Meng Lai66
Mami dow David kowh meng chekhai.
1Aw lusa kowi kowh maru maten,enni bowkbowk Thurai kowi kiow hai apiawma how büa diah.2Aia kowh kraingra uowima mih ming kowi kiow büa diah,ringkawma hown aia kowi rowsiah diah3Thurai kowi maiawng tek pe büa diah, “En kowh lup dow lainowmma ringkawra hai kramra uowi chekhai,en kowh kür rakowi en kowh ransu-uüa mih en tut-e nauang khamsum kown.4Lusa kowi kowh maru maten dow nachupiia en kown;amatni dow en vüi kowi natek en rowsi meng kown,now en ming hown natek rowsi meng kown,” pape diah. [Sela]5Uang büa diah, Thurai changah mih lup maten uang mü büa diah,maru vüi kowi kowh aia changah mih lup dow ringkawra hai kramra uowima chekhai.6Aia dow sata kowi mih akang khawngma changah khai;a-i kowh pipu-uüa dow khawk hown nami iawng haipown khai.Uang büa diah, aia rakowi nami pren kowi a-i piaw diah sik.7Aia kowh kür hown aia dow chowngchowng saksakma chowm mang khai,aia kowh mik dow chenchap maten luk kowi krawi tang mü reng chekhai.Thurai kowi kingküa miuüa dow kowmatia kowi aiukma hang pacham tanü lah. [Sela]8Chenchapuüa low, a-i kowh Thurai kowi rowsi büa diah,aia vüi kowi dow atünma tek rowsi meng büa diah.9Aia chowtaih pe a-i singra reng,aia dow lawng a-i reng chekhai.10Aw Thurai, en dow chaing anging reng chekhai,maih kowi maru chaing tai mih iawng en chaing anging khai.11Anging kowi dow leng kowi en pe tasowk anging khai,anging luk kowi kurdik ahuma en tang anging khai.12Anging kowh ransu-uüa kowi dow anging luk kowi en pe changah alow khai,maih hai tui dawng kowi cham mang khe kowh iawng en pe mang anging khai.Nachenganchepaw kawmat dow akhawr uowi dowi mih rah kowi en uang pawla anging khai.13Tikah mih uanap dow en kim kowi ang nauang pawla kown,en tut-e kowh ang takhamta mih maten dow ang nachang kown.14Naiawngün takham laiklow dow ang nawr hown kowh ang tekah mih chekhai.Nami dow ang kla phih khe kowh ang nawr hownia ang lawtah mih laiklow chekhai.15En vüi kowi aiuk akauma mih tawncher hown ang nachang en tikah mih uanap kown,chia, rua hai ruapur tikah hanow nam iungma mih uanap ang nachang en kown.16Thurai kowi enni ringkaw mih maten uang now uang sünta büa diah,ang vüi kowi kowh aia chang mih maten dow ang nalawp enni kown.17Aia tut-e dow ang awr lü awr leng khai,aia kowi dow ang rowsi kiowriah khai.18Ang sak kowi che angak uowi e aia mih ang laiklow nasünta kown nadowi,now ang awr lü awr leng mih paw aia mih nahawt sünta ang kown nadowi.19Nachenganchepaw Thurai dow ang awr lü awr leng mih sünta ang khai,aia dow ang awr lü awr leng mih kowi pe ang ching khai.20Thurai dow akiow pacham uowi reng lah!Aia dow ang awr lü awr leng mih hawt nuata ang dowi chekhai,now aia kowh achur uowi dowi mih sakraura paw ang luk hownia aia taingta dowi chekhai.The Seed Company