LUK24
1Nǝ bɛr yi sɔŋ sik, ne amblimble bib, amba anuŋ ne vu wurdi ndi ne ka nau anyak te kɔmɔ ne bɛmɛ.2Ne yik ne ŋli mkpaŋa a gli tibɛ ne bɛmɛ.3Ndi ne yir min bɛme, bane yik ikum kɛ Yesɔ ba.4Ndi ayi ne min kɛ lɛne ne atɔ yi lu Yesɔ, ankyak aneshir amɛ yaa a kɛ kli gbahir bene bɛba, ne su kiki klikla ndi zar ayi ndi ira nas.5Fe sisik vuŋ ba, amba ma ne tar agbarum te ku ati amen ne mimi, aneshire a diba tedi, <<Aye anii duŋ zhin wɔb ner ne vli ne min kɛ abɛ ku?6Yesɔ ba yime ayaŋa ba; ne ka lu! Izhin bǝ shu zhi ne mǝne bla zhin ndi ane yi ben zhin ne Galili:7<Atei nek Izu Neshir asak ne aŋɔk aner abɛ na zumimin, atei kpaŋu ne nkunkun ne bɛr ntar atei kama lu>>>8Fe, akɔ shu lǝlɛ maa azhi.9Ndi ne ŋuro akam are ibǝ me, a bla awur ane zhin abɛ zeu, ben nki aneshire bɔbɔk.10Ne yi Meryamu Magadaliya, bǝn Yuwana, ben Meryamu iyah maa Yakubu, bǝn nki amba abaŋ ndi ne yi ben abɛba, ayi aba ne bla abɛ tsene maa.11Ankyak ba ne tanyɛmɛ ba ne lɛ kɛ amba ma, te lɛ mǝne yi ndi ki sha.12Ne mee, Biturus ne lu, te klu akɔmɔ ne bɛmɛ, te zǝ adɔ te aklɔtɔ mine, ne yik amplɛ anklu akǝŋ ndi ne ku ma aku akur gar zhin, akama kɔmɔ, te zin bla ki sak ŋɔk ne anu ndi ne na.13Ne bǝn zhin yiŋɛ aneshir amɛ yaa atsine kɔmɔ ne ntun yi zhɔ sak maa te Imawus ndi ilak ma yi igab taŋgba rɛ Urshelima.14A zin lɛ ne akpa mɛn ne tu ayi ki yiŋ ndi ne na.15Ayi ne min kɛ lɛ, te zin lɛ ne kpa ne tu ayi ki yiŋɛ, Yesɔ ne tu maa avu aru te atsǝn bene aba;16Ama bane ya zhi te ai Yesɔ ba.17Arib ba tedi, <<Izhin tsǝn lǝlɛ kɛ anii ne kpa min?>> Agbur akli, te akpa ti.18Izhin ne min mǝne, waŋ ndi azhɔu te Kiliyobas, a tanyɛmɛ te di, <<Ayi wa kiki mi uyi cen ne Urshelima, ndi bau ne zhi kiyiŋ ndi ne na ne amɔ ne bɛr yiŋɛ kai?>>19Fe adi aner amɛ yaa ma, <<Aye nii ne na?>> Adiu tedi <<Ne tu ayi Yesɔ awɔnǝ Nazara, waŋ ndi ayi ine bla shar yi Arik tena na kiki ngɔngɔŋ ben lǝlɛ didik ye Arik ben aneshir bɔbɔk.20Ngɔŋ ine na ndum kǝ Arik bǝn abɛ gli ta ne avuŋu anǝk te bɛ aŋunu, te akpaŋu ne kuŋkun.21Fe ta ne shur ayi te di ayi wa atei ta aner abɛ Isrela azhɔk. Waŋa ayi bɛr yi ntar ndi ki yiŋɛ ne na.22Ne mee, amba anuŋ ne min mɔrɔ, ne duŋ ta sak aŋɔk ne anu. Ne gar ibɛmɛ amblimblɛ awaŋa.23Ndi bane yik ikum maa ba, ne ŋur akam, anyɛ bla ta, aba ne yik abɛ shar ayou Arik. Ne bla ba tedi ne ka lu.24Akpa amɔr anuŋ ndi ne gar bɛ me, ne kɔte yik iyi ndi amba ma ne bla ba, aba menyi ba ne yik kumɔ ba.>>25Fe Yesɔ adi ba, <<Izhin abɛ yi bliblik, aneshir abɛ yaŋ zhi abɛ yaŋ tanyɛmɛ ne susun ne ki yiŋ ndi abǝ bla shar yi Arik ne blai!26Ba rɛ ndi Kristi abɛ yik iyah ne kiki yiŋɛ, te ta ŋgɔŋ ma kai?