Meng Lai72
Mami dow Sawlawmawn vüi kowi kowh meng.
1Aw Thurai, mami mang kowi en kowh tara nowm pe kaah diah,mami mang chapa kowi en kowh tachi tanawmra peah diah.2Aia mih en maru-uüa kowi achinawmma pacham nowng chet pe tara lah,now ngarawng ngaraima miuüa kowi pacham chet pe tara nowm lah.3Hungh kowi dow iungra pacham uowi lah,mawng kowi dow tachi tanawmra pacham uowi lah.4Ngarawng ngarai miuüa kowi aia pacham takhula lah,akhowng takla miuüa kowi aia pacham khowngah lah;krawi chang nowng miuüa kowi aia pacham piakta bowk lah.5Sat hai lama uowi mowr aia kowi maru pacham ringkawah lah,chowngchowng saksakma aia kowi maru pacham kramah lah.6Pram vüi uang uang mih lainowmma iung chekhai,now krawng vüi uang sirinchow uang mih lainowmma iung chekhai.Nami iawng aia dow aia maru-uüa tut-e pacham iung lah.7Aia chowng kowi ringkaw Thurai miuüa dow ahuma pacham ka prasi lah,lama uowi mowr amatni kowh chownglawng dow iungra hown atekma pacham uowi lah.8Aia kowh pren sünghi dow mami sata hownia paimi sata mowr pacham chowng lah,aia kowh pren dow Iufratis aw hownia prenchur nammowt mowr pacham chowng lah.9Süngrüp süngkangma kowi kowh uowi miuüa mih aia pur kowi pacham khamsum khamdaw lah,aia kowi dow aia kowh ransu-uüa mih tabawk krawm se pacham chupah lah.10Tarsis marow hai süngdum kowi kowh manguüa mih aia kowi pacham peah mangmu lah,Seba pren hai Sheba pren kowi kowh manguüa paw aia kowi pacham peah awmrawm sung lah.11Manguüa maten mih tabawk krawm se aia kowi pacham chupah lah,now chenchapuüa maten aia kowi pacham chang pe lup lah.12Tawngplawng kowchow panow aia dow ngaraima miuüa kowi nakrawi khowngah reng kown;nowng chang powng changra kowi uowi miuüa kowi aia nakrawi lawngah reng kown,now lü khowng miuüa kowi aia nakrawi khowngah reng kown.13Now aia dow kür uowi dowi mih alawng takla miuüa kowi nasaksing sanaah reng kown,aia dow akhowng takla miuüa kowi nakrawi lawngah reng kown.14Amatni kowi dow nowng chang powng chang miuüa rut hownia aia natowkala reng kown.Tawngplawng kowchow panow aia mik kowi dow naiawngünuüa kowh vi asung uowima chekhai.15Mang dow chowngdawng sakklangma pacham sing reng lah,aia kowi dow Sheba pren kowi kowh kuh maru pacham peah lah.Aia vüi kowi atungma maru pacham chup pe Thurai lah,ni chut chi, “En pakaah prasi,” pahai maru pacham tek pe lah.16Aia kowh pren kowi dow chakkham ahuma pacham uowi lah,hungma mawngma süng kowi paw luprak ahuma pacham phaw lah.Üa hai laih kowi mih Lebanawn süng kowi kowh luprak iawng pacham phaw lah,now marow kowi kowh maru-uüa mih dowm kowi kowh pram iawng atekma pacham uowi lah.17Aia kowh ming iung nang iung dow chowngchowng saksakma anikma pauowi reng lah,sat kowh anowi uowi mowr aia kowh ming iung nang iung dow pacham uowi reng lah.Aia hownia dow chenchap maten pacham tawi ka prasi lah,aia kowi dow, “En dow prasira uowima,” pahai maru pacham tek pe lah.18CHAKRAMANG Israeluüa kowh Thurai dow akiow pauowi lah;awdara uowima mih lup chang reng mih dow aia chowtaih chekhai.19Kri kraingra uowima mih aia kowh ming dow chowngchowng saksakma akiow pacham uowi lah,aia kowh kri kraingra dow palusama kowi atekma pacham uowi reng lah.Amen! Amen!20(Jese chapa David kowh Thurai chup maten dow mami mowr kowi chur mih chowbowt).The Seed Company