Meng Lai78
Asaf kowh meng.
1Ang chenchapuüa low, ang kowh prengia iung laiklow sünta diah;ang nawr hownia kowh laiklow kowi pe param büa diah.2Laiuat hown ang natek lai kown;alai chowng khe kowh laipet lawnguan ang naphuang kown.3Maiawngün laiklow maten a-i ta reng hai a-i tuk reng khowk chekhai,a-i kowh pipu-uüa mih maiawngün laiklow tekla a-i khowk chekhai.4Nami dow a-i kowh chauüa tut-e a-i naitah kown nadowi;nauang ta ting kown mih krungchakuüa tut-e paw a-i natekla pe kown.CHAKRAMANG kowh kri kraingra atekma mih lup lawnguan a-i natek pe kown,aia kowh kür hai aia changah mih awdara lup lawnguan maten a-i natekla kown.5Aia dow Jakawb krungchakuüa tut-e aia kowh ana pek peah khai,Israel chenchap vüi aia kowh ari aiang mih towla pe khai.Nami ari aiang dow amatni kowh chauüa kowi natüngsangah kownkowaia mih a-i kowh pipu-uüa tut-e pela ana khai.6Naiawng aia pela ana mih dow uang ta uowi kown mih krungchakuüa,kawmat kowh dia dowi tak miuüa pacham tuk lah pakowh chekhai,now amatni paw amatni kowh chauüa kowi pacham tekla pe lah pakowh chekhai.7Nahanow kowbüah paw Thurai luk kowi neplawng nesak kown towbowt,now Thurai kowh lup lawnguan tamata dowi kowi Thurai ana pek nachün kown towbowt.8Nami klen kowi amatni pipu-uüa iawng lai üa kürma hai kingküa dawma naphaw kown nadowk.Amatni pipu-uüa kowh sak dow Thurai tut-e anikma hai kaah sakowmma nadowi chekhai.9Efraim krungchakuüa dow salangba dowkma kangowh chepawtasen mih khin khe amatni dow kung pra sut takla khai.10Amatni dow Thurai kowh sangbowk laitawm chün dowi chekhai,aia kowh rirow paw chün kown nau büah dowi chekhai.11Tawng ngai chow Thurai chang mih amatni dow tamata khai,amatni kowi Thurai tüng pe awdara lup mih amatni dow tamata khai.12Israeluüa kowh pipu-uüa pur kowi Thurai chang pe awdara lup khai,nami awdara lup aia chang pe mih dow Aigupta pren kowi kowh Zoan dowm kowi chekhai.13Aia dow sata kowi pe taakah lang now nami iawng amatni kowi pawla khai,sata tui kowi mih tap iawng aia changah khai.14Ni-e khe dow uangnim hown amatni kowi aia kruila khai,now uar-e khe dow maih nowi hown amatni kowi aia tüng pe tiama khai.15Süngrüp süngkangma kowi huaklu pe talakah phak hanowkrawng dawng tui iawng uang lawt iualua mih amatni kowi aia pe khamah khai.16Huaklu hownia tui hawr iualua aia changah khai,nami tui dow aw kowi kowh tui iawng hawr klunglung aia changah khai.17Nachenganchepaw amatni dow Thurai kowi kingküala mih angak chang reng tak chekhai,Lang kri lang kraing mih Thurai kowi süngrüp süngkangma kowi kingküaah büah khai.18Amatni dow amatni nau mih chakkham Thurai tut-e kük büah khai,naiawng hai amatni dow sakdawng hownia Thurai kowi chaingah khai.19Amatni dow Thurai kowi kingküala mih laiklow maiawng tek khai,“Süngrüp süngkangma kowi Thurai nowng pe a-i chakkham tak pabow?20Huaklu kowi bawpah hanow tui lawt iualua aia changah khai;naiawng aia nowng chang khai pache kawm hai chaknga aia nowng pe a-i kown pe bow?” pakhai.21Nami laiklow tata hanow CHAKRAMANG kowh kunmarau dow lün pluplup khai;Jakawb luk kowi kunmarau kowh aia kowh sak mih kam iawmlawm khai,Israel luk kowi aia kowh kunmarau dow lün pluplup khai.22Tawngplawng kowchow panow amatni dow Thurai kowi owm büah dowi chekhai;amatni dow aia nalawngah kown pami kowi owm büah dowi chekhai.23Nachenganchepaw amatni vüi uangnim kowi aia peah ana khai,now mukuang kimplawt dow aia pe tauowah khai.24Aia maru-uüa chak müa uangchak iawng aia iu peah manna kawm khai,amatni