Isaiah9
1Keherei kebam penui dade suisiet keugi dizie.Kerai tingdau ge pa Zebulun nah Naphtali leuh kena deu dahengam kai gai,dede pecai pa kendu teugwang beuzie, lampui tet kegai jaaidi le kecang, Jordan kung kemdei ga kecang, Galilee deudidung dage.2Minadung kemui ga tet kelame kebaa kedi ngaulu;ketsai tingkaumie deu ga lungh kela leu, penui reu ga kebaa taubaa dida.3Nang penui deudidung tei ngkiee beu da; nang penui suiyi tei ngkiee beu.N dwa gade penui suiyi bam dida meitsi luhlüt kecu tingdau nzwa,mede minadung hema tuih kelube nzi kecu dau penui suiyi kela nzwa.4Kedanemene pe ngwanggai pwet kerüt de, pe hekeutu ga heking pwa kebam pak de,pe suisiet tei kela geutie de, nang tei pang takcai dida, Midian de teipang takcai kedi benai nzwa.5Kedanemene reugwame picum hereu ga tet kedi leune denah paini niadung hejai lwa kedi leuneru dizie, miheu ziemne maca ge tei eh.6Kedanemene anui da henana ge lungh gwang beu da, anuide mipeina ge kaibeu da;nah hegwang pane punggwang zie;nah pezi Miswakegah Puisaube,Kengking Tinggwang, Kelunghta Peibe,Kezuyi Gwangna lie eh quzie.7Pe hegwang deu direu reu zie nah kezuyi cika penli bamlak,pa David kedi bam, nah pe hegwang ram reu hegwang tei zie,peu kwak lu nah bam tie lu kerane,kesamsang nah kemzeu le cu gade nah kelungta gwang dai kerane.Reugwame reu RAMPAUBE aide teibi zie lie cet eh tei zie. 8Rampaube Jacob de mcau eh sam ge langgai, nah cide Israel leuhme reuga gwangdi.9Mina pelane cilu zie, Ephraimme kecang de nah Samaria ga lungh kebamme dung de, caune hegie nah heliasüt eh rang bi kecu.10“Lidei ru kelu tsukangdung kau dida, dede anui heruikelu tsupang kang le kwa dai dizie; Sycamore bangdung bi ngkau dida, dede anui cipau mding gage cedar bang le kaidai dizie.”11Cine RAMPAUBE Aram gwangpei Rezin de mcau kelame de teu cuh beuzie, pecu renia kelame de, nah pe ngauraume de teu kebwak beuzie,12naimiak kepetle Aramme nah kenlwetle Philistinme. Penui mui ngnga lwe Israel de ngkap dizie.Aidung pelane gade, pe rata nli dima; meliene, peba hetwapet bamreu.13Iciuliede penui au penuide tei keherei kegaibe da nreu gwang lak, mede penui reugwame reu RAMPAUBE de peei lak.14Cine RAMPAUBE Israel dade pepeu nah pemi dang gi dizie, laira kiak nah hekuu, langnaige gage.15Muiteume nah rütlu kebuime de pepeu be da; nah pemi be cai kenret keledeu caihakecime.16Mina aidungde ne caugamme puisau tei bi penui lampui tetmau di la, nah penui sui laka eh cipau lampui ga tet dila.17Cine Rampaube penui name rehangme reuga pe suiyi bam lak mede pe ngaugia pe pei kegahme nah hemipuidung da bam lak,kedanemene mina leune nlumkemak nah kemauta tei la kedine, nah penui mui gade kepet samrang dung au kemang kwadung kecune.Ma aidung pelane tei bam de, perata nghim dima, meliene, peba hetwa pet bam reu.18Mina kesiame miheu gene hetupui nah hetu dungde ngkapdi kelanzwa eh heu bam dida;cide hegung kecok mika mbuitung cuh kebam nzwa heubam dida.19Reugwame reu RAMPAUBE rata gade hangdeu be ruu di da, nah minadung be miheu be ziemne maca ge nzwa di.Migede pe sinabe de de kelilu ma.20Penui taktyei pok zetle bale herak luzie dede nzeu bam zie; penui hile bale taktyei zie dede mnung gai lak.Migege kecu penui katei penui bapum de tyei dizie.21Manasseh ga minadung nah Ephraim ga minadung ketket de gwaketang; nah penai ncütlwe Judah de gwaketang zie.Ma aidung pelane tei bam de, pe rata nhim dima; meliene, RAMPAUBE ba hetwapet bam reu.
Bridge Connectivity Solutions Pvt. Ltd.