwali ibhenyu akale lishinga kasa, linopiza kupinda igwalabaza linocheka namatibi mabili, libhaya lipambulanya mwoyo nompepo, kana imhingu nomwongo, libiga pachena lulakamilo nezwinoshaka kutiwa nomwoyo.13Akale akuna chibumbwa chilosisika kwaali, koga zwose zwilofukulwa akale zwipo pachena mumesho awe iye utichoolungululila zwito zwedu.14Sezwatina uNtebuji unkulwana, elinkulugulu wakapinda kumatenga unowhi Jesu, Mwananhulumyana waMwali, nokudalo ngatisimiseni busumikiji bwedu.15Nokuti atina uNtebuji unkulwana usinotubula kutiwhila ishe mubutela bwedu, koga iye wakakwejwa munzila jose somutinokwejwa, koga esina luchinyo.16Nokudalo atisendeleni pelyo nobugalo bweshe tili nolubimbo, kuti titambule ishe nokuwana chipiwo chokutibhancha nonshaji wokushayiwa.
The Word for the World International