kowi mih mukuang chakkham aia pe chaah khai.25Nahanow amatni dow kramamu-uüa kowh chakkham tawi cha khai,amatni nowng cha mowr chi aia iu peah chakkham khai.26Aia dow mukuang hownia uang chin pe satlawt li khai;now mrawkphak li kowi paw aia kowh kür hown aia uang pe uangah khai.27Aia dow uangchak iawng amatni kowi uang iu sa pe chaknga khai,sata pang kowi kowh sema iawng ahuma aia uang chin pe uakling khai.28Naiawngün dow amatni kowh tangbung khupra kowi uang chin pe khai,naiawngün dow tangbung tavir lut aia uang pe dowah khai.29Nami dow du pat amatni cha khai;aia dow amatni prüaah mih sia peah khai.30Nachenganchepaw amatni prüaah mih chakkham ki cha dowi rawn,amatni nawr kowi khowm uowi reng tak khe,31amatni luk kowi mih Thurai kunmaraura uang ting khai.Thurai dow amatni kowh akürma mih klanguüa hawmh kowi kowngta pe ne khai,Israeluüa kowi kowh kow ru lang iung mih klanguüa hawmh kowi aia saita pe ne khai.32Nachenganchepaw amatni dow chang ngak rengreng chekhai,Thurai kowh awdara lup khi khowk chepaw Thurai kowi owm büah dowi chekhai.33Naiawng rakowi amatni kowh ni mih lup chawn dowi kowi aia pe churah khai,amatni kowh ning dow kramring tahowrma hown aia pe kowiah khai.34Amatni kowi aia saita kung kowi ta lat miuüa aia kowh laiklow ta ka tuak khai;amatni dow dia sar hanow süngürma hown aia kowi plan haw khai iawk.35Nakhowk khe dow Thurai chowtaih amatni kowh Singku Huamang pami ka tuak büah khai,lang kri lang kraing mih Thurai chowtiah amatni kowh lawng miia pami ka tuak büah khai.36Tawkche amatni dow nawr hown aia kowi kuanah khai,now dai hown aia kowi daiah büah khai.37Amatni kowh sak dow aia prakowi anikma uowi dowi chekhai,aia kowh sangbowk laitawm kowi kaah sakowmma uowi büah dowi chekhai.38Nachenganchepaw aia kowh dow saksing sanara achur uowi dowi chekhai.Naiawng rakowi aia dow amatni kowi piakah dowi.Aia dow aia kowh kunmaraura mih plan plan pe prowngah khai,aia kowh kunmaraura maten aia pe lawtah dowi chekhai.39Ah! kowbüah dow kowng kown mih maru chowtaih,kowbüah dow uang hutla phun now tama mih li iawng chowtaih pahai aia ka tuak khai.40Nachenganchepaw mün kat chow süngrüp süngkangma kowi aia kowi kingküaah büah mih ia tekah dowi chekhai,aia sak kowi rau iawng mün kat chow uowi büah mih ia tekah dowi mowr chekhai.41Thurai kowi amatni dow plan plan chaingah büah khai,Israeluüa kowh chimsaima mih Thurai kowi towkah sak kawm büah khai.42Amatni dow aia kowh kür lawnguan sak kowi towah dowi,ransu-uüa rut hownia amatni kowi aia lawngah mih paw sak kowi towah büah dowi chekhai.43Amatni dow Aigupta pren kowi aia tüng pe mih amatra tamata khai,now Zoan dowm kowi awdara lup aia chang pe mih paw tamata büah khai.44Aia dow Aigupta pren kowi kowh aw tui maten aia changta pe vi bowk khai,now nami tui dow nowng kham büah dowi chekhai.45Amatni tut-e aia dow kowchin pe ving kawm khai,naiawngün dow amatni kowi krawi towk krat khai.Now pur hawmh paw aia kowchin pe khai,naiawngün paw amatni kowi krawi piakta pren nak khai.46Amatni kowh uih-ak dow plawng hawmh kowi aia pe piakah khai,now amatni kowh luprak dow plawng hawmh kowi aia pe piakah khai.47Ria hown amatni kowh grep ruih aia piakta pe nak khai;now nang tui hown uidut singh dow aia piakta pe nak khai.48Amatni kowh chia hawmh kowi dow ria hown aia kowngta pe bowk khai,now amatni kowh tawncher hawmh kowi dow kaikreng hown aia saita pe bowk khai.49Aia dow aia kowh kunmarau lün pluplup mih hai sak kowi rau mih maten amatni