Jeremiah26
1Josiah napei Jehoiakim hegwang tei kerai dau, RAMPAUBE sam pe da ainzwa rang gwang2“RAMPAUBE rangzeu: A ki kigu ga saplu delwe Judah namdi ga pelane caudung a kiga reca kera gwang bi penui dage rang ndu gailo. Ih ncu ranglo aja kai kebeu pelane rangbeu lulo. Sam kette dang mdui diso!3Cinzwa eh penui samlia de kingnei beu de cilak, ciulude penui kesia lampuidung gade nreu lu kerane, ciciu lucai penui kesia tadung ziemne Ih penui dage kekap teu gwang kera riem pwa kelade nreu daidi luzie.4Cine nang penuida rangbeu bi maisia: ‘RAMPAUBE aide rangzeu: magade nnui a kwa kingnei lu mecai nah Ih hezaidung nnui dwaga kai kebeu ga tetlu mecai,5magade a kilame caihakecime de Ih nnui dage langgai jüja kebamme de samdung kingnei lucai, dede nnui kingnei luma!6Nnui iciu la liecai Ih Shiloh nam teingkap kedi nzwa Ih Kerecaki aide teingkap dizie; Ih Jerusalem namdi aide kideu ga heleuhdung pelane miakngau gade peu reset ge tei dizie.’”7Cingkumedung, caihakecimedung, nah mina pelane, RAMPAUBE ki gade Jeremiah sam aide rang ndu kebam de siulu.8Ciu eh Jeremiah RAMPAUBE ne mina pelane dage rang beulo aja kai kebeu pelane ndu cang dige, cingkumedung, caihakecimedung, nah mina pelane pecu tui lwe sahbak gai, “Nang tsai bi zieda!9Nang daitei RAMPAUBE zi teu caihakeci sam rang no nah aipau ki de Shiloh nzwa dizie nah namdi aide ngkap dizie, migede aika lungh lak liede rang no?” Cine RAMPAUBE kiga mina pelane mbau lwe Jeremiah de mcau di.10Cipau cai Judah muiteumedung sam aidungde siulu eh penui hegwangpei ki gade RAMPAUBE kiga tet nghang. Penui RAMPAUBE Kerecaki Kirieki Keheci lie qu kela lampui ga ntumlu.11Cingkumedung nah caihakecimedung gwang muiteumedung nah mina pelane de ngngwa resiu. Penui ainzwa ranggai, “Aipau pei de au tsai kera petau lie, kedanemene pa cairasam rang eh aipau namdi de mmau kecune, nnui kwenle siu kelu nzwa!”12Cine Jeremiah muiteumedung pelane nah mina pelane dade, nnui siu kelu samdung pelane “RAMPAUBE ne aipau ki de nah namdi de mmau kera cairasam rang beulo acu langgai lie.13Cine cu au, nnui zaidung nah nnui tei kebamdung de yi reureu maisia da nah nnui RAMPAUBE nnui Tinggwang kwa kingneilu ciulude pa nnui dage kekapdung kai dizie lie kebam de mtak luzie.14Acu au pielo! Ih au nnui ba ga bamda. Nnui dwa gade dai teide yi zie bi nah petau zie bi a dage teigai lulo.15Dede nnui ci bi maisia, magade acu teitset dicai, nnuikatei nnui dage nah aipau namdi de ga nah mina lungh kebammedung dage kemau kegah jai ge teugwang lada, kedanemene RAMPAUBE ne kesang gade aipau samdung pelane nnui kwendung gage rang ndu gai kera acu nnui dage langgai.”16Pecai muiteumedung nah mina pelane cingkume nah caihakecime dade, “Aipau peide tsai kera petau ma, kedanemene pa RAMPAUBE anui Tinggwang zi gade anui dage ma aidungde ndu gai kecune.”17Pecai deudi hangkiamedung cuhlu nah mina ngkwa kebam pelane dade resiu.18Penui ainzwa ranggai, “Judah hegwangpei Hezekiah tingdau Morashetme pei Micah cairasam rang bamla. Pa Judahme pelane de ainzwa ranggai, ‘Tinggim reugwame reu RAMPAUBE aizwa rangzeu: Zion au luh pu kedi ge nzwa dizie, Jerusalem kehera kebau kelu ge nzwa dizie nah kerecaki gu kideutu de hegung ge dizie.’ 19“Aide rang kegaine Judah gwangpei Hezekiah nah minadung pecu teitset dini? Penui dage kengkap gwang kera ndu kegaide peu gwang cang di melu kerane Hezekiah, RAMPAUBE de rüt eh pe nggia kiegai meluini? Anui anui katei anui teilung gage kemau kedi aikenzwa ge teigai zie ni?”20Cipau tingdau RAMPAUBE zi gade mi kedage cairasam rang eh la, Shemaiah napei Uriah, Kiriath Jearim namdi gade, Jeremiah samdung pelane kesuisam eh pa aipau namdi nah aipau deu de ziemne cairasam rang.21Dede hegwangpei Jehoiakim nah pe reugwamedung pelane nah kedimedung pe sam siu luge, hegwangpei pecu teitsetdi kera tei, dede Uriah cide siulu nah ngngi di, cine pa pakdi nah Egypt ga tet gaidi.22Cipau cai hegwangpei Jehoiakim Uriah de tui kera, Akbor napei Elnathan nah mi kedadung de Egypt gage langgai.23Penui Egypt gade Uriah de ngngwa mpetlu nah pecu hegwangpei Jehoiakim da ngngwa gwanglu. Ciu eh Jehoiakim kingtie le pecu teitsetdi nah pe paau mi kenlangme kemakme heraukie gage lang mpet gaidi.24Dede Shaphan napei Ahikam be au Jeremiah da la, cine pecu au teitsetdi kera mina dage peu dima.
Bridge Connectivity Solutions Pvt. Ltd.