Jeremiah25
1Aipau sam de Judah ga minadung pelane ziemne Jeremiah da gwang. Judah gwangpei, Josiah napei Jehoiakim hegwang tei kelu mmi pe mdai bekum dau gwang. Cide au Babylon gwangpei, Nebuchadnezzar hegwang tei kelu mmi raitu bekum.2Caihakecibe Jeremiah aide Judah ga minadung pelane dage nah Jerusalem ga kelungh leu dage ranglia beu.3Pa ranggai, “Mmi ngkaiehkecum ge, Judah gwangpei Amon napei Josiah hegwang tei kelu mmi kereiehkecum gade gwang cu kecang, RAMPAUBE samdung a da gwang bam nah Ih n dage rang lwe rangdai gai, dede nang kingnei ma.4RAMPAUBE pe kilamedung caihakecimedung pelane de n dage lang lwe lang daigai, dede nang kingnei ma mede kette n lung kai ma.5Aipau caihakecimedung ranggai, ‘Peu mige ge kecude pe kesia lampui gade nreu dilu nah pa tei keladung kesia gade nah ndaa tingdau RAMPAUBE ne nnui paumedung nah nnuide hangdeu pwa kepeu deu de ga lungh la lu kerane.6Cine keda rabedung dage tetgai eh cidungde reca diso mede cidungde dage keumie so, nah n bata de le pe rata tei so iciu eh pa ncu tei rezam di melu kerane.’7Dede nang a kwa kingnei ma, aide RAMPAUBE ne ndugai, iciu eh ncu tei rezam kera nang n ba le tei kelu mamiedung reca eh a rata teigai.8Cine Tinggim reugwame reu RAMPAUBE aide ranggai, ‘Kedanemene nang a samdung kingnei kemakne,9pielo, Ih ne peu tingtünle ga minadung pelane de gwang mbau kera aja ge lang mpet gai lai eh bam dida, aide RAMPAUBE ne ndugai, Babylon gwangpei a kilabe Nebuchadnezzar dage, nah penuide ngngwa gwang aipau deu de nah cika kelunghmedung de renia zie, nah ncu twagwa kebam heleuhdung pelane de renia zie. Kedanemene tei ngkap kera ziemne Ih penuide nzi dizie. Ih penuide peu kehing ge tei dizie, mine rang kemsia ge tei zie, nah penli kegah kemta kemrwa ge tei dizie.10Ih suiyi kwa de nah misui keyi kwa de, nah hemeupei kwa nah hemeupui kwa de, keniaktsu kwa de nah mitaubung kebaa de tei mtak dizie.11Pecai aipau deu pelane ngkap dizie nah kehing ge dizie, Jewmedung nah heleuh kedadung de mmi riakhena ge Babylon gwangpei gwa tei dizie.12Pecai tuiteu kedi mmi riakhena cang dide, Ih Babylon gwangpei nah cipau heleuh de, Chaldeamedung de penui mau ziemne saja peu zie, nah Ih Babylonme deudi de kelunghta kemta ge tei dizie, aide RAMPAUBE ndugai,13Pecai Ih rang kegai samdung leune gade cipau deu de de mmau zie, nah Jeremiah heleuhdung leune dage mmau eh caihasam rang kebeu aipau laisiukwak ga rau teu kela leune tei gwang zie.14Heleuh kedadung nah hegwang kedidung Babylonme de pwa penui baang tei zie. Penui tei kegai ziemne nah penui batadung ziemne Ih penuide saja peu zie.’”15Kedanemene RAMPAUBE, Israel Tinggwang, a dage aide ranggai, “Aipau lunghop zau piak de a ba gade keu dilu nah Ih heleuhdung n dage lang kegai leune de peu saklu. 