1 Kings13
1Tinggwang minabe Judah gade RAMPAUBE sam de ziemne Bethel ga gwanglu. Jeroboam mariem kehengui rugai kera recabam ga sap kebam dau.2Pa recabam de RAMPAUBE sam ziemne mlaidi: “Recabam, recabam! Ainzwa eh RAMPAUBE ranggai, ‘Peilo, David kelak gade mipeina ge pe zi Josiah kecu gede mna luzie, nah, nah nreu gage pa heni kehudung ga cingkume cu n dage marim kehengui rugai kelame de ratak teigai beuzie. N reu gage penui mina radung ru gai zie.’”3Cidau Tinggwang minabe de cipau nai de gage marehi ge peu gai, rang eh, “Aide RAMPAUBE ne kerang marehi de da: ‘Pielo, recabam de pang lamna dizie, nah mimütdung cipau reu ga kebam de rui mpetdi zie.’”4Hegwangpei Tinggwang minabe dai rang bi kecu de siulu ge, pa recabam Bethel ga kebam de sah eh mlai lie kecu de, Jeroboam recabam de gade pe ba hetwa pet eh rangdi, “Pecu tuilu.” Cidau mipeibe dage peba hetwa pet kegai ba de tsaidi, ciu eh pa peda teu caili dailu tadi.5(Recabam de de pang lamna di nah mimangbütdung recabam gade rui mpetdi, Tinggwang minabe RAMPAUBE mrairang kegaide nzwa eh)6Hegwangpei Jeroboam sam keligai delwe Tinggwang minabe de dage rangdi, “Kehereide n RAMPAUBE n Tinggwang nha kiegai beulo delwe a ziemne kekei tei beulo, iciu eh a ba teimmi dailu kerane.” Cine, Tinggwang minabe RAMPAUBE dage kekei teigai, nah hegwangpei ba teihemi daibeu, ndaa yi kebamdau nzwa daidi.7Hegwangpei Tinggwang minabe dage rangdi, “Acu ngngwa kilung ga gwanglu nah ncu tei mcang lu, nah Ih ncu ziehi ge peu zie.”8Tinggwang minabe hegwangpei dage rangdi, “Nang n mabamdung pempie ge acu peu liede, Ih ncu ngngwa tet lak, mede Ih heni aika de matyei mede dui sak lak,9kedanemene RAMPAUBE pe sam gade acu aja kaibeu, ‘Nang tangku gede tyei mede dui de sak lak, mede nang kegwang lampui gade caili dai lak.’”10Cine Tinggwang minabe keda lampui le ge tet gaidi nah pa kegwang lampui gade pe ki Bethel ga gwang dai tadi.11Cu caihakeci kecingme ge Bethel ga lungh bam, nah pe napeidung kak gade hang ge gwang delwe pe dage Tinggwang minabe cipau nai tei kegai ha pelane ranglia. Pe napeidung liede pecu Tinggwang minabe hegwangpei de kempau samdung ranglia.12Penui pei penui dage rangdi, “Daipau lampui gade pa mie di no?” Cu pe napeidung Judah gade Tinggwang minabe tet kedi lampui de ngau da.13Cine pa pe napeidung dage rangdi, “A ziemne gada gage bam kam beu lo.” Cine penui gada ga bam kam gai beu eh pa cipau reu cwa tetdi.14Caihakeci kecingbe de Tinggwang minabe caisui tetdi nah pa mhubang kang ga ntum bam eh ngaulu; delwe pa pe dage rangdi, “Nang Judah gade kegwang Tinggwang minabe deni?” Pa keli eh, “Ih da.”15Cidau caihakeci kecingbe de pe dage rangdi, “Acu ngngwa kilung ga gwang eh matyei lulo.”16Tinggwang minabe keligai, “Ih ncu ngngwa caili mede ncu ngngwa tetlak, mede Ih heni aika de ncu ngngwa taktyei mede dui de saklak,17kedanemene RAMPAUBE pe sam gade acu aja