Isaiah10
1Co hezaidung petau kemakpe mzai kelame nah rau kelamedung.2Penui kegahme mjeu keu gidi la, a minadung kegahme kwa rega teu dila,hemipuidung nah pe pei kegahme kwa süt teu dila!3Nang kamtube tutiak benai daitei zieno kemdei gade kengkap kegwang dau?Nang cau dade kengha kie kera pak gwang lai, nah nang dai gage n mahei kaidiak lai? 4Magede bam silak, nah nang hebaangme kakga keumiee bwala dizie mede teitset kedime kakga kauzeu dizie.Ma aidung pelane tei bam de, RAMPAUBE rata nhim dima; meliene, pe ba hetwa pet bam reu.5Co Assyriame, a rata tsingpak, a rata geutie Ih ne penui dage kai gai zie.6Ih penuide mcau ngang kela heleuh nah a rata pungsüt kecu minadung de langgai dida.Ih penuide teitset kedime reunia, ma tui keludung keu tetdi lo langgai dida nah penuide puidikidung ga tangnia kedau nzwa dau niak dedi lo eh.7Dede Assyria gwangpei aide tei kera cet ma, mede mning dema.Pe mlung au heleuh kekiee ge de ngkap nah tei takcai di kera ga ladi.8Iciu eh pa hegie eh rang, “A napeimedung pelane hegwangme meni?9Kalno namdi de Carchemish namdi nzwa meni?Hamath namdi de Arpad namdi nzwa meni? Samaria namdi de Damascus namdi nzwa meni?10Ih a bale mamie reca kela gwangramdung de ngam kelu nzwa, Jerusalem nah Samaria gu swade reki kelu mamiedung kieeki kebam gwangramdung de,11Ih Samaria nah penui gu pemi kegah mamiedung dage tei kegai nzwa,Ih Jerusalem nah penui mamiedung dage de tei gai kera nsam meni?”12Rampaube Zion Deutuh nah Jerusalem ga peta teicang di kecudau, Ih saja peu zie Assyria gwangpei pe mlung gade hegie sam kerang nah pe hegie de ziemne.13Kedanemene Assyria gwangpei hegie eh rang,“Ih a kengkieng nah mriak le tei lu dilu. Ih maci bam,nah Ih minadung gu heraidung keu mpet dida. Ih penui mabamdung rega luda,nah hetumseu ge nzwa lungh kebamme de tei ngkap dida.14Ih a ba le, maciep gade nzwa, heleuhdung gu mahei swet luda,nah mige gi kenzeu nruibum kekiee ge hekwa kela nzwa, Ih kideu pelane pwa hekwa lu da.Migede pe hesiu gede siulap ma mede penui mui ngnga dema mede magede tu ma.”15Mreu ge pekatei pecu pempaube swa pa be diki lie helia lubui ni?Tsingget ge pecu pwa matei kelabe swa pabe yiki lie eh pekatei pecu twa lubui ni?Cinzwa cai hegeutie ge ne pecu keu ncuh kebeube de keu ncuh kecu nzwa da, mede tsingpak ge ne migede keu ncuh kera nzwa da.16Ciziemne reugwame reu RAMPAUBE Tinggwang pe reugwame keyime kakge mateei langgai beuzie;nah pe kendu kang gade miheu ge nzwa tau heu bam dizie.17RAMPAUBE, Israelme kebaa de mi mmi dizie, nah Kemci Tinggwang de mitau ge dizie;cide tingnai ge gage hetuu nah hetuu humdung ru nah ngkap dizie.18RAMPAUBE penui gu hegung keyidung nah luh zamdung petsi kekiee builu keladung ngkap dizie, pumtei nah penui rabe de si eh;cide kemrame ge mage de tei lutadi kela ting dau nzwa dizie.19Penui gu tsinggung ga tsingbang kecam nage bang nzeu zie, hename ge ne de cide pei lubui dizie.20Cipaunai, bang kebam Israelme, Jacob kibaume pak kelume, penuide ngam kedime kangga lungh tadi zie, dede Israel gu Kemci RAMPAUBE de ngngei eh lungh dizie.21Bang kelu Jacob kibaume kengking Tinggwang da caili gwang luzie.22Kedanemene Israelme, duidi kungga heciangdung kieege bam de, bang kelu kecam nage rünne cailigwang zie. Makesangme kekie puikenlim peu kela nzwa, kengkap au hezai kai kebeu ge gade gwangla.23Kedanemene reugwame reu RAMPAUBE Tinggwang, pa teizie lie kela kengkap kideu pelane ga teugwang gai lai eh bam dide lu.24Ciziemne reugwame reu RAMPAUBE Tinggwang rang eh cu, “Zion ga kelungh a minadung, Assyriame de hing so. Pa nnuide hegeutie nah pa pe tuitie pwa hwacuh nnuide mcau zie, Egyptme tei kegai nzwa.25Pecu hing so, kedanemene matie mene a rata n da bamsi lak delu, nah a rata ne pe da kengkap teugwang beuzie.”26Pecai reugwame reu RAMPAUBE tsingria ge teu penuide dap zie, Oreb tialwa gade Midiame de ngam kelu dau nzwa. Pa pegu hegeutie duidi reuga hetwa gaizie nah pwa cehu gai zie pa Egypt gade ketei nzwa.27Cipau nai nnui hekeutu gade pe pwet kerüt de lwak luzie nah pe ngwanggai nnui ngwang gade keu mpet dizie, nah ngwanggai de tei msia dizie.28Ngauraume Aiath namdi ga gwang bam didanah Migron nam tet kah dida; Michmash nam gage pe taktyei niadung hekwa gai dida.29Penui gicak de tet kahlu delwe Geba nam ga penui mtaklu.Ramah nam ngngi di nah Saul nam ga Gibeah ga minadung pak tet dida.30Mra gailo, Gallim nam minadung! Kingnei sünne lu, Laishah namdi!Nnui makega Anathoth namceudung!31Madmenah nam au pak tetti au da,nah Gebim nam ga lungh kebammedung kwaklu kerane pakla dida.32Aipaunai paNob nam ga mtak bam zie nah pa pe bazum tuilwe Zion ga minadung lamlwa de, Jerusalem deutu dage kesing gai zie.33Ainie, Rampaube reugwame reu RAMPAUBE tsingbang kiak bitap mie pekwa siu kehing ge teigai zie;tsingbang hutubedung bi ngkau dizie, nah kehube bangdung de de bi hena dizie.34RAMPAUBE mreu gele hegung tsingbangdung bi kau dizie, nah pe kendu gade Lebanon kau dizie.
Bridge Connectivity Solutions Pvt. Ltd.