Meng Lai7
Mami dow Benjamin krungchak kowi kowh Kusuüa lawnguan kowi CHAKRAMANG tut-e David tekah mih meng chekhai.
1Aw CHAKRAMANG, ang kowh Thurai,ang dow en tut-e chowtaih uang tatung tanim reng.Uang kawikrawi ang miuüa rut hownia lawng ang diah,amatni hownia uang towkala ang diah.2Nadowi now krangsi iawng amatni naiaita ang nak kown,amatni dow nadita ang naknak kown.Nalawng ang kown mih miapaw uowi dowi chekhai.3Aw CHAKRAMANG, ang kowh Thurai,ang kowh atawi ama uowi khai hanow,ang changta ngak mih uowi khai hanow,ang auiua luk kowi ang changta ngak khai hanow,aiawnglowma ang kowh ransu kowi ang changah ngak khai hanow,ransu-uüa uang krawi ang hanow pauang saita ang lah;amatni dow krawng kowi pacham theu ang lah,now pacham thua ang lah.Naiawng hai ang kowh ringkawra pacham piakta ang büah lah.6Aw CHAKRAMANG, kunmarauma hown awr rü diah,ang kowh ransu-uüa kowi kingküaah diah.Ang vüi kowi awr iowng diah,now en tekta iawng chet tara nowm diah.7Chenchap maten kowi en pur kowi pe takua talawmah diah,now amatni kowi dow en uowi rah mukuang hownia kruitownah diah.8CHAKRAMANG dow chenchapuüa kowi chet pe tara reng chekhai.Aw CHAKRAMANG, ang achinawmma pami chet ang diah,ang dow chang lup ngak dowi chekhai.9Aw anowmma mih Thurai, en dow maru kowh sak hai saktuak mih nowk khai reng;en dow maru ngakuüa kowh lup ngak chang en taingta pe reng.Tawkche achinawmma miuüa kowi dow aiungma en towah reng chekhai.10Ang kowh kawngma dow Thurai chowtaih,aia dow saktuak chinawmma miuüa kowi lawngah reng.11Thurai dow tara nowm chet miia chekhai,maru ngakuüa kowi dow ni towng aia kunmarauah reng.12Maru che tarip dowi hanow Thurai dow aia kowh saidawng mih nasükah kown,now aia kowh salangba mih navüiah kown.13Aia dow nasaila maru kown mih rutchün khawkleng kamrütta kaneu khowk,maih lün pluplup mih aia kowh leba sek dow aia vüita kaneu khowk.14Maru ngak kowh saktuak dow angak kangowh chekhai,aia dow nakrawi piak kown mih sangkrang reng,now tek dai lai reng chekhai.15Aia dow maru dowla müa krawi thai kuam reng.Tawkche aia thaiah mih kuam kowi dow aia chowtaih dowh reng.16Aia kowh angak sung dow aia luk kowi chowtaih uang plan reng,aia krawi chang nowng mih klai dow aia chowtaih ka ripra reng.17CHAKRAMANG dow anowmma chet tara reng chekhai;naiawng rakowi aia kowi ang natek pe awmrawm lai kown,lang kri lang kraing mih CHAKRAMANG vüi ang natek kiow meng kown.The Seed Company