luk kowi uang chin pe khai;naiawngün piakra lup nauang chang kownkow kramamu-uüa kowi aia towah khai.50Aia dow aia kowh kunmarau mih pe prowngah dowi chekhai;aia dow Aiguptauüa kowi lawtah dowi kowi makowng hawi hown pe kowngah khai.51Aia dow Aigupta pren kowi kowh chapa ta maten kowi kowngta pe bowk khai,Aigupta pren kowi kowh kimchak towng chapa ta maten kowi kowngta bowk khai.52Nami kung kowi aia dow Aigupta pren hownia aia maru-uüa kowi ruapur hawmh iawng uang lawtla khai,amatni kowi dow ruapur kowi iawng süngrüp süngkangma kowi aia kruitownla khai.53Amatni kowi dow kramra uowi dowi kowi thaulangma hown aia pawla khai.Nachenganchepaw amatni kowh ransu-uüa kowi dow sata tui limta bowk khai.54Amatni kowi dow aia kowh chimsaima mih pren kowi aia uang pawla khai,aia kowh kür hown aia powngah mih hungh kowi amatni kowi mih aia uang pawla khai.55Akeng chenchapuüa kowi dow amatni pur kowi aia prütta pe khai,now akeng chenchapuüa kowh krawng bawn dow aia maru-uüa kowi aia ret pe khai.Amatni kowi dow akeng chenchapuüa kowh tangbung kowi aia pe uowiah khai.56Nachenganchepaw amatni dow lang kri lang kraing mih Thurai kowi chaingah khai,now amatni dow aia kowi kingküaah khai.Amatni dow aia kowh ari arow mih chün dowi chekhai.57Amatni dow amatni kowh pipu-uüa iawng tiama nowm hownia powt hanow aia kowi kuanah khai,amatni dow akhawnma mih leba sek rawah mih prakowi mang dowi mih iawng chekhai.58Amatni dow arah kroma mih kowi kowh chupiiara krawi tawng mih hown aia kowi towkah kunmarau khai,amatni kowh arup aren kowi chup mih hown Thurai kowh khowrbown dawra pe huah khai.59Naiawngün khi hanow Thurai dow lainowmma kunmarau khai.Naiawng rakowi aia dow Israel kowi hing nuata khai.60Silo marow kowi kowh aia kowh taklowp taklangra te hownia aia dow powt khai,nami taklowp taklangra te kowi dow maru pungmadawng kowi aia tawi uowi chowdiah.61Aia dow sangbowk laitawm tawkpla mih ransu-uüa rut kowi apta pe khai,aia kowh kür hai kri kraingra dow ransu-uüa rut kowi aia apta khai.62Aia dow aia maru-uüa kowi ransu-uüa kowh saidawng rut kowi ap-ah khai,aia dow amatia kowh maru-uüa luk kowi aia kowh kunmaraura ue prang khük pe khai.63Amatni kowh klanguüa hawmh kowi maih hown aia towkah khai,amatni kowh malauüa hawmh dow ka tek sutawng meng dowi bowt chekhai.64Amatni kowh uamowuüa dow saidawng rut kowi kowng khai,amatni kowh mamaimowuüa dow ka uowila uiting uangtak dowi chekhai.65Nami kung kowi dow thowr müi mih iawng CHAKRAMANG mih kutplan rü khai;aia dow grep tui pua prowng mih tasen kiakma mih iawng awr rü khai bowt.66Now ransu-uüa kowi dow pe sumah khai bowt,amatni kowi dow achowngma vüi rukrai rakowi towah khai.67Nachenganchepaw Josef krungchak süng mih aia nuata khai,now Efraim krungchak süng paw aia pawah dowi chekhai.68Tawkche Juda krungchak kowi dow aia lang kloah khai,aia dow aia lang sakrauah mih Zaiawn hungh kowi lang kloah khai.69Nakowi dow aia kowh kim chimsaima mih mukuang iawng anikma aia thawpah khai.Nami dow lusa iawng anikma aia thawpah khai.70Aia dow aia kowh nar David kowi uang ruiah khai,aia kowi dow ruapur tung hownia aia uang pawla khai.71Aia kowi dow ruapurmauüa kowi mingkhet mih lup changra hownia uang pawla khai;nami dow CHAKRAMANG kowh maru Jakawb krungchakuüa kowi,CHAKRAMANG kowh dawngthawnguan Israel chenchapuüa kowi nanowng khetla kownkow chekhai.72David dow amatni kowi anowmma mingkhetah khai;aia dow amatni kowi mih prengiama hown kruitownla khai.The Seed Company