Jeremiah31
1“Cipau tingdau—aide RAMPAUBE ne ndugai—Ih Israel leuhme Tinggwang zie, nah penui a minadung zie.”2RAMPAUBE ainzwa rangzeu, “Kingtie gade ring kelumedung hetaideu ga ziuyi ngau luda; Ih tetpet eh Israel de kemtak peuzie.”3RAMPAUBE ndaa a da gwang eh ainzwa ranggai, “Israel, Ih ncu penli kegah keku teu hunglie. Cine Ih ncu kesamsang samkak teu eh ataiga ngngwa gwanglu.4Ih ncu teucuh daibeu zie cinzwa eh nang ngkieng luzie, kemci Israel. Nang tambourindung pwa dai luzie nah suiyi limdung lim dizie.5Nnui Samaria lamlwatudung gage kubebangdung ling daizie; hetaketamedung ling zie nah petsi de keu heta keyige tei luzie.6Kedanemene tingbazie ge gwang zie Ephraim lamlwatudung kekwamedung sah kera, ‘Cuhlu, anui Zion ga hang cugo RAMPAUBE anui Tinggwang da.’7Kedanemene RAMPAUBE aide rangla, “Nnui suiyi eh Jacob reu gage sah gailu! Heleuhdung kakde ditube ziemne suiyi sah gailu! Peu ketwa de siugai. Ranglu, ‘RAMPAUBE pe minadung de kelibeu da, bangh kebam Israelme de.’8Pielo, Ih a minadung de tingtünle deudung gade ngngwa gwang zie. Ih penuide kideu deitu ga dungde hekwa luzie. Miakcitme na pisiame penui kakga la zie; tetlak puidung nah mna lai eh kebam puidung penui da lazie. Hemaa kedi ge aika cailigwang zie.9Penui hap eh gwang zie; Ih penui puisau tei zie penui kie kecu dau. Ih penuide reuceunadung taiga lampui kemzui ga peu tet zie. Cika penui kau dilak, kedanemene Ih Israel pei tei zielu, nah Ephraim a neraibe zie.” 10“RAMPAUBE sam kingneilu, heleuhdung. Duididung kemdei ga paulia lo. Nnui heleuhdung ainzwa ranglo, ‘Israel de teizangra kedibe pecu teu hekwa nah kwabam, meurün kekwame ge pe meurün de kwa kela nzwa.’11Kedanemene RAMPAUBE Jacob de lung mpet beu dida nah pe ziemne ngkieng zu kecu ba gade pecu keli luda.12Pecai penui suiyi eh Zion deutudung ga gwang zie. Penui zudung RAMPAUBE keyi dene baa luzie, mei nah zau keheci reuga, maca nah meurünnadung nah hekaunedung reuga. Kedanemene penui teilung au hegurie dui hetau kelubedung nzwa zie, nah penui madauge de penui suisia dailak.13Pecai relei kemcime penui suiyi eh helimlim zie, nah hecing hena ngngwa ket tei zie. Kedanemene Ih penui kehap de tei kedi pwa suiyi tei beuzie. Ih penuide ngaunggia zie nah peu penui suiyi luzie penui sui sia di mene.14Pecai Ih taktyei yitube pwa cingkume teilung kepui tei beuzie. A minadung a keyi le penuide teipui luzie—aide RAMPAUBE ne ndugai.”15RAMPAUBE aide ranggai, “Ramah gade makwa ge siu, helung sia nah hapsüt kecu kwa. Cide Rachel pe name ziemne hap bam. Pa penui ziemne pelung relui tadi, kedanemene penui lunghbam me de kecu ziemne.”16RAMPAUBE aide ranggai, “Nang kehap gade n kwa nah n miak gade miakduidung kezeulu; n ta ziemne ziehi ge bam—aide RAMPAUBE ne ndugai—n name ngauraume deu gade cailigwang zie. 17N caiha ziemne keregui bam—aide RAMPAUBE ne ndugai—n leuhmedung penui herai lung le cailigwang luzie.”18“Ephraim ainzwa eh pe suisiet rang kebam Ih siu da, ‘Nang acu saja peu, nah hetumna cenlu kemakbe de nzwa acu saja peu. Acu ngngwa cailigwang beulo nah acu ngngwa cailigwang luzie, kedanemene nang RAMPAUBE a Tinggwang lu.19Kedanemene Ih n da nreu gwang dai kelu cai, Ih a sui sia di; acu cen kelu cai, Ih a mnie hepeu gai. Ih ngngam nah hengam teidi, kedanemene Ih henadau mau pung kebam de ziemne.’20Ephraim pemi kehung a na meni? Ih hung kela, a suiyi napei meni? Kedanemene Ih pedage a rata sam rang kegai dau liede, Ih pecu qu eh nsung bamla. Ainzwa eh a nlung pecu regui