1 Kings12
1Rehoboam Shechem ga miedi, kedanemene Israelme pelane Shechem ga pecu peu hegwang tei kerane gwang kelane.2Cidau Nebat napei Jeroboam aide siulu nah pa Egypt ga bam reu kedanemene pa hegwangpei Solomon dwa gade pak kedine. Nah Jeroboam Egypt ga lung kebamne. 3Cine penui langgai nah pecu qugai, Jeroboam nah gwang ngkwa kelu Israelme pelane nah Rehoboam da rangdi,4“N pei ne anui ngwanggai tei rüt beu. Cu n pei ne he püt kerüt anui dage mpüt gai kebeu ngwanggai de tei mca beulo, delwe anui n gwa tei luzie.”5Rehoboam penui dage rangdi, “Tetdi lo lang cum ne ziemne, pecai ada cailigwanglu.” Cine minadung tetdi.6Hegwangpei Rehoboam ndaa pe pei Solomon ring kebam dau pe keledeume kecing peime sui keteu, nah pa rangdi, “Dainzwa peu rangneu lano nnui acu mina aidungde sam keli kera?”7Penui pecu resiu nah rangdi, “Magade nang henai mina aidungde kila tei lucai nah penuide ngha, nah penui da sam keyi teu penui sam kelilu cai, iciude penui n kilame tei lamui zie.”8Dede Rehoboam kecing peime pecu rang kebeu de lumah nah pa mipei hena kecume pecu ngngwa lungcuh kecume nah pecai sapbeu kelame de ngngwa mpaudi.9Pa penui dage rangdi, “Nnui acu dai keledeusam peu lano iciu eh anui minadung a dage, ‘N peine hepüt kerüt anuide mputgai kebeu de teimca beulo?’ de eh rang kelame de samli peulu kerane.”10Rehangmedung Rehoboam de ngngwa lungcuh kecumedung pedage ranggai, “Minadung n pei Solomon penui de hepüt kerüt peu dede nang cide tei ncadi kerabe lie n dade kerangme dage ranglo. Nang penui de ainzwa rangbeu lu, ‘A zurangpui ceutuna de au a pei kia swa diki.11Cu cine, a pei nnui reu gage hepüt kerüt ge kai liede, Ih nnui püt kerüt de gage kaisi beuzie. A pei nnuide tsingria le teikeherei, dede Ih nnuide heruingapuidung le teikeherei zie.’”12Cine Jeroboam nah mina pelane Rehoboam da langcumne benai gwang, hegwangpei ne sam rang kebeu nzwa, “Ada langcum benai cailigwanglu.”13Hegwangpei minadung dade pekwa disüt eh sam keligai nah kecingmedung penui pecu keledeusam kepeu de luu tadi.14Pa penuide resiu rehangmedung ne rangkebeu sam mzui eh; pa rangdi, “A pei ne nnui püt tei rüt beu ngwanggai kerüt le, dede Ih nnui ngwanggai gage kaisi beuzie. A pei nnuide tsingria le teikeherei, dede Ih nnuide heruingapuidung le teikeherei zie.”15Cine hegwangpei minadung sam kingnei tadi, kedanemene cinzwa kecude RAMPAUBE lungning kedine, iciu eh pa pe sam Shilonme pei Ahijah dade Nebat napei Jeroboam dage pa kerang de teicanglu kerane.16Cidau Israelme pelane hegwangpei penui sam kingnei kemak ngau keludau, minadung pesam keli eh rangdi, “Anui liezi David da dai bam no?Anui mapwa Jesse napei da gah da!Nnui paiki ga gwang cu, Israel.Cu n kilung pie gailo, David.”Cine Israel penui paiki ga gwangdi.17Dede Israelme Judah namdidung ga kelunghme ziemne au, Rehoboam penui reu hegwang teilu.18Pecai hegwangpei Rehoboam Adoniram de langgai, kemei tei eh bata tei kebamme reu kebambe, dede Israelme pelane tangtsu le pecu sam tsetdi. Hegwangpei Rehoboam pe bagi gade Jerusalem gage pak kelwa gaidi.19Cine Israelme David leuhme de cu kecang ngngwa regila.20Israelme pelane Jeroboam cailigwang bam delie kecu siulu ge, penui mide langgai eh pecu penui ngkwa kebam gage qugailu delwe pecu peu Israelme pelane reu hegwang teilu. Migede David kilungme cai sui kecu gahdi, Judah leuhme rünne gwale.21Rehoboam Jerusalem ga gwang kelu dau, pa Judah kilungme nah Benjamin leuhme pelane de teu hekwalu; mipei kedet kelume 180,000 cidungde reugwame, Israel kilungme de ngngwa renia kera, hegwangram teingkieng dai kera Solomon napei Rehoboam ziemne.22Dede Tinggwang sam Shemaiah, Tinggwang gu mina da gwang; ainzwa rangdi,23“Solomon napei Rehoboam, Judah gwangpei dage rang beulo, Judah nah Benjamin kilungme pelane de, nah mina keda kebamme de; ranglo,24‘RAMPAUBE aide ranggai: Nnui nnui caireiswacingme Israelmedung de ketang mede ngngwa regi so. Hangge ge de pe ki cailigwang cu, kedanemene aidung de ainzwa kerane Ih ne tei gaida.’” Cine penui RAMPAUBE sam kingnei lu nah caililu delwe penui lampui ga tetdi, nah penui pe sam mzailu.25Pecai Jeroboam Ephraim kideutu deudi gage Shechem teilu, nah cika lunghdi. Pa cika de mpetlu delwe Peniel teilu.26Jeroboam pe lung ga cetlu, “Cu hegwangram David kilung ga cailigwang dizie da.27Magade mina aidungde Jerusalem ga RAMPAUBE kerecaki ga ratakdung teigai kerane hanglu cai, iciucai mina aidungde lung penui mpaube da caili dai dizie, Rehoboam Judahme gwangpei da. Penui acu teitset dizie nah Judahme gwangpei Rehoboam da cailigwang dai dizie.”28Cine Hegwangpei Jeroboam keledeu sam peei nah kecak le hetumna kena teilu; pa minadung dage rangdi, “Nnui ziemne pa süt dizie Jerusalem ga hang kera. Pielo, aidungde nnui rabedung da, Israel, nnuide Egyptme deu gade ngngwa mpet kebeube.”29Pa Bethel gage ket kailu nah kedade be Dan gage.30Cine aipau ta de kemau gedi. Minadung ket mede keda da miedi, Dan deige kecang de.31Jeroboam kereca nidung gage kidung teilu nah pa cingkume de de kedetlu minadung kak gade, Levi leuhme kemakme kak gade.32Jeroboam hengyi ge teleilu kei heset be kei, hekeizie ziangrei mengei benai, Judah ga hengyi kecu de nzwa, nah pa recabam ga nghanglu. Pa Bethel gade cinzwa teigai, hetumna pane teikelu dage ratak tei, nah pa Bethel ga pa tei kelu kereca nidung gage cingkume de kailu.33Jeroboam ziangreiemengei benai kei heset bekei, pa pelung gade riem kelu bekei Bethel ga pa ne tei kelu racabam ga hanglu; pa Israelme ziemne hengyi ge mteigai nah marim kehengui rugai kerane pa recabam ga hanglu.
Bridge Connectivity Solutions Pvt. Ltd.