Keuliakegai17
1Pecai tinggimgwame hang hena hekwak hena pwa kebamme hangge gwang eh a dage ranggai, “Gwanglu, Ih ncu dui kekiee reu ga kebam helipui kedi de tutiak keulia zie.2Kideu ga hegwangme pecu ngngwa kemmha ta tei, nah pe kemmha zau sak eh kideu ga kelunghme miedi.”3Pecai tinggimgwabe acu Rabe gade hetaideu gage ngngwa gaidi, nah Ih mipui ge teikuu giereba ge Tinggwang de rangkemsia zile puiting kecu reu ga bam eh ngau. Teikuu pepeu hena nah pekii kerei bam.4Mipui de gieremang nah giereba kecu pai bah bam nah kecak net, tangtsu pemi kewhung nah tsugadung teula. Pe ba ga kecak piak kemneu keteidung nah pe kemmha keheradung le puiting eh pwabam.5Pe sipie gage kengkim zi ge raupwa bam: “Kedi Babylon, helipuidung nah kideu ga kemneu ketei leune pui.”6Mipui de kemcimedung jai nah Jisu zierang ziemne teitset kedidung jai sakmie pwa kebam Ih ngau. Ih pecu kengau dau, a macangh sütdi.7Cidau tinggimgwabe adage ranggai, “Daitie n macangh dino? Ih mipui nah pecu pungkela teikuu, pepeu hena nah pekii kerei kebambe de kie kengkim de ncu ranglia zie.8Teikuu nang kengau ndaa ringla, dede cu ringla meda, cide penli kegah hekwa kecok gade cuh lai eh bam dida. Nah cide kengkap gage tetgai dizie. Kideu ga kelunghme, kideu damkelu gade Kering Laisiukwak gage penui zi rau teula kemakme, penui teikuu ndaa piage ringla, dede cu au ringla kemak de, dede gwang dai lai eh kelabe de ngau de penui macangh dizie.9Aide maci teu eh ci kera ge: Mipui ntum kebam pepeu henadung de kideutu henadung da. Penui hegwangme henadung deda.10Hegwangme mengei kau dida, hangge cu de di bam reu, kedabe cude gwang mereu. Dede pa kegwang dau, pa peting keduina ge rünne gwale bam lak.11Teikuu ndaa piage ringla, dede cu ringla kemakbe de, pa hegwang pehesetbe da, nah hang hena gade hangge, nah kengkap gage tetgai dizie.12Nang kengau pekii kerei de hegwangme kerei penui hegwang kengkieng ngaulu kemakmedung, dede penui teikuu de ngngwa bamdakkak ket hegwangme tei kera kengkieng ngau luzie.13Aidungde kelungzwa, nah penui penui kengkieng nah kedi de teikuu de peudi.14Penui Meurünna de ngngwa hereu tei zie. Dede Meurünna ne penuide ngam luzie kedanemene pa au kengkieng keteume reu Rampaube, nah hegwangme reu Hegwangbe, nah pecu ngngwa kebamdung de au qukelu, kedetkelu nah kesamsangme.”15Pecai tinggimgwabe adage rangdi, “Nang duidung kengaude, cipau reuga helipui ntum kebam de au, minadung, nah hemaadung, nah heleuhdung, nah heletdung.16Nang pekii kerei kengau de, nah teikuu de, helipui de ngkau zie. Penui pe da kebambe leune keuteu di delwe pecu peu paaula bam dizie; nah penui pe teih tyei zie nah pecu mi gage ru dizie.17Kedanemene Tinggwang pe lungning tei kera, nah suige tei eh Tinggwang samdung teicanglu kemaktane penui hegwangram teikuu de peudi kera penui lung teibeu kedine.18Cu nang mipui kengau de au kideu ga hegwangmedung reu kengkieng teu kebam namdi kedi deda.”
Bridge Connectivity Solutions Pvt. Ltd.