>>27Fe nak baŋ rǝ bǝn cɛr Musa bǝn abɛ bla shar yi Arik bɔbɔk, ne bla ba kiki yiŋ ndi ne yime ne tu maa ne min cɛrǝ.28Ndi ne te gbahir ne ntun yiŋ ndi atsǝn agara,Yesɔ ne na ndi a tei li ti.29Fe ne tsǝ aklɛ te abenu tedi, <<klɛ ben abɛ ta, te amgbalu ate; arik neka kyaŋ aku.>> Fe ayir te azesɔŋ ben abɛba.30Ndi ayi ne min kɛ li kili bene abɛ ba, ne baŋ durgbama te nyer Arik, te gab ba ne kɛ.31Fe ayi amene akɔ bu akɔ zhi te ayi Yesɔ, akɔ naŋadɔ ne ti mǝne.32A rib akpa mɛn, <<Ba a susun mɔr bane bla ta ka ndi ta ne tsǝntsǝn ne ankɔŋ te azǝn bla ta mplimplɛ iyi cɛrǝ?>>33Ne lu aklɛ bɔbɔk mǝne te kama kɔmɔ ne Urshelima. Tǝ kɔ te yik amɛ wur ane zhin ben abaŋ ndi ayi ben abɛba34te di, <<Ayi lɛ didik! Yesɔ ne lu te tsar Biturus ikpa maa.>>35Ankyak ayaa baŋa abla ki yiŋ ndi ne te bene bɛba ne ankɔŋ, ben ki ndi aba ne tɔ Yesɔ azhi ne mkpaŋ kɛ gab durgba.36Ayi ne min kɛ zen bla kiki me, ankyak Yesɔ aru akli ne tsutsu mǝne, te di ba, <<Isik susun bǝ yi bene bɛ zhin.>>37Ankyak kpa ku rǝ ba te na te sisik, ayik te di ayi ner ne ku ru a ba yigu.38Adi ba, <<Izhin ri kpa kɛ ni, te zin lɛ ne asusun min?39Izhin bɛ tɔ aŋɔk amuŋ ben aza muŋ. Ai nga ne tu muŋ! Sak zhin aŋɔk amin ne kpa muŋ te yik; iner ne ku ru ba yi ne na ben akuku ba, ndi me yime ne kǝ ba.>>40Ndi Yesɔ ne bla amɛ, a tsar ba aŋɔk amaa ben aza amaa.41Ndi ba ne tanyɛmɛ ba ne nyer bǝn ki didik ndi ne na, arib ba, <<Izhin yi ne kinuŋ yi li ayaŋai?>>42Anugu ambɛ amɔ tsɔtsɔb ayi yuk,43fe atau ata ne ti mǝne.44Adi ba, <<Waŋa ai lɛ muŋ keŋ ndi mne bla zhin ne mkpaŋ ndi mne ri yi bene bɛ zhin: kɔte nii ite shaga ndi ne cɛrǝ ne tɔ muŋ ne cɛr yi Musa, abɛ na ndum Arik ben Zabura.>>45Fe Yesɔ a bu asusun amene te abɛ zhi mplimplɛ yi cɛrǝ.46Ablaa ba, <<Waŋa ayi kiyiŋ ndi ne cɛrǝ: Kristi me atei yik iyah tena lu ne bɛr yi ntar,47te duŋ lalɛ bǝn zuk zhɔk abɛ na zumimin atei du lɛ kɛ Arik ne ntuntun bɔbɔk, vuŋ rɛ Urshelima.48Ayi zhine ba ne yik iki yiŋɛ.49M tei shar zhin ne ki yiŋ ndi Tetɛɛ muŋ nɛ kpai anyak te di wa atei na; izhin bǝ kli ne miŋ ntun gar mkpaŋ keŋ ndi atei nek zhin mgbyamgbyaŋ are shumɔ.>>50Ndi Yesɔ ne gli ba te kɔmɔ ne goŋ ntun iyi Batanya, ne lɛk aŋɔk amaa kɔmɔ ne shu te nek ba anu adidik51Ndi Yesɔ azǝn nek ba anu adidik, a duŋ ba, fe abaŋu te kɔmɔ ne shu.52Ankyak akɔ zekuru, te kama kɔmɔ ne Urshelima, te zen nyer.53Fe akli ne Akabakɔŋ, te zen gbar Arik asak.
The Word for the World International