Jeremiah32
1Judah gwangpei Zedekiah hegwang tei kelu mmi kerei bekum RAMPAUBE sam Jeremiah da gwang, Nebuchadnezzar hegwang tei kelu mmi kereieheset bekum de.2Cipau tingdau, Babylon hegwangpei reugwamedung Jerusalem twagwalu, nah caihakecibe Jeremiah de Judah hegwangpei kiga kekwame kigu gage baangdi.3Judah hegwangpei Zedekiah pecu baangdi nah ranggai, “Nang daitei caihasam rang eh aide rang lano, ‘RAMPAUBE aide rangla: Pielo, Ih namdi be aide Babylon hegwangpei ba gage kaibeu zieda, nah pane aide gum luzie.4Judah hegwangpei Zedekiah Chaldeanme ba gade pak gailak, kedanemene pecu Babylon hegwangpei ba gage tuigai beu bi dizie kecune. Pe mui le hegwangpei de resiu zie, nah pe miak le hegwangpei miak ngau zie.5Pa Zedekiah de Babylon ga ngngwa mie dizie, nah Ih pecu ngngwa bata teidi kemaktane pa cika bam zie—aide RAMPAUBE ne ndugai. Nang Chaldeanme de regi bam liede, nnui yi gailak.’”6Jeremiah ranggai, “RAMPAUBE sam a da ainzwa rang gwang,7‘Pielo, Shallum napei Hanamel n pau n taiga gwang zie nah rang zie, “Anathoth ga kebam a deu de nang lui lulo, kedanemene luilu kebui qwa n da kebamne.”’”8Pecai, RAMPAUBE ndu kegai nzwa, Hanamel, a pau napei, a taiga kekwame kigu ga gwang, nah pa a dage ranggai, “Benjamin deu ga Anathoth ga kebam a deu de lui lulo, kedanemene mapwame qwa de ngu delu, nah luilu kebui qwa n da kebamne. Nkatei n ziemne cide luilu.” Iciu eh Ih aide RAMPAUBE sam lie kecu cilu.9Cine Ih Anathoth ga hangdeu de a pau napei Hanamel dade luilu, nah Ih pecu rangkanggeu perüt mdet beudi, perüt shekel kereiehena.10Pecai Ih kehezui laisiukwak gage rau gailu nah cide kaudap kaidi, nah peu mide zierang teidi. Pecai Ih rangkanggeu de mdet beudi.11Pecai Ih lui kelu licak laisiu de keulu, aja de nah hezaidung kebam de, ngkui kemak laisiu de de si eh.12Ngkui kedi laisiu de Ih Neriah napei Baruch, Mahseiah capei Hanamel, a pau napei dwa gade peudi, nah ngkui pwa kebam laisiu ga zierangme, nah Jewme pelane kekwame kigu ga ntum bam kecume dwa gade peudi.13Cine Ih Baruch de penui dwa gade aja kaigai. Ih ranggai,14“Tinggim reugwame reu RAMPAUBE, Israel Tinggwang, ainzwa rangzeu: Licak laisiu aidungde keulu, ngkui pwa kebam nah ngkui mene kebamdung, nah cide lidei bung gage kailu iciude peting ketie ge bamlu kerane.15Kedanemene tinggim reugwame reu RAMPAUBE, Israel Tinggwang, aide rangzeu: Kidung, luhdung, nah kubetsi luhdung de hangdeu aide gade lui daizie.”16Lui kelu laisiu de Ih Neriah napei Baruch de peu kedi cai, Ih RAMPAUBE da kekie tei eh ranggai,17“Oh, RAMPAUBO! Pielo! Nang nkatei n kengkieng nah n ba hwa gai eh tinggimdung nah kideu teilu. Nang kerang leune magede nang tei kepa gah.18Mina pecang pecang de de nang n samkak kelu samsang de lia la nah mina maudung ruipwa penui cai penui namedung dage rui gaila. Nang kedi nah kengking Tinggwang be da; n zi au tinggim reugwame reu RAMPAUBE.19Nang au n maci hu nah n batadung au ngkieng, kedanemene nang au mina ketei leune piebam la, penui teilung lungh kegai ria gade nah penui tei kegai ria gade penui ziehi teibeu kerane.20Egypt deu ga nang marengeidung nah miswakegah batadung teigai. Henai tingba kecang de nang Israel aika nah heleuh leune kakga, nang peu n zi de ndu bam dida.21Kedanemene nang n Israel minadung de Egypt gade marengei nah miswakegah batadung tei kegai gade ngngwa mpet beu, kengkieng ba de le, hwa pwa kebam ba de le, nah ngaukehing kedi de le.22Pecai nang penuide kideu aide peudi—penui paumedung de nang pwapeu zielie sampet kebeu de—tungdui nah heliadui lwa kebam deu de.23Cine penui nlüt eh cide gumlu. Dede penui n sam mzai ma mede n hezaidung de mzui luma. Nang tei lulo kebeu leune penui magede