Meng Lai71
1Aw CHAKRAMANG, en tut-e chowtaih ang tatung tanim reng.Naiawng rakowi katpaw hauang pe ka ang rukrai diah.2En dow achinawmma chekhai rakowi uang lawng ang diah;ang kowh laiklow sünta ang hanow uang takhula ang diah.3Ang naia tapetla reng kownkow uang chowng singku huamang diah.En dow natakhula ang kownkow kramamu-uüa kowi peah ana khai.Tawngplawng kowchow panow en dow ang kowh singku huamang,now ang kowh akhawtma mih kangchawngra kimkrowng chekhai.4Aw ang kowh Thurai, maru ngakuüa rut hownia uang lawng ang diah,angakma hai sangching khawmma miuüa rut hownia uang lawng ang diah.5Aw CHAKRAMANG, ang kowh sakowmra dow en chowtaih,ang klanguüa krowngchow hownia en luk kowi chowtaih ang neplawng nesak reng.6Ang dow uang dia hownia en luk kowi neplawng nesak reng chekhai;au mu lak kowi hownia en dow uang mingkhet ang reng chekhai.Naiawng rakowi atungma ang nakiow en reng kown.7Tawngbak mih maru-uüa dow khi ang now mik ngak hown mü ang khai.Tawngplawng kowchow panow ang kowh akhawtma mih tatung tanimra dow en chowtaih.8Ang nawr kowi mih en kiowri meng hing uowi hüah chekhai,ni chut chi en kri kraing mih lawnguan ang hing phuangta hüah chekhai.9Lawngtang prakowi hauang kuakta ang hüah diah,ang kowh dow kür uowi dowi bowt khe hauang nuata ang hüah diah.10Ang kowh ransu-uüa dow kingküa ang kown mih laiklow tatek khai;saita ang kown nau miuüa maten takrüpah hanow thawp prengia ngak khai.11Amatni tatek mih, “Aia kowi dow Thurai nuata mih chowbowt,aia kowi dow kawikrawiah hanow khümta bowt.Tawngplawng kowchow panow aia kowi nalawngah kown mih miapaw uowi dowk,” pakhai.12Aw Thurai, ang hownia alakma kowi hang cham uowi diah,aw ang kowh Thurai, nalawng ang kownkow alenma uang diah.13Ang kowh ransu-uüa mih pacham ka rukrai hai pacham piak lah;pe kla ang phih kown kamrüt miuüa kowi dow maru suiah hai pacham prawng renah lah.14Nachenganchepaw ang dow atungma en luk kowi naowmsak kown,ang dow nakiow en ngamlam kown.15En kowh lup iung hai en kowh lawngra lup lawnguan ni chut chi ang nawr kowi nauowi kown.Tawngplawng kowchow panow naiawngün laiklow dow tek reng chepaw achur uowi dowi chekhai.16Aw CHAKRAMANG, en kowh kri kraingra lup lawnguan natek kownkow en kim kowi ang nakup kown,ang dow en kowh lup chowtaih, en matia kowh lup iung lawnguan chowtaih ang natek kown.17Aw Thurai, ang klanguüa krowngchow hownia tüngsang ang mih dow en chowtaih,ani mowr pat en kowh awdara lup lawnguan ang krawi chia krawi phuang reng chekhai.18Aw Thurai, ang lawngtang kowh sam pau khai bowt chepaw hauang nuata ang diah,ang chauüa hai chu-uüa kowi mih en kowh kür hai kri kraingra lawnguan pe phuang ang diah.19Aw Thurai, en kowh tachi tanawmra dow mukuang kowi tawk khai bowt,kri kraingma mih lup maten dow en chowtaih chang reng.Aw Thurai, en hown tale mih miapaw uowi dowi bowt chekhai.20Ang luk kowi akrat pusara hai phih ahuma en uang pe tingah khai;nachenganchepaw en nauang pe ang kür iawk kown,now krawng dak hownia krüngah mih iawng en nakrüng ang iawk kown.21Ringkawra en nape ka ang ngamlam kown,en nape ang sakkhawtra iawk kown.22Aw ang kowh Thurai, en dow kaah sakowmma chekhai.Naiawng rakowi tepla taraw se ang narowsi en kown.Aw Israel pren kowi kowh chimsaima mih Thurai,tepla tingteng se ang natek en rowsi meng kown.23En kiow müa meng ang tek mih khin khe atünma ang natekah kown,ang kowh sak paw en rowsi meng natek kown.Tawngplawng kowchow panow uang lawng ang mih dow en chowtaih.24Nape kla ang phih kownkow kamrüt miuüa maten dow ka rukrai khai bowt.Naiawng rakowi ang kowh nawr mih ni chut chi en kowh lup tachi tanawmra naphuang kown.
The Seed Company