Job20
1Pecai Zophar Naamahmepei keli eh ranggai,2“A lungcet ne acu tei pwa keli guide gai kedanemene a lungrei ada kebam ziemne.3Acu rütkemak kwa ge acu kesiu, dede Ih cilu kela rabe acu keli beu.4Nang cimeni makesang aide ndaa gade, Tinggwang mina de kideu gage kai kelu dau:5mina kenlienme ngkieng kebam au peting keduina ge, nah hezai tei eh pesuiyi kelame suiyi au bam tie lu lama?6Pe hu hang tinggimdung tungbam liede, nah pe peu hemwa tungbam liede,7ciuliede pa pekatei rebui nzwa gah dizie; caugame pecu ngau bi rang zie, ‘Pa daiga bam no?’8Pa au hemang ge nzwa liem tetdi da nah ngau dailak ta; kesang, tingmui makengau nzwa pecu gwa mpak dizie.9Pe miak pa ngau kecudung ngau si tadi zie; pa kebam kelak de ngau si tadi zie.10Pe name kegahme dade pemau kie zie; pe badung pe maheidung keu caili beu zie.11Peradung au perehang dau kengkieng kepui teibam, dede cide rebui teidi zie.12Makesiabe au pe mui gade kum, pa cide pe mleu kangga de kebai teu bamla,13pa cika kai pwabam nah peu tetdi mene bam liede dede cu liede pe mui gage kai pwabam reu,14pe taktyei peraidung ga kah dila; cide henei mcai nzwa heiring dila.15Pa maheidung de mneu lula, dede pa nrui mpet dai dizie; Tinggwang cidungde pe za gade keu mpet dizie.16Pa henei mcai heiring ntim luzie; henei mleu de ne pecu teitset dizie.17Pa reuceunadung heliadui nah maca kelwa gade pesuiyi ngau gailak.18Pa rei kegai tsi bui kelu de peu caili dai dizie nah pa tyei gailak; pa pe lila gade hi kelu mahei de teu pe suiyi ngau gailak.19Kedanemene pa kegahme de mneu nah teikeherei la; pa tei kemak kidung de pezai siasüt eh keu tetdi.20Kedanemene pa pekatei kemnung ketde cilu ma, pa pe suiyi eh keu keludung ketde hekwa gailak.21Pa ne ngkap kemak ketde bam ma; cine pe mahei de au bammui lu gailak.22Pe mahei pui nlim kebam ga pa keherei eh kau mie dizie; ma kegahme pelane ba gwang pecu renia dizie.23Pa mapwa peza tei puilu zie lie kebam dau, Tinggwang pe lunghop nah rata pecu peu gai zie; pa matyei kebam dau Tinggwang tingrui lang nghung gai zie.24Pa hegeu kiengtie gade pak zielie kebam dau, hetageu lakpi ge ne pecu kap dizie.25Pe caile de cide teu mpet pe mceu gade mzai liklik kecu mui ge pet. Pereu ga kehing gwangdi.26Pe mabam de ziemne muiting kecu kai pwabam; ntaugai kemak mi ne pecu ru dizie; cide ne pe paiki kiga dai bangbam bi ru dizie.27Tinggimdung pe mau keulia gai beuzie, nah kideube cuh eh pecu kemmau zierang tei zie.28Pe ki mahei de gah dizie; Tinggwang pe rata kelu benai pe gudung de ngngwa eh gadi zie.29Aide Tinggwang dade kenlienme kwa, Tinggwang ne pe ziemne mapwa ge mtei pwabam.”
Bridge Connectivity Solutions Pvt. Ltd.