kaigai, ‘Nang cika de matyei mede dui de saklak, mede nang kegwang lampui gade caili dai lak,’” de eh.18Cine caihakeci kecingbe pe dage rangdi, “Ih de nang nzwa caihakecime ge, nah tinggim samgwame RAMPAUBE sam gade acu mpau eh, ranggai, ‘Pecu ncu ngngwa caili n ki ga gwanglu, ciude pa matyei nah dui saklu kerane.’” Dede pa Tinggwang minabe dade nret bam.19Cine Tinggwang minabe caihakeci kecingbe de nggwa pe ki ga cailigwang nah maktyei nah dui saklu.20Penai taktyei bam ga kebam dau, RAMPAUBE sam caihakecibe pecu ngngwa caili kegwangbe da gwang,21nah pa Tinggwang minabe Judah gade kegwangbe dage sahbak eh, ranggai, “RAMPAUBE rangla, ‘Kedanemene nang RAMPAUBE sam mzai kemakne nah RAMPAUBE n Tinggwang aja ncu kepeu de kai mzeu lu kemakne,22dede nang cailigwang RAMPAUBE ncu matyei mede dui sak helo rang kebeu heni gade matyei nah dui sak dida, n paume de kung kenzeu rau de gage n paau peu kung lak.’”23Pa matyei nah sak kelu cai, caihakecibe Tinggwang minabe ziemne gada bam kam gai beu, pecu ngngwa caili kegwangbe de.24Tinggwang minabe tet kedi dau, hingho ge lampui gade pecu dau nah pecu teitsetdi, nah pe paaube lampuiki ga zeu di. Cidau gada be pe tai ga sap bamdi, nah hingho be de pe paau tai ga sap bamdi.25Cidau mina kah gwang nah lampuiki ga pe paau be kebam ngau, nah hingho de pe paau tai ga sap bam, penui namdi be ga gwang delwe caihakeci kecingbe lungh kebambe dage gwang pau lia beu.26Caihakecibe pecu ngngwa lampui gade caili kegwangbe de siulu ge, pa rangdi, “Cide Tinggwang minabe RAMPAUBE sam mzai kemakbe de da. Cine RAMPAUBE hingho dage pecu peugai, pecu teu takcaidi nah pecu teitsetdi, RAMPAUBE sam pecu rang mriak kebeu de nzwa eh.”27Cine caihakeci kecingbe pe napeidung dage ranggai, “A gada bam kam gai,” nah penui kam gaibeu.28Pa mie nah pe paau be lampuiki ga bam eh ngaulu, nah gada nah hingho be pe paau tai ga sap bam. Hingho be pe paau tyei ma, mede gada de gwaketang ma.29Caihakecibe Tinggwang minabe paau de pwalu, gada reu gage kailu, nah pung cailigwanglu. Pa pekatei pe namdi be ga heei eh hap kera gwanglu nah pecu kung kera.30Pa pe paau de pekatei pe rau gage kungdi, nah penui pe reu ga heei eh hap, rang eh, “Ainie, a sinabo!”31Ge pa pecu kung kedi cai, Caihakeci kecingbe de pe napeidung dage marang eh, ranggai, “Ih tsai kedi dau, Tinggwang minabe de kung kenzeu rau gage acu kunglu. A radung pe radung tai gage kam gailu.”32Pa RAMPAUBE aja gade Bethel ga recabam nah Samaria namdidung ga kereca nidung kidung leune de kemmau sam rang kegai de teicang bi zie.33Aipau cai Jeroboam pe kemau lampui gade nreu luma, dede maidakmedung kakde kereca nidung ziemne cingkumedung kedet jüja bamdi. Heta tei keneu leu de pa cingku tei kera kedetlu.34Aipau makie ziemne Jeroboam kelak kemau tei kedine nah pe kelak ngkap di kerane tei nah kideu be gade ngkap zingdi.
Bridge Connectivity Solutions Pvt. Ltd.