Proverbs11
1RAMPAUBE riangteukwak petau kemakpe ngkau la, dede pa perüt samsang eh teukecu pe suiyi la. 2Ngang kecu ga, hengam gwangla, dede henah kegai ga maci bamla.3Keyime de makesang ne saulia la, dede nlumgai kelakme kengkoi ta keteine penuide ngkap dila.4Hetuketiak benai mahei pemi teilak, dede petaube keteine ncu ketsai gade kelibeu zie.5Makesangme ge petau ketei ne pe lampui tei mzui lula, dede mina kesiame penuikatei penui ta kesiane kau dizie.6Tinggwang suiyi tei kelame petaube ketei ne penuide kelibeu la, dede nlumgai kelakme penui hengin ne penuide keu dila.7Mina kesiame tsai dige, pe hengin de pecu ngngwa tsai dila nah pe kengkieng ga pe keregui kebamde magede ta dila.8Makesangme de keherei gade keunzia beula nah cide kesiame da gwang dila.9Nlum kemakme pa samrang le pe kidabe de ngkap dila, dede maci ne mina makesangme de kelilu la.10Makesangme lunghyi luge, namdi ge pesuiyi dila; kesiame tsai dige, suiyi kwa sahla.11Mapeu keyi teugwang Tinggwang suiyi tei kelume ziemne, namdi di si lula; kesiame sam ziemne namdi pangpop dila.12Mige pe zangme ha rang kemsia au kemie, dede kenriakme ge au mlei mene bam dila.13Ledkieesam rang kelame kengkiemsam pau dila, dede nlumlu kebuime ge cide hebai lula.14Kemteu puisau kegah ga heleuhbe kau dila, dede kemteume kekiee sui keteukelu gade ngkieng lula.15Keheibede cikemakme rangkang kehepok ga zierang teibeu cai keherei kecu ngau bi zie, dede sampet cinkenzwa teirau kelame kwak luzie.16Pe zai keyi puige kerüt ngau lula, dede pe zai kesiame mahei peei la.17Pe zai keyime ge pekatei pe ziemne gie lula, dede pe zai kesiame ge pekatei pecu rezam lula.18Mina kesiame ge pe ziehi ngaulu kerane nretla, dede makesangbe ling kegaibe kesangbe ziehi ngau lula.19Makesangme petaube tei kelame ring luzie, dede kemau cai zui kelame tsai dizie.20RAMPAUBE makesia mning kelame de ngkau la, dede kemau kegah lampui ga tet kelame de pa pe suila.21Aide cisiakte lu, kemaume saja ngau mene talak, dede mina makesangme leuhme de kelibeu zie.22Hezukeyi puige makeyi kesia cet ntsamlu kemak au hebak ngkie gage kecak ringgoi kekai nzwa da.23Mina keyime keyibe rünne hengin la, dede mina kesiame hengin au rata rünne.24Mige teizang la, dede pa hekwa kiee silu zie; kedage peu kerabe de herak pwabam la, peda magah gwang dizie.25Mbang kelame lungh yi luzie nah mi kedame de dui pwapeu kelabe dui ngaudai luzie.26Mei zwabeu rau kecube de mina reset beula, dede zwa kebeume peu ga mapeu keyi peurwa kai beula.27Sünne eh keyibe peei kelame mi suiyi peeila da, dede kesiabe peei kelame kesiabe ngau luzie.28Penui maheidung de nlum kelame kau dizie, dede tsing nei nzwa, mina keyime lunghyi luzie.29Pekatei pe kilung ga keherei teugwang kegaibe magede gum gailak, nah kemieme kenriakme kila tei dizie.30Mina makesangme au kering tsingbang nzwa dizie, dede zaisiet au keringriadung keuteu dila.31Ainie! Mina makesangme pa ngaulu kebui nsam ngau lula; kesiame nah kemaume daikiee gede ngau laino!
Bridge Connectivity Solutions Pvt. Ltd.