16Penui sak lude nlia tiatia dizie, nah Ih penui kak gage kingtie lang kegai dwa gade penui ratasüt eh sah dizie.”17Cine Ih RAMPAUBE ba gade hepiak cide keulu delwe RAMPAUBE a dage lang kegai heleuh pelane de peu saklu:18Jerusalem nah Judah namdi pelane nah pe gwangdung nah muiteume de, penuide kengkap nah ngaukehing ge, nah mine ngau kerau nah reset ge teidi kerane, henai kecang ciciu kela nzwa.19Keda leuhdung liede cide sak maisia: Egypt gwangpei Pharaoh nah pe kilamedung, pe kangga kedimedung nah pe minadung pelane;20heleuh ketsamtsam pelane, nah Uz deu ga hegwangdung pelane; Philistia deu ga hegwangdung pelane, Ashkelon, Gaza, Ekron, nah Ashdod ga bangh kelume;21Edom nah Moab nah Ammonmedung.22Tyre nah Sidon gwangpeidung, jaadi keda lebie duikung deu pelane hegwangpeidung,23Dedan, Tema, nah Buz namdidung si eh penui peu pembie ga penui tam biet kedimedung pelane de cide sak maisia.24Arabia ga hegwangdung pelane nah heleuh ketsamtsam gwangdung pelane hetaideu ga kelunghmedung;25Zimri, nah Elam, nah Medes ga hegwangdung pelane;26Tingtünle gwangdung pelane, kennamedung nah kemdeimedung, keheibe de pe sinabe de si eh nah hangdeu reu pelane ga kebam kideu gwangramdung pelane RAMPAUBE ba gade hepiak cide sak maisia. Kamtube, Babylon gwangpei liede cipau piak de gade sak zie.27RAMPAUBE a da ranggai, “Cu nang penui dage rang maisia da, ‘Tinggim reugwame reu RAMPAUBE, Israel Tinggwang, ainzwa rangbeu: Mie di kemaktane saklu, delwe nrui dilu, kau mie dilu, nah Ih nnui kakga lang kegai kingtie dwa gade cuhdai ta dilu.’28Pecai magade penui n ba gade hepiak keu lwe sak mei dicai, nang penui dage rang zie, ‘Tinggim reugwame reu RAMPAUBE ainzwa rangbeu: Nang cide sak bi maisia.29Kedanemene pielo, a zi gade qu kelu Jerusalem namdi de tei ngkapdi lai eh bam dida, nah nang ncu saja kepeu gade mpetlu zieni? Ncu lung mpet beulak, Kedanemene Ih hangdeu ga kelungh leune de renia kerane kingtie gede qu bam dida! aide Tinggim reugwame reu RAMPAUBE ne ndugai.’30Nang caihasam aidung pelane penuide renia eh rangbeu maisia, nah penui dage ranglo, ‘RAMPAUBE au kecehudung gade mrung gai zie nah pa kemci bam gade sahbak gaizie, pa pe maame de renia mrung süt gaizie; nah pa kubetsidung niak kecumedung nzwa sah gaizie, kideu ga kelungh leune de renia cuh eh.31Pe tutiak kwa kideu penli kecang siu dizie, kedanemene RAMPAUBE heleuhdung de renia eh mmau kecune, nah pa mileune reu gage tutiak teugwang kebamne, nah pa kesiamedung de kingtie le teitset dizie, aide RAMPAUBE ne ndugai.’32Tinggim reugwame reu RAMPAUBE aide rang bam, ‘Pielo, heleuh ge cai heleuh ge ga kengkap petla dida, nah rahang kedi ge kideu mdeitube bamdung gade ndeu cuh dida.33Pecai cipaunai RAMPAUBE ne teitset kedimedung kideu penli ket gade keda le kecang zie; penui ziemne hap lak, hekwa lak, nah kung de dilak. Penui au hangdeu ga heteu ge nzwa zie.34Haplo, meurün kekwamedung, nah kengha kie eh sah gailo! Rebui ga nlaklu, nnui meurün hau muiteumedung, kedanemene nnuide gitset kera tingba gwang bam di delu; nnui au li yisüt cuge nhai mie eh pang di kela nzwa nnuide teizang dizie.35Meurün kekwamedung ziemne nsiu kera kette gah, meurün hau muiteumedung paklu kera kette bam lak.36Meurün kekwamedung nah meurün hau muiteumedung hap kebam kwadung kingnei gailo, kedanemene RAMPAUBE penui taktyei bamdung teimsia bam di kecune.37RAMPAUBE pe ratasüt di kecu ziemne ziune kebam tsehei kendiak bamdung teimsia dizie.38Heri heret hingho ge nzwa, RAMPAUBE pe ki püt dida, kedanemene mide teikeherei kela be rata ziemne penui deu au kehing deu ge dizie, pe rata lunghop de ziemne.’”
Bridge Connectivity Solutions Pvt. Ltd.