Ecclesiastes6
1Tingnaimiak kangga kebam makesia ge kebam Ih ngau, nah cide mina reuga pezie rüt delwe bam.2Tinggwang mipei gede mahei, mabam nah herüt pwapeu lubui iciu eh pa pekatei pe ziemne ma gede luu sineu kecu bam kelakne, dede Tinggwang pecu cide teu kehega lu kera ziuyi peu ma. Iciu meliene, mikedame gene pe mabamdung keuteu dila. Aide au mwangzui, kesiabe ge.3Magade mipei ge pe name haige bam nah mmi kekieege lunghlu, iciu eh pe mmi tingbaziedung kiesüt, dede magade pa makeyi lepwa pelung cang luma nah pecu teu kungdi melie cai, ciucai Ih rangla, ngiena tsai eh mna kelube au pe swade yiki.4Ngiena cikenzwa ge au pekie kegah gage mna gai nah kemui gade pa tsai di, nah pezi de ngkim mbai nzeu dila.5Ngiena aide tingnaimiak de ngauma mede magede ci meliede, dede pa au cipau pei de ngaulu kemak kemtak ngaulu.6Magade mige tingkum mmi cangna ge ring eh lunghlu, dede pa makeyidung teu eh kehega cilu meliecai, pa de mileune nzwa tsaidi la.7Mina pelane tyei kerane heta tei la,dede pa pe tyeineu le pwane mnunglu lama.8Kesangsiakpe, kemriakme pei kemiebe dade pekeyi dai bam no?Ma kegahbe pei ziemne pekeyi daige bam nomagade pa kedame dwa gade keyi ciem teici lalie de?9Mimiak dai ngaulu zeubi cide ngau lwe mnung kebambe be yikianui tyei keneube ngaulu neu eh cet kebambe swade,cide liede mwangzui ge nah tingkai gwazui kela kenzwa ge.10Daidung dam pwabam di debi cidungde zi msiak beu dida, nah minadung dainzwa labi cidungde de ci bam dida. Cine tutiak ngkiengtube de ngngwa sia eh renia kebam au kemta ge dida. 11Samdung rang kiee reu ge, pekie kegah kemta kieesi reureu,cine mina ziemne cide pekeyi daige bam no?12Kedanemene mige pe teilung kedui nah kemta tingkaumie ge nzwa tetkah tetdi kela teilung teu keyibe kecu dainzwa cilu laino? Caune minabe de pa tsai kedicai tingnaimiak kangga dai gwang zie bi kecu rangbeu lulai?
Bridge Connectivity Solutions Pvt. Ltd.