Meng Lai77
Meng krui mih Jeduthun kowh meng owi iawng natekah kown mih Asaf kowh meng chekhai.
1Ang dow Thurai tut-e atünma ang awr kar khai,naiawng ang awr kar mih dow aia pauang klang ang lah pakowh chekhai.2Ang kla phih mih khin khe CHAKRAMANG kowi ang hawah khai;chawkla rut se uar prowt ang awr chup Thurai khai.Nachenganchepaw ang kowh saktuak dow thaulang dowi chekhai.3Thurai kowi ang tuak mih khin khe lainowmma ang tuak kawm sulu khai;now aia lawnguan kowi ang tuak mih khin khe ang tanua sak uang ting khai.4Aia dow pe müi ang dowi chekhai,ang tuak krat lai kowh lai khowm ang nowng tek dowi bowt.5Achük alai khe kowh laiklow ün ang krawi tuak khai,kung prakowi klenta mih laiklow ün ang krawi tuak khai.6Achük alai khe kowh ang tekah mih meng uan ang krawi tuak khai,abüpma ang tuakah hanow sakdawng kowi ang talünta mih,7“Chowngchowng saksakma vüi CHAKRAMANG nuata a-i khai bowt bow?Katpaw aia saksing sana anging dowi bowt tham bow?8Aia kowh achur uowi dowi mih sakraura chowngchowng saksakma vüi chur khai bowt bow?Aia kowh laikham paw chowngchowng saksakma vüi uang tachi dowi bowt mih chowbowt bow?9Saksing sana kown mih Thurai tamata khai bowt bow?Aia kowh sanara aia taingta khai bowt bow?” pakhai. [Sela]10Now ang tek mih, “Ang sak kowi rau mih auan dow maiawng:Lang kri lang kraing mih Thurai kowh kür uowi dowi bowt,” pakhai.11Nachenganchepaw aw CHAKRAMANG, en changah mih lup lawnguan maten ang naka tuak reng kown,achük alai khe kowh en changah mih awdara lup lawnguan ang naka tuak reng kown.12En kowh kri kraingma lup lawnguan maten ang natuakah kown,en kowh akürma mih lup lawnguan ang natuakah kown.13Aw Thurai, en kowh tiama dow chimsaima chekhai,anging kowh Thurai iawng kri kraingma mih thurai miapaw uowi dowi bowt chekhai.14Awdara lup chang mih Thurai dow en chowtaih,chenchap maten tut-e en kowh kür dow en tüngah khai.15En kowh maru Jakawb hai Josef krungchakuüa kowi en lawngah khai;amatni kowi dow en kowh rut akürma mih hown en lawngah khai. [Sela]16Aw Thurai, sata Rik tui mih khi en khai;khi en hanow tui mih kram en kowh chür khai,nami sata tui dow abüpma kowi kowh re phai mowr pat chür khai.17Uangnim dow uang iu khük uang khai,mukuang kowi dow kaikreng tün nowk rumrum khai.En hownia kowh pla nowi mih mapra ne paipra ne krawi nowi khai.18Liku kowi en kowh kaikreng tün mih taah khai,en kowh pla nowi mih lusa kowi krawi nowi pluplup khai.Lusa dow chür nurlur hai tahowng nukluk khai.19Sata dawnglang iawng en thawp tiama khai,tui abüpma mih iawng en kruitown anging khai.Tawkche en kowh khawk kung dow khi-ah dowi chekhai.20Mosi hai Arawn iüah kowi en changah aluchow hanow,en kowh maru-uüa kowi mih ruapur hawmh iawng en kruitownah khai.The Seed Company