Keuliakegai16
1Pecai Ih kerecaki gade makwa sahbak eh tinggimgwame hang hena dage kerang siu, “Mie delwe kideu gage Tinggwang lunghop kwak hena de rui gailo.”2Cine tinggimgwabe keraibe mie eh pe kwak kideu reu gage ruigai. Ge ngau kehing nah teei süt kecu zamdung teikuu kaugiak kepungme nah cipau mie de reca kelamedung reu gwangdi.3Pecai tinggimgwabe pekenabe pe kwak jaaidi gage ruigai, ge cide ketsaime ge jai nzwadi nah jaaidi ga ringkela kau leune tsaidi.4Pecai tinggimgwabe pekecumbe pe kwak kereukidung nah duirwakdung gage ruigai, ge cidungde hejai mmidi.5Nah Ih dui reu di kebam tinggimgwabe ma kerang siu, “Nang au masang, cude nah ndaa de kela, Kemcibo,kedanemene nang ne aidungde tiak delu. 6Penui kemcimedung nah caihakecime jai teilwa kedine,nang penuide hejai sak kerade peu ;cide penui ngau kebuibe da.”7Pecai recabam kelikegai Ih siu, “Yeo, Ngkiengtube Rampaube Tinggwang,n tutiakdung au kesang nah mzui lie.”8Pecai tinggimgwabe pemdaibe pe kwak tingnaimiak gage ruigai, nah cide peu pelum kechi le minadung de pugai.9Cine minadung de pelum kechi le pudi, ge penui kengkap aidungde kengkieng teu kebambe Tinggwang zi rangmsiadi. Penui helungnreu luma, nah pecu kendu peu ma.10Pecai tinggimgwabe pemengeibe pe kwak teikuu hegwangbam gage ruigai, ge pe hegwangram muitingdi. Pe minadung keteei de ziemne penui mleu gi bamdi.11Cine penui keteei nah penui keteei zamdung ziemne tinggim ga kebam Tinggwang de rangmsiadi, dede penui batadung gade helungnreu luma.12Pecai tinggimgwabe peherokbe pe kwak Euphrates reuki kedi de gage ruigai, ge cipau dui de canghdi, naimiak kepetle de kegwang hegwangme lampui mteilu kerane.13Pecai Ih neidi mui gade, nah teikuu mui gade, nah kenret caihakecibe mui gade, mci kemak rabe kecum hegau nzwa eh mpetkela ngau.14Penui au miswakegah batadung ketei herakesiabe rabedung da. Penui kideu pelane ga hegwangmedung da mie, iciu eh penuide Ngkiengtube Tinggwang tingba kedibe nai ziemne keregi kera teu hekwalu kerane.15(“Ainie! Ih keregame ge nzwa gwang zie! Mrak delwe pe paini bahlwe kebambe samlam pungtu, iciude pa paaula eh rwa melu kerane nah penui pe hengam ngaudi melu kerane.”)16Pecai herakesiabe rabedung penuide heni Hebrewme let gade Armageddon lie qukela gage teu hekwalu.17Pecai tinggimgwabe pehenabe pe kwak tingkai gage ruigai. Ge makwa ge kerecaki hegwangbam gade sahbak eh ranggai, “Cide tei dida!”18Pecai cika ting hepik, tingceu kengyim nah nnuihteu sütdi, mina kideu ga lunghgwang kelu gade madaude cinzwa kemak ge, nnuih aide teu mdisüt.19Babylon namdi kedi de pang zicum teidi nah kideu pelane ga namdidung kaudi. Ge Tinggwang Babylon namdi de nsunglu, nah pa pecu pe lunghop zau piakde pwapeu.20Pecai duigwadeudung pelane pakdi, nah lamlwadung ngaulu tadi.21Nah tangheu heudi, talent ge rüt ge, tinggim gade minadung reu cakmie. Minadung kengkap tangheu de ziemne Tinggwang de reset, kedanemene cide ngau kehing kengkap ge kecune.
Bridge Connectivity Solutions Pvt. Ltd.