Job19
1Cidau Job keli eh ranggai,2“Daitie ge nnui acu tei keherei nah samdung le acu tei kecaidi laino?3Nnui pia kerei acu kesiu; nnui ada ge ma siasüt kecu tei gai de nnui ngngam bam meda.4Magade Ih ne tei maudi kesang liecai, a mau bam kecu de akatei a zieda.5Magade nnuikatei nnuide tei cehu pwa a nreu hang cai nah hengam ziemne acu mmau cai,6ciucai nnui Tinggwang ne a dage tei mau kegai nah acu baih gage tui kegai cibam kerabe.7Pielo, Ih hap pet gai, “Ngngwakesia!” dede Ih samli ge de ngaulu ma. Ih kengha qu gai, dede cika petaube gadi.8Pa ne a lampui kamdi ciu eh peu acu tetkah kelakne, nah pa kemui le a lampui kam di.9Pa a dade hetwa herüt gau mpetdi, nah hegwang peurwa a peu gade keumpet di.10Pa acu teipang teipop di, nah Ih au mta di; pa acu teuncuh pwa a keregui tsingbang ge nzwa beuda.11Pa pe rata a dage rui gai; pa au acu pe ngauraume lie la dida.12Pe reugwame gwang ngkwa lwe; penui hang acu mcwa kera tei nah a paiki twagwa lu.13Pa a siname de ada de keumdei dida; a zangname ada de mdei di.14A kibaume acu püt dida; acu kenna zangmedung acu nsungta dida.15Nda a kiga hegia tei kebamme nah a kila puidung acu le sangcikemakme nzwa dida; Ih penui dwa gade mina ketsamme ge nzwa dida.16Ih a kilame ge de qugai, dede pa a sam keli beuma Ih a mui le pecu tumgai liede.17A kwa a ledlei a nau pe sui lama; a pui za gade mna kelume dade liede Ih au kengkau ge dida.18Hena keceunadung de acu ngau nghetdi; Ih cuh lwe marang liede, penui a samrang mmau di.19Acu kehung zangmedung acu ngau nghetdi; Ih kehungme acu mmau eh a dade nreu tetdi.20A radung a geu nah a ci ga koplwe bam; Ih a gei geu ziemne ringbam.21Acu ngaungia lo, acu ngaungia lo, a zangmedung, kedanemene Tinggwang ba ne acu tung gai da.22Daitei eh nnui Tinggwang nzwa acu tei keherei lano? Nnui a pumteih de le mnunglu buini?23Oh, cu a samdung raulu liecai! Oh, cidungde laisiukwak ge gage raulu liecai!24Oh, cide raukelu hegeu kerautie le raulwe, penui tsuradung gage kelungta ziemne raulu liecai.25Dede a ziemne au, acu relikelube ring kebam Ih ci, nah kekam le pa kideu ga sap zie;26a geu, cide au mipum, teimsia kedi cai, a pumteih gade Ih Tinggwang de ngau zie.27Ih akatei a miakle pecu ngau zie, Ih, nah mi kedame ge de lak. A nlung ada de peta tei ta dida.28Magade nnui rang eh, ‘Dainzwa anui pecu tei keherei lulai no! Keherei kecu pe da bam,’29nnui kiengtie de hing lulo, kedanemene rata au kiengtie saja beula kecune, iciu de nnui hetuketiak ge kebam cilu kerane.”
Bridge Connectivity Solutions Pvt. Ltd.