teima, cine nang penui reu gage kekap aidungde keugwanggai.24Pielo! Namdi be ngamlu kerane kekwaki namdi ga kui cang luda. Kingtie, herakum, nah mateei ziemne namdi de pecu renia kela Babylonme ba gage kai dida. Tei gwang zie lie de nang rang kegaidung de teibam dida, nah pielo, nang ngaubam dida.25Pecai nang nkatei a dage ranggai, “Rangkanggeu de le nang nkatei nziemne luh ge luilu nah peu mina de zierang tei beulu, Babylonme de namdi aide peu lai eh bam liede.”26RAMPAUBE sam Jeremiah da ainzwa rang gwang,27“Pielo! Ih RAMPAUBE da, heleuh leune Tinggwang. Magede a ziemne teipa kecu bam ni?28Cine RAMPAUBE aide rangla, ‘Pielo, Ih namdi aide Babylonme nah Babylon hegwangpei Nebuchadnezzar ba gage peudi lauda. Pa cide tui luzie.29Namdi de regi kebam Babylonme gwang eh namdi aide mi twa gai zie nah ru dizie, mina ki reuga kidung ga Baal de reca nah hera kedadung de zau ratak ruigai beu eh a rata teibam kedidung de si zie.30Israelme nah Judahme penui heri heret tingdau a miakngau gade makesia tei kegwangme. Israelme penui bata gade a rata tei dida—aide RAMPAUBE ne ndugai.31Namdi aide tei kelu benai gade a rata nah a lungka tei la dida de eh RAMPAUBE ndu gai. Cide henai kecang de cinzwa bam. Cine Ih cide a dwa gade keugi dizie32Israelme nah Judahme kesiadung de ziemne, a rata ketei batadung de ziemne—penui, penui hegwangmedung, hegwang napeimedung, cingkumedung, caihakecimedung, nah Judah ga kebam leune nah Jerusalem kelunghme leune.33Acu ncwa mene nreu tetdi, Ih penuide helung kai eh ledeu gai beu liede. Ih penuide ledeu kera tei iciu eh petau lie kegaide luulu kerane, dede migede kingnei ma.34Penui penui kemneu mamiedung a zi le qu kela be ki gage kailu, cide tei hera di kerane.35Molech ziemne mi gage pe napeimedung nah pe napuimedung de kai kerane penui Ben Hinnom Langkam ga Baal ziemne heni kecehudung teigai. Ih penuide aja peu ma. Penui kemneu ta aide tei eh Judah de peu kemau teidi kera madau gede Ih cetgai ma.’36Cine cu au, Ih, RAMPAUBE, Israel Tinggwang, namdi be aide ziemne ranggai, nang rang kebam namdi be de, ‘Babylon hegwangpei ba gage cide kingtie, herakum, nah rapia le peu dida.’37Pielo, Ih a lunghop, rata nah a deiga le penuide gwa gi kedi nam leune gade penuide ngngwa hekwa dai di zieda. Ih penuide peu kwak eh lunghlu kerane heni aide gage ngngwa gwang dai beu lauda.38Iciulude penui a mina dizie, nah Ih penui Tinggwang dizie. 39Ih penuide lung ge nah lampui ge tingnai ramsangne acu rüt kerane peu zie iciu eh cide penui ziemne nah penui cai penui leuhme ziemne de yilu kerane.40Pecai Ih madauge de penui da makeyi tei kera gade nreu tet di kelak ne Ih penui dage kelungta samkak ge tei zie. Ih penui mlung ga peu acu rüt kera teigai zie, iciu eh penui a dade madauge de nreu tetti kelakne. 41Pecai Ih penui dage makeyi tei kegaine a sui yizie. Ih a mlung pelane nah a teilung pelane teu eh penuide hangdeu aide ga samsang eh linggai zie.42Kedanemene RAMPAUBE aide rangla, ‘Mina aidungde dage kengkap kehung aide teugwang kegai nzwa, iciu eh penui dage Ih makeyidung teibeu zie lie rang kegaidung de Ih penui reuga teugwang beu zie.43Pecai hangdeu aide ga luhdung de lui luzie, nang pe ha rang kebam de, “Hangdeu aide kesia deu ge, mina nah makaune ge de kegah deu ge. Babylonme ba gage cide peu dida.”44Aide RAMPAUBE ne ndugai, Penui rangkanggeu le luhdung lui zie nah ngkui pwa kebam laisiu gage rau zie. Penui zierangmedung de Benjamin deu gage hekwalu zie, Jerusalem twagwa kebam ga nah Judah namdidung ga, kideutu deudi namdidung nah kehena deudung ga, nah Negev namdidung ga. Kedanemene Ih penui mabamdung keugwang dai beu zielu.’”
Bridge Connectivity Solutions Pvt. Ltd.