Meng Lai57
Mami dow David kowh meng chekhai. Mami meng dow Sawl hownia powt hanow puk kowi cham tapet khe kowh aia tekah mih chekhai. Mami meng dow “Hangkow piak diah” pami meng owi iawng natekah kown.
1Saksing sana ang diah, aw Thurai, saksing sana ang diah.Tawngplawng kowchow panow ang dow en tut-e chowtaih tatung tanim reng,ang luk hownia mami phih tahen dowi mowr dow en tut-e ang nauang tatung tanim kown,a-u lap krüa kowi uaklinguüa tatung tanim iawng en tut-e ang nauang tatung tanim kown.2Lang kri lang kraing mih Thurai kowi ang nahaw kown;aia kowh laikham maten town ang reng mih Thurai kowi ang nahaw kown.3Aia dow mukuang pren hownia naiu klang ang kown, now nauang takhula ang kown;krawi piak ang miuüa kowi dow aia nape kaah rukrai kown.Thurai dow aia kowh achur uowi dowi mih sakraura nauang tüng ang kown,aia kowh kaah sakowm mih lup aia nauang tüng ang kown. [Sela]4Ang kowh ransu-uüa dow umta ang lut khai,amatni dow chak sakkrai mih krangsi iawng chekhai.Amatni tut-e dow reh hai leba sek uowi chekhai,amatni kowh dai dow achukma mih saidawng iawng chekhai.5Aw Thurai, en kowh kri kraingra dow kuang luk kowi pat pacham tatüng lah,palusama kowi dow en kowh kraingra pacham tatüng lah.6Ang kowh ransu-uüa dow ang mangah mih tiama kowi chak ang leng khai,amatni chang ang nowng rakowi lainowmma ang kawm khai.Amatni dow ang dowla müa thai ang kuam khai.Tawkche naiawngün kuam kowi dow amatni chowtaih dowh büah khai. [Sela]7Aw Thurai, en luk kowi ang kowh owmra khawtma chekhai;tek meng se ang nakiow en kown.8Ang kowh sak ow, awr thowr bowt,ang kowh tingteng hai taraw ow, awr tün bowt.Sat lawt dowi rawn ang narü bowt kown,9Aw CHAKRAMANG, chenchapuüa pungmadawng kowi ang natek en awmrawm lai kown,maru kawmuüa pungmadawng kowi meng hown ang nakiow en kown.10Tawngplawng kowchow panow en kowh achur uowi dowi mih sakraura dow hu krang kuang kowi tawk prang chekhai,now en kowh kaah sakowm mih paw hu krang uangnim kowi tawk prang chekhai.11Aw Thurai, en kowh kri kraingra dow mukuang kowi pacham tatüng lah,en kowh kraingra dow palusama kowi pacham tatüng lah.The Seed Company