Jeremiah24
1RAMPAUBE acu mage keulia gai. Ainie, tangzüttsidung marak kena ge RAMPAUBE kerecaki dwa gage kai pwabam. (Babylon gwangpei Nebuchadnezzar ne Judah gwangpei Jehoiakim napei Jehoiachin, Judah ga kedimedung, peba ciem keyi teu mata keteimedung nah hegeu ta keteimedung de Jerusalem gade tuiteu tet kedi cai nah penuide Babylon ga ngngwa gwang kelu cai ne aipau marengei de ngau.)2Raptui ket ga tangzüttsidung kebamdung de au yisüt, tangzüttsidung meu raitubedung nzwa, dede keda raptui ga kebam tangzüttsidung au timdi eh cidung tyei dau gai kelak teidi.3RAMPAUBE acu keteu, “Nang dai pai ngau no, Jeremiah?” Ih keligai, “Tangzüttsidung. Tangzüttsidung yisüt cudung nah tangzüttsidung timdi eh tyei dau gai kelakdung.”4Ge RAMPAUBE sam ada gwang, rang eh,5“RAMPAUBE, Israel Tinggwang, aide rangla: Ih Judah gade langgi kedimedung de penui ziuyi ziemne pie zie, aipau keyi tangzüttsidung nzwa, langgi kedimedung de Ih ne aipau bam gade Chaldea deu gage lang mpet kedimedung.6Peu yilu kera ziemne Ih penuide piebam zie nah penuide aipau deu gage kai dai beuzie. Ih penuide teu cuh beuzie, nah penuide tei ngkau dilak. Ih ne penuide linggai zie, nah penuide pai mpet dilak.7Pecai Ih ne penuide peu acu cilu kera mlung peu zie, kedanemene Ih au RAMPAUBE lu. Penui au a mina zie nah Ih au penui Tinggwang zie, cine penui penui mlung pekiene teu a da nreu gwang zie.8Dede tangzüttsidung timdi eh tyei dau lak kecudung nzwa, ma aide au RAMPAUBE ne rang bam, Ih aide siakte Judah gwangpei, Zedekiah dage, pe gu kedimedung dage, nah Jerusalemme aipau Judah deuceu ga kebamme mede Egypt deu ga bam di kera kedimedung da mie aide nzwa Ih tei gai zie.9Ih ne penuide ma kehing gage teu nreu gai zie, kengkap gage, kideu ga hegwangramdung pelane miakngau gade, tei hengam kecu ge nah mina penuide rangmsia zie, mina ne penuide kega zie, nah Ih ne penuide ngngwa kegwang leune ga penuide reset zie.10Ih ne kingtie, herakum, nah mateei penuide renia eh lang mpet gai zie, Ih ne penuide nah penui paumedung de kepeu deu gade penuide tei ngkapdi kemaktane.”
Bridge Connectivity Solutions Pvt. Ltd.