la. Ih pecu ngaunggia beu zie—aide RAMPAUBE ne ndugai.”21Nkatei nziemne lampuiki rehi teilwe kailu. Nkatei nziemne puisau tsingdung sum gailu. Lampui kenzuibe cetlu, nang tet kera lampui de, Cailigwanglu, Israelme! N namdidung ga cailigwang dailu.22Daitie ge nang suisa laino, kenlum kegah napoi? Kedanemene RAMPAUBE kideu ga makeheci ge teigai da—mipui gene mipei kengkieng gede gum kebam.23Tinggim reugwame reu RAMPAUBE, Israel Tinggwang, aide rangla, “Ih minadung de penui deu ga ngngwa cailigwang kecudau, Judah deu gade nah pe namdidung gade penui ainzwa rang zie, ‘RAMPAUBE de peu ncu samlam beu, pa lungh kebam nang kemzui ni , nang kemci lamlwa.’24Kedanemene Judah nah pe namdidung peciakne cika lungh ncüt zie, hetaketamedung nah makaune hau de ngngwa kepetmedung de si eh.25Kedanemene Ih leu kelame de peu sak zie, nah mnei kelame de teipui beuzie.” 26Pecai Ih mrak di, nah Ih zip kegai ziemne acu teimcang kebeu Ih cilu.27“Pielo, tingbaziedung gwang lada—aide RAMPAUBE ne ndugai—Ih Israel nah Judah kidung ga mina nah makaune namedung le tei pui luzie.28Gwang kedi lebie, Ih penuide ncet eh bam penuide pai mpet nah teukau, kelien gi, ngkapdi nah tei rezam di kerane. Dede gwang dai kela tingbaziedung ga, Ih penui ma pie luzie, penuide teucuh beu nah lingbeu kerane—aide RAMPAUBE ne ndugai.29Cipau tingdau migede ainzwa rangsi lak, ‘Mipeidung kubetsi kehiadung tyeilu, dede hename gei rehimdi.’30Kedanemene mikeheibede pekatei pemau ziemne tsai zie; nah mina keheibede kubetsi kehia ketyeime, pe gei rehim zie.31Pielo, tingbaziedung gwang lada—aide RAMPAUBE ne ndugai—Ih Israelme nah Judahme de ngngwasamkak keheci ge tei kera. 32Cide Ih penui paumedungba teu lu ehEgyptme deu gade ngngwa mpet kecu samkak de nzwa lak,kedanemene penui a samkak de teipang dida,Ih penui dade mi nahpei ge nzwa liede—aide RAMPAUBE ne ndugai.33Tingbazie aidungde caisamkak aideIh Israelme de ngngwa tei luzie—aide RAMPAUBE ne ndugai.Ih agu hezai aide penui lung gage kaibeu zie nahpenui nlung gage raugai zie,kedanemene Ih penui Tinggwang zie,nah penui a minadung zie. 34Iciu eh mi keheibede pe kidabe de ledeu si lakta,mede mige pe sinabe de ainzwa eh rang lakta, ‘RAMPAUBE de cilu!’Kedanemene penui pelane acu ci luzie,penui kakgade ceutu gade gwang ditu kecang—aide RAMPAUBE ne ndugai—kedanemene Ih penui mau gibeu zienah penui maudung nsung si lakta.” 35RAMPAUBE aide rangla,pane tingna tingnaimiak de peu baa kera teigainah hekei nah hegidung de tingmui baa kera.Pa duicuidung de peu nra keranejaaidi tei nswak gaila—Pezi au tinggim reugwame reu RAMPAUBE.36Aide RAMPAUBE ne ndugai, “Magade kelungta bammui kela ma aidungde a dwa gade gah dicai, Israel namedung a dwa gade heleuh ge teikela de kelungta mtak di zieni.”37RAMPAUBE aide rangla, “Magade tinggim cehutu de mdet lu liecai, nah magade hangdeu bangdwadung peilu di liecai, penui tei kegaidung pelane ziemne Ih Israel namedung de mlaidi zieni—aide RAMPAUBE ne ndugai.”38Aide RAMPAUBE ne ndugai, “Pielo, tingbaziedung gwang lada, Hananel reketbam lütle de Kimiak Rieki kecang ga, Jerusalem namdi de a ziemne retak dai luzie.39Iciu eh kemdet ria de kemdei ga miecang dai zie, Gareb deutu nah Goah twagwa pung kebam ga.40Hangdeu langkam pelane ketsai paaudung nah mimangbüt kebam, nah luhdung pelane Kidron deu ga pet eh tingnaimiak kepetle Hekwen Kirie kecang ga, RAMPAUBE ziemne keu ntsam luzie. Namdi de madaude tei msia nah ngkap dai dilak.”
Bridge Connectivity Solutions Pvt. Ltd.