Meng Lai55
Mami dow David kowh meng chekhai. Mami meng dow aiang uowi mih tünteu chang müa hown natekah kown mih chekhai.
1Aw Thurai, ang awr lü awr leng mih hawt sünta ang diah,kar se ang uang lü khowng mih kowi hangkow nuata ang diah.2Ang kowh laiklow sünta ang hanow klang ang diah.Tawngplawng kowchow panow ang dow krat pusa dawng kowi ang uowi khai.3Ang kowh ransu-uüa dow uang krawk ang khai,maru ngakuüa dow chang ang nowng khai.Amatni dow pe ang krat pusara khai,amatni dow kunmarau kowh chang ang nowng khai.4Ang dow lainowmma takrow khai;now nakowng kown mih kowi lainowmma ang takram khai.5Kram lai bowt kowh ang chür klukluk towbowt,ang takrow krang chur khai bowt.6Naiawng rakowi ang tek mih, “Owh, uatur iawng ang kowh lap uowi panü!Ang cham iowta pe hanow ang khalat diah!7Alakma kowi ang cham iowta pe hanow,ririm raramma mih süngrüp süngkangma kowi ang ka uowi diah. [Sela]8Alenma ang cham powtta pe hanow ang cham ka tatung tanimra diah,liku uangchak iawng akürma mih ransu-uüa hownia ang khalat diah,” pakhai.9Aw CHAKRAMANG, ransu-uüa luk kowi uang pawla pe piakra diah,amatni sangkrangta mih iawng tawngpaw hangkow pe phawah diah.Tawngplawng kowchow panow marow kowi kowh phaw mih maten ang khi khai bowt;nakowi kowh maru-uüa dow tabawp tatep prungrung hai taran urlur chekhai.10Tabawp tatep mih hai taran urlur mih dow marow kowi taum lut khowk chekhai,nami marow kowi dow lup ngak hai nowng chang powng changra atekma chekhai.11Marow kowi dow piakra lup kangowh taih bowt chekhai,marow plawt kowi amatni mih krawi chang nowng hai krawi kuan maru reng chekhai.12Pe ang rukrai miuüa che ang kowh ransu chekhai panü,ang ia kham kown taih diah.Kingküa ang miuüa che akeng mih chekhai panü,amatni hownia ang ia tapet kown taih diah.13Tawkche naiawng chang ang mih dow ang hown tale mih maru chowtaih,aia dow ang kowh maru hai ang kowh auiua sin chekhai.14Angching kowh dow tatukra iungma chekhai,now Thurai chup kim kowi taiua takua reng chekhai.15Ang ransu-uüa dow linlanma pacham kowng lah,kowng khin nadowi tak khe amatni dow pacham kowng lah.Tawngplawng kowchow panow amatni kowh kim üa hai saktuak kowi dow angak kangowh chekhai.16Nachenganchepaw ang dow Thurai tut-e nalü khowng kown;nahanow CHAKRAMANG mih nauang lawng ang kown.17Ang dow rau-e khe, sat downg khe hai iak-e khe kar se aia tut-e naawr chawk lai reng kown,now aia dow ang kowh klow nahawt sünta ang kown.18Sen ang mih ransu-uüa dow akawmma chekhai.Tawkche aia dow tasen hownia aiungma uang lawngla ang khai.19Thurai dow chowngchowng saksakma chowm mang reng chekhai,aia dow ang awr lüah mih nasünta ang hanow amatni kowi naripah kown. [Sela]Tawngplawng kowchow panow ransu-uüa dow dia sar büah dowi chekhai,amatni dow Thurai kowi kram paw kram büah dowi chekhai.20Ang auiua dow aia auiuauüa kowi kingküaah khai,now aia dow aia kowh laikham mih piakta khai.21Aia kowh laiklow dow adechow chekhai.Tawkche aia sak kowi dow kingküa kown mih saktuak kangowh chekhai.Aia kowh laiklow dow sakka lak-e lang ding chekhai.Tawkche aia dow achukma mih saidawng iawng krawi pe ngarau reng chekhai.22En kowh kurdik maten CHAKRAMANG luk kowi apta diah,nahanow aia mih naming nakhet en reng kown.Achinawmma miuüa kowi dow aia nape tatheuah kown nadowi.23Tawkche aw Thurai, sai maru miuüa hai limma maru miuüa kowi dow kowngra kowi en nakuakah kown,amatni kowi dow kowng khin nadowi tak khe en nape kowngah kown.Ang dow en luk kowi neplawng nesak reng kown.The Seed Company