Jeremiah33
1Pecai Jeremiah da pia kenabe RAMPAUBE sam gwang, pa kekwame kigu ga bam reu kecudau, aiciu rang eh,2“RAMPAUBE, dam kegaibe ainzwa rang lie— RAMPAUBE,kideu tei lwe pebam ga kai kelube—Pezi au RAMPAUBE,3‘Acu qu gailu, iciulude Ih nnui sam kelibeu zie. Ih nnui dage ma kedi nah nnui cikemak miswakegah teilia gaizie.’4Kedanemene RAMPAUBE, Israel Tinggwang ainzwa rang au, namdi aide ga kebam kidung, Judah gwangpei kidung nah lampuidung kingtie le gwa lüt kecudau teimsia kedidung ziemne ranggai,5‘Babylonme regi kera gwang lada nah Ih a lunghop nah a rata le teitset kedi mina ketsaipaau dele ki puidi kerane, Ih a zu namdi aide dade penui kesia ziemne hebai dida.6Dede pielo, Ih teikemmi nah tei hemi lu kela keugwang beu lauda, kedanemene Ih penuide tei ngkei beuzie nah penuide kepui kenlim, lungciep, nah kesamsang teugwang beuzie.7Kedanemene Judah nah Israel gu mabamdung keugwang dai beuzie; Ih penuide kerai dau tei kegai nzwa teigai dai beuzie.8Pecai penui a dage makesia tei kegaidung nah acu renia kecudung gade penuide teimci beuzie. A dage makesia tei kegaidung de, nah acu renia gwang kecu leune gade Ih penui mau gibeu zie.9Kedanemene Jerusalem namdi aide a sui keyi ge dizie lu, ketwa lei ge nah Ih makeyi teibeu kera leune siu keludau kideu heleuh leunedung ziemne herüt ge zie. Pecai penui ngngi nah mbeu dizie Ih penuide makeyidung nah lungciep peu lai eh kebam de ziemne.’10RAMPAUBE aide rangla, ‘Nang cu rang kebam heni aide ga, “Aide au mrwa dida, mina nah makaune bam kemak heni ge,” Judah namdidung ga, nah Jerusalem puididung au mina nah makaune bam mene mrwa kebamdung ga, cika siu dai luzie,11misui yisüt kecu kwa nah suiyi kwa, hemeupei kwa nah hemeupui kwa, RAMPAUBE ki gage ketwa recadung teu kegwangdau rang kegai kwadung, “Tinggim reugwame reu RAMPAUBE de hetwa peulo, kedanemene RAMPAUBE au yi kecune nah nlidi la kemak pe keku bam muila!” Ih kideube mahei de ndaa kebam nzwa tei dai beuzie,’ RAMPAUBE ainzwa ranggai.12Tinggim reugwame reu RAMPAUBE aide ranggai: ‘Mrwa kebam heni aide ga, cu au aika mina nah makaune gah—pe namdi leune ga meurün kekwame pe kaune de peu mtak nah tyei kerane tsehei bam dai luzie.13Deudi hangdeutu ga kebam namdidung, hedeu kehenadung, nah Negev ga , Benjamin deu ga nah Jerusalem ga twagwa kebam, nah Judah namdidung ga, hekaunedung penuide pei kebambe ba kangga tet dai zie,’ RAMPAUBE ainzwa eh ranggai.14‘Pielo! Tingbaziedung gwang lada—aide RAMPAUBE ne ndugai—Ih Israel leuhme nah Judah leuhme dage a sam pet kegaide teicang beu kerade.15Cipau tingbaziedung nah cipau tingdau Ih kesamsang leuhme ge David ziemne lungpet beu kera teibeu zie, nah pa kemzuibe nah kesamsang penui deu ga teugwang zie. 16Cipau tingdau Judah de kelibeu zie, nah Jerusalem kwak eh lunghbam luzie, kedanemene pecu ainzwa eh qu zie, “RAMPAUBE au anui gu kesamsang be.”’17Kedanemene RAMPAUBE aide rangla: ‘David leuhme gade Israelme hegwangbam ga bam kera madauge de gah dilak,18mede Levi leuhme gade cingkume a dwaga keru ratak teigai kera gah dilak, taktyei recadung ru kera, nah mei recadung teibeu mui kera.’”19RAMPAUBE sam Jeremiah da ainzwa rang gwang,20“RAMPAUBE ainzwa rangzeu: ‘Magade nang a samkak de tingmui tingba de le teipang di lubui cai, iciu eh petingsiak dau tingmui tingba tei ta dicai,21iciucai nang a kilabe David da a samkak kelude teipang di lubui, iciu eh pe hegwangbam ga bam kera pe na bam ta dizie, nah a kilamedung, Levi leuhme gade cingkume da a samkak kelude.22Tingkam ga hegi peicang gai kelak nzwa, nah hereukung ga heciang mdet gai kelak nzwa, cinzwa Ih a kilabe David leuhme de tei ngkiee beuzie nah a gwa tei kela Levime de.’”23RAMPAUBE sam Jeremiah da gwang eh ranggai,24“Penui rang ndu lia kegaide nang cet mning pie gai meni penui aide rang ndu kegaidau, ‘RAMPAUBE ne kedet kelu kelak kena Israel penai Judah, cu au pa ci kena de mlai dide meni’? Penui miakdwa gade au penui au heleuhme ge medelie de ainzwa eh penui a mina de ngkaudi.25Ih, RAMPAUBE, aide rangla, ‘Tingmui tingba gu samkak de Ih teilu mecai, nah magade Ih tinggim nah kideu gu hezai teibeu lu mereu cai,26iciucai Ih Jacob leuhme nah David a kilabe de gidi zie, nah Abraham, Isaac, nah Jacob leuhme reu hegwang teigwang kera penui leuhme gade peu pet tadi zie. Kedanemene Ih peu penuide lungyi dai luzie nah penuide ngaunggia beu zie.’”
Bridge Connectivity Solutions Pvt. Ltd.