Meng Lai59
Mami dow David kowh meng chekhai. Sawl dow David kowi saita kown nau rakowi David kowh kim re-e kowtow maru khai. Mami meng dow nami khin khe kowh ruiah mih chekhai. Mami meng dow “Hangkow piak diah,” pami meng owi iawng natekah kown.
1Aw Thurai, ang kowh ransu-uüa hownia uang lawng ang diah;kingküa ang miuüa hownia uang towkala ang diah.2Chang lup ngak miuüa hownia lawng ang diah,sai maru miuüa hownia lawng ang diah.3Amatni dow sai ang kownkow hawt pawm ang khai,kramra uowima mih maru ngakuüa dow ahawmsang kingküa ang khai.Aw CHAKRAMANG, naiawng amatni krawi ang mih dow ang changah ngak kowh nadowi chekhai.4Tawng iawng mih atawi paw ang chang dowi.Nachenganchepaw amatni uang kawikrawi ang hanow uang kingküa ang khai.Ang kla phih mih sam mü madiah,awr rü hanow uang khowng ang diah.5Aw lang kri lang kraing mih CHAKRAMANG Thurai,en dow Israeluüa kowh Thurai chekhai.Awr rü hanow chenchap maten kowi ripah diah,kuanlama mih maru ngakuüa kowi mapaw hangkow saksing sanaah diah. [Sela]6Amatni dow iak pra uang plan reng;kui au klow iawng pla büah reng chekhai,now marow kowi kowh arah towng kowi krawi len panglang büah reng chekhai.7Tawng chow amatni tek mih sünta madiah,amatni kowh laiklow dow saidawng iawng pe ngarau reng.Amatni tek mih, “A-i kowh laiklow miapaw ta dowi,” pakhai.8Nachenganchepaw aw CHAKRAMANG, amatni kowi dow en renah khai;naiawngün chenchapuüa kowi en prawng renah khai.9Aw Thurai, en kowh kür luk kowi ang owmsak reng,en dow ang kowh akhawtma mih kangchawngra kimkrowng chekhai.10En dow en kowh achur uowi dowi mih sakraura hown en nauang sakrau ang kown,ang kowh ransu-uüa luk kowi en nape awng ang kown.11Aw CHAKRAMANG, en dow anging kowh kawngma chekhai,ang kowh ransu-uüa kowi alenma hangkow saita diah;nadowi now ang kowh maru-uüa mih nami lawnguan natamata kown chekhai.Naiawng rakowi en kowh kür hown amatni kowi cham pe powtah panglang diah,nami kung kowi phai anging pur kowi amatni kowi pe timah iang.12Amatni dow nawr hown krawi chang ngak khai,maru kowi krawi tek dai lai hai krawi pe piati büah khai.Naiawng rakowi amatni kowh bawri rakowi pacham kla phih lah.13En kowh kunmarau hown amatni kowi piakah diah;amatni bowkbowk kowi asaima piakta diah.Nahanow Jakawb krungchakuüa luk kowi chowm mang mih dow Thurai chowtaihpami prenchur nammowt mowr natuk bowk kown towbowt.14Amatni dow iak pra uang plan reng;kui au klow iawng pla büah reng chekhai,now marow kowi kowh arah towng kowi krawi len panglang büah reng chekhai.15Amatni dow mapra lai paipra lai krawi cham chakkham büah reng,du pat ka cha chakkham dowi hanow amatni dow ngir sulu reng chekhai.16Nachenganchepaw ang dow en kowh kür lawnguan kowi ang natek meng kown,rau towng apiawma hown en kowh achur uowi dowi mih sakraura lawnguan kowi ang natek meng kown.Tawngplawng kowchow panow ang kowh akhawtma mih kangchawngra kimkrowng dow en chowtaih,now ang kla phih khe kowh tatung tanimra paw en chowtaih.17Aw Thurai, en dow ang kowh kür chekhai,en vüi ang natek rowsi meng kown.Ang kowh akhawtma mih kangchawngra kimkrowng dow en chowtaih;en dow en kowh achur uowi dowi mih sakraura uang tüng ang reng chekhai.The Seed Company