Meng Lai88
Mami dow Kora krungchakuüa kowh meng chekhai. Mami dow Zera chapa Heman tekah mih meng chekhai. Mami meng dow “Mahalat-Leanawt” pami meng owi iawng natekah kown.
1Aw CHAKRAMANG, ang kowh lawng miia Thurai,en tut-e dow ni towng iak towng ang uang kar reng chekhai.2Ang awr lü awr leng mih hawt sünta ang diah,kar se ang uang lü khowng mih hawt sünta ang diah.3Ang kowh chownglawng dow kawmkrat huma chekhai;ang kowh dow kowng khin uang towm iawlaw khowk.4Ang kowh dow mapaw kür uowi dowi bowt,ang dow kowng kown mih maru iawng towbowt.5Ang dow kowng miuüa pungmadawng kowi kuakta ang hüah mih iawng towbowt,ang dow tadupra kowi kowh mawk hüah mih uak iawng towbowt.Kowng miuüa kowi iawng en tamata ang khai bowt,amatni kowi iawng en khowng ang dowi bowt chekhai.6Kowng miuüa uowi rah kowi en tow ang khai bowt,aiiuma hai abüpma mih rah krawng dak kowi en tow ang khai bowt.7En kowh kunmaraura dow sata tuilowng iawng plan plan ang luk kowi uang kla khai,nami en kowh kunmaraura hown en piak ang khai. [Sela]8En rakowi ang kowh auiuauüa mih nuata ang khai bowt,amatni tut-e dow suiiaima en chang ang khai.Ang takhang khai bowt,ang uang nowng lawt dowi bowt chekhai.9Tuak krat lai rakowi ang kowh mik paw chim dowi bowt.Aw CHAKRAMANG, ni towng ang awr haw en reng,awr iaw rut se ang awr lü awr leng reng chekhai.10Kowng khowk miuüa vüi en chang pe awdara lup bow?Kowng miuüa awr rü hanow rowsi en bow? [Sela]11Tadupra kowi en kowh achur uowi dowi mih sakraura lawnguan mia chow nowng phuang?Kowng miuüa uowi rah kowi en kowh kaah sakowm mih laiklow mia chow nowng phuang?12Aiiuma mih arah kowi en kowh awdara lup mia chow nowng khi?Maru tamata reng mih maru-uüa pren kowi en kowh lup nowm lawnguan mia chow nowng tek?13Aw CHAKRAMANG, en tut-e kar se ang uang lü khowng reng;rau towng en tut-e ang awr lü awr leng reng chekhai.14Aw CHAKRAMANG, tawngplawng kowchow en nuata ang khai?Tawngplawng kowchow en cham dangta ang khai?15Ang kowh dow asowmchow hownia akawm akrat kangowh chekhai,now ang dow hüm kowng ngialia chekhai.Ang luk kowi dow en kowh kramra uowima mih ripra uang kla khai,nami ripra dow mapaw ang nowng kham dowi bowt chekhai.16En kowh kramra uowima mih kunmaraura dow ang luk kowi uang kla khai;en kowh kramra uowima mih kunmaraura dow uang piakta ang nak khai.17Nami kunmaraura dow tui lawt khe kowh iawng umta ang lut khai,nami kunmaraura dow ni chut chi uang rumta ang hüah khai.18Ang lang sakrauah miuüa hownia en praita ang khai bowt,ang kowh auiuauüa hownia dow alakma kowi en lang tow ang khai bowt.Ang kowh lang tasin mih auiua dow aiiu towbowt chekhai.The Seed Company