Meng Lai34
David kowh meng. Abimelek pur kowi David chang thuk iow kowh David kowi Abimelek prütah khai. Mami dow Abimelek hownia David powt khe kowh meng chekhai.
1CHAKRAMANG kowi atungma ang nakiowah reng kown,aia kiow müa meng dow ang nawr kowi atungma nauowi reng kown.2CHAKRAMANG lawnguan kowi ang nachang bawri reng kown,nami tata hanow khamsum khamdaw miuüa dow pacham awmrawm lah.3Chu, CHAKRAMANG kowh kri kraingra lawnguan a-i taiua phuang diah sik,chu, aia kowh kri kraingma mih ming kowi a-i taiua rowsi diah sik.4Ang hawah hanow CHAKRAMANG dow uang klang ang khai,kramra chap maiow hownia aia dow uang lawng ang khai.5Ka khowng kownkow aia prakowi tang mü miuüa dow awmrawm reng,amatni kowh lumowr kowi dow rukrai mih powm nauowi kown nadowi bowt.6Khowng ang kown mih miapaw uowi dowi kowh CHAKRAMANG kowi ang hawah khai.Nakhowk khe aia dow uang klang ang hanow akrat pusara maten hownia uang lawng ang khai.7CHAKRAMANG kowi ringkaw miuüa kowi dow CHAKRAMANG kowh kramamu towkala reng,amatni kowi dow tavir lut CHAKRAMANG kowh kramamu tawi chawngah reng chekhai.8CHAKRAMANG iung krang tuk kown nau now chaingah diah,aia tut-e kowh tatung tanim miuüa dow prasira uowima chekhai.9Thurai maru-uüa low, CHAKRAMANG kowi ringkawma hown kramah büa diah.Tawngplawng kowchow panow aia kowi ringkaw miuüa dow tawngpaw khawr dowi chekhai.10Krangsila powrchow khowm padow khawr chakkham rakowi sakkrai hown kawm reng chekhai.Nachenganchepaw CHAKRAMANG kowi cham miuüa dow aiung sia khawr dowi chekhai.11Chauüa low, uang büa diah, now ang kowh laiklow uang sünta büa diah,CHAKRAMANG kowi naringkawah kown mih krang ang sang enni sow.12Apiawma nasun chownglawng kown nau mih mia chow uowi?Apiaw apama hai chowngdawng sakklangma sing kown mia chow nau?13Naiawng che enni nau hanow enni kowh dai hownia lai ngak hang pacham lawt lah,now en kowh nawr hownia nakuanla maru kown mih lai hang pacham lawt lah.14Lup ngak hownia alakma lang uowi diah, now chang lup iung diah.Maru maten hown taking tasangra nauowila reng kownkow towsak diah.15Tiama nowm kowi mang miuüa luk kowi dow CHAKRAMANG kowh mik uowi reng chekhai,amatni kowh hawk klow nasünta pe kownkow aia kowh param dow auowma uowi reng chekhai.16Tawkche chang lup ngak miuüa kowi dow CHAKRAMANG kingküaah reng.Nami dow amatni kowh ming mih lusa hownia naphiawkta pe kownkow chekhai.17Chang lup iung miuüa kowh kar klow dow CHAKRