Proverbs10
1Solomon macisamdung. Hena kemriakme ge pe pei suiyi tei lula dede hena kemiena ge pe pui de lungrei teugwang beula.2Masang kemak gade mahei ngaukelu pemi gah, dede makeyi ketei de ncu ketsai gade kelibeu zie.3RAMPAUBE mina keyime de peu mzeu di lama, dede pa kesiame hengim de teibeu lama. 4Kenghet ba ne mina de tei magah dila, dede mina kemrime ba au mahei ngausüt lula.5Kemriakme hepwakting dau mei hekwa lula, dede luhlüt tingdau zip kebam kera pe ziemne hengam ge.6Tinggwang mapeudung mina keyime peureu ga gwang zie, dede mina kesiame samdung kesia zaisiet kebai teu lala.7Mina keyime ge pecu nsung kelame suiyi tei lula, dede kesiame zi au tim gah dizie.8Makecetme keledeu sam luulu la, dede kemie sam rang kelabe au kap dizie.9Makesang lampui ga tet kelame kwak luzie, dede pe lampui teingkoi kelabe de mtei dwa liagai zie.10Miak lisau kelame lungrei mdeu lula, dede kemie sam rangkelabe de kelien ngkei dizie. 11Mina keyime sam au kering dui rwakge, dede mina kesiame sam au zaisiet kebai teu petla.12Mide ngaukerau ngngwakesia mdeu beula, dede keku au kemau leune gi beula. 13Mina keningcingme maci sam rangla, dede kemangme de saja peuzie.14Kemriakme maci hekwa lula, dede kemangme ge samrang ne kengkap teugwang nna beula.15Makeheime ge mabam au riekelu pe namdi deda; magah kegahme de ngkap dila.16Mina keyime ziehi au kering; kemaume gie kelu dene penuide kemau gage ngngwa gai beula.17Keledeusam mzai kelume ziemne kering lampui ge bam, dede keledeusam mlai kelame kengkap gage tetgai dila.18Mide ngaukerau kebai teu kelame kenret rangla, nah ledkieesam rang kelame au kemieme ge da.19Sam kekiee ga kemau gah lama, dede cet teune eh marang kelame au kenriakme da.20Mina makesangme mleu au rangkanggeu kemcibe nzwa da; kesiame mlung ga pemi kecamnage gwale gah.21Mina makesangme sam mikekiee de teihemi beula, dede kemieme ge pe mriak kegahne tsai dila.22RAMPAUBE mapeu keyidung mahei teugwang beula nah pa cide ga lungrei kaisi lama.23Kesia ketei au kemieme kenggwa ge, dede kemteu au mina keningcingme ziemne suiyi ge.24Kesiame ge pa hingkela dene pecu ngam dizie, dede makesangme luu keneu kelabe tei beuzie.25Kesiame rahang ge nzwa guigwang gai eh penui gah dila, dede makesangme au duirwak ge nzwa kwak bammui zie.26Kenghetbe au pecu langkegaibe dade, kehiadui migei tei kerehim nzwa nah mimiak ga mika kebam nzwa.27RAMPAUBE mie hing ring ketie peula, dede mina kesiame teilung tei ndui dizie.28Mina makesangme keregui au penui suikeyi deda, dede mina kesiame mmi tei nduidi zie.29RAMPAUBE lampui makesangme de gumbeu la, dede cide kesiame de ngkap dila.30Mina makesangme de madaude kelien gi dilak, dede kesiame kideube ga lungh bam lak.31Mina makesangme mui gade maci buipet lula, dede kesiame mleu dang mpet dizie.32Makesangme daipai rangde mina luulu ziebi cila, dede kesiame mui gade au kesiabe rünne rangla.
Bridge Connectivity Solutions Pvt. Ltd.