Meng Lai89
Ezra krungchak Ethan kowh meng.
1Aw CHAKRAMANG, en kowh achur uowi dowi mih sakraura lawnguan kowi chowngchowng saksakma ang natek meng reng kown,en kowh kaah sakowm mih laiklow dow chowngchowng saksakma maru-uüa tut-e ang naphuang reng kown.2En kowh achur uowi dowi mih sakraura dow chowngchowng saksakma nauowi reng kown,en kowh kaah sakowm mih rah dow mukuang iawng anikma nauowi kown.3En tek mih, “Ang kloah mih ang kowh nar David kowi ang tow pe sangbowk laitawm lowk khai,aia kowi dow maiawng ang takham pe khai:4‘En krungchak hownia dow mang nauang pawk reng kown,amatni dow chowngchowng saksakma nachowm mang reng kown,’ pape khai,” pakhai. [Sela]5Aw CHAKRAMANG, mukuang kowi kowh uowi mih maten dow en kowh kri kraingma mih lup kowi kiow en reng,chimsaima mih kramamu-uüa dow en kowh kaah sakowm mih rakowi kiow en reng chekhai.6CHAKRAMANG hown tuah kown mih mukuang kowi mia chow uowi?Kramamu-uüa pungmadawng kowi CHAKRAMANG hown tale mih mia chow uowi?7Chimsaima mih kramamu-uüa takua talawmra kowi Thurai dow ka ringkawra reng,aia kowi tapat lut iowng miuüa dow aia kowi ringkawma hown kramah reng chekhai.8Aw CHAKRAMANG, en dow lang kri lang kraing mih Thurai chekhai,aw CHAKRAMANG, en khowt kür mih mia chow uowi?En dow lowra prakowi kaah sakowmma chekhai.9Talowng phunglung mih sata tui dow en low kowi uowi reng,tuilowng awr talowng hanow en pe sutah reng chekhai.10Sata kowi kowh uowi mih Rahab kowi dow en piakta naknak khai;en kowh ransu-uüa kowi dow en kowh akürma mih rut hown en dita naknak khai.11Mukuang dow en kowh, lusa paw en kowh chekhai;mami lusa hai nakowi kowh uowi mih maten en thawpah mih chekhai.12Tawngphak hownia mrawkphak mowr kowi kowh uowi mih maten dow en thawpah mih chekhai;Tabawr hungh hai Hermawn hungh dow en ming kowi tek rowsi meng reng chekhai.13En kowh bawng dow akürma chekhai!En kowh hawmlawm rut dow lainowmma kür chekhai!14En dow mang chowm rah hownia achinawmma hai anowmma kruitownah reng,en dow en kowh achur uowi dowi mih sakraura hown kaah sakowmma chang lup reng chekhai.15Meng hown uang kiow en miuüa dow prasira uowima chekhai;aw CHAKRAMANG, amatni dow en tawi uowi mih anowi kowi mang reng chekhai.16Amatni dow ni chut chi en ming kowi piaw büah reng,en peah iungra khai rakowi amatni dow kiow en khai.17En dow anging kowh kraingra uowima mih kürra chekhai;anging ka kür mih dow en saksing sana anging rakowi chekhai.18Aw CHAKRAMANG, nauang lawng anging kownkow en khowm bowk anging maru lowk ia khai,Israeluüa kowh chimsaima mih dow pe anging mang lowk ia khai.19Akat khe ringkaw en miuüa tut-e mukmang kowi en uang tek pe mih,“Tasen kiakma mih lowk ia kowi ang khowngah khowk;aia kowi dow nape chowmah mang kownkow maru kawmuüa pungmadawng hownia ang klota khowk.20Nami ang kowh nar David kowi dow ang kata khowk,aia kowi dow ang kowh chimsaima mih kanrawn sau hown ang nümnapah khowk.21Ang kowh kür dow aia tut-e natawi uowi reng kown,ang kowh kür hown aia natawi kür kown.22Ransu-uüa dow aia kowi nanowngah kown nadowi;maru ngak dow aia kowi nanowng sumah kown nadowi.23Aia kowi kowh kingküa miuüa kowi dow aia pur kowi ang napiakta nak kown,aia kowi sui miuüa kowi dow ang nathuata nak kown.24Ang kowh kaah sakowm mih rah hai achur uowi dowi mih sakraura dow aia tut-e nauowi reng kown;aia dow ang ming hown nakür ngamlam kown.25Aia kowi dow Mediteranean sata hownia Iufratis aw mowr ang nape powngah kown,nami takra kowi kowh süng maten dow aia naka powng kown.26David dow haw ang hanow natek ang kown mih,‘Ang kowh pa dow en chowtaih, ang kowh Thurai dow en chowtaih,now ang kowh lawng miia Singku Huamang dow en chowtaih,’ napa kown.27Aia kowi dow chapa ta rah ang napeah kown;aia kowi dow lusa kowi kowh mang maten kowi kowh lang kri mih ang nachangah kown.28Aia kowi dow ang kowh achur uowi dowi mih sakraura chowngchowng saksakma ang natow pe kown;aia hown kowh ang tatowah mih sangbowk laitawm dow anikma nauowi reng kown.29Aia kowh krungchak hownia dow mang nauang pawk lowk ia kown,nami mang dow mukuang uowi mowr naka chowm mang reng kown.30Nachenganchepaw aia kowh krungchakuüa che ang kowh alow pek chün dowi,ang kowh rirow iawng chang dowi,31ang kowh ari aiang nuata khai,now ang kowh ana pek chün dowi hanow,32amatni kowh ngak rakowi müa hown ang naripah kown,amatni lai üa sung ang napeah ripra kown.33Tawkche David kowi dow ang kowh achur uowi dowi mih sakraura ang napawta pe kown nadowi;aia kowi kowh ang kham pe mih lai dow ang natown pe reng kown.34Aia hown kowh ang tatowah mih sangbowk laitawm dow ang napiakta kown nadowi,ang tekah mih laiklow dow anawrchow khowm ang naklowiah kown nadowi.35Akat khe ang ming chimsaima mih hown maiawng ang takham sawi khai:David kowi dow katpaw ang daiah kown nadowi.36Aia krungchak hownia dow mang nauang pawk lowk ia kown;nami mang kowh mang chowm rah dow sat iawng anikma nauowi reng kown.37Nami mang chowm rah dow lama iawng anikma nauowi reng kown,ang kowh kaah sakowm mih sangbowk laitawm saksi dow lama chekhai,” pakhai.38Nachenganchepaw kawmat dow en nümnapah mih mang kowi en kunmarauah khai,aia kowi dow en kingküaah hanow en nuata khai.39En nar hown kowh en tatowah mih sangbowk laitawm dow en piakta pe khai,aia kowh mang lukruk dow krawng kowi en kuakta pe khai.40Aia kowh marow tap maten dow en khueta pe khai,aia kowh akhawtma mih kangchawngra kim dow en piakta bowk khai.41Aia pren iawng kowmang miuüa dow aia kowh uanh maten rupla pe khai,aia kowh kimping namkhetuüa dow aia kowi changla rensi kau khai.42Aia kowh ransu-uüa kowi akürma en changah khai,amatni kowi dow en pe piawah khai.43Aia kowh saidawng bür dow en nuata pe khai bowt,aia kowi dow en tawi khowngah tasen dowi bowt chekhai.44Aia kowh mangra dow en piakta pe khai bowt;aia kowh mang chowm rah dow krawng kowi en kuakta pe khai bowt.45Akhin nadowi tak khe aia kowi dow en pe lawngtangah khai,aia kowi dow rukraira hown en mumta klum khai. [Sela]46Aw CHAKRAMANG, mün ni tak chow naiawng en nachang kown?Chowngchowng saksakma en tapet kown bow?Mün ni tak chow lün pluplup mih maih iawng en nakunmarau kown?47Mün khowt chow ang kowh chownglawng town mih sam tuak madiah,lusa maru kowh chownglawng dow tawngpaw asung uowi dowi chekhai!48Kowng dowi kowi chowngchowng saksakma nowng sing mih maru mia chow uowi?Kowngra hownia kowmatia kowi nowng towkala mih maru mia chow uowi? [Sela]49Aw Thurai, en kowh achur uowi dowi mih sakraura tawng kowi chow?Kaah sakowmma hown David kowi en sakrauah kown en takham khai,nami sakraura tawng kowi chow?50Aw Thurai, en nar ka rukrai mih lawnguan kowi tuakah reng diah,chenchapuüa tut-e ang ka rukrai mih lawnguan tuakah reng diah.51Aw CHAKRAMANG, en kowh ransu-uüa dow en nümnapah mih mang kowi peah rukrai khai;aia cham kowi rah maten kowi amatni dow aia kowi khareah khai.52CHAKRAMANG dow chowngchowng saksakma akiow pauowi lah!Amen! Amen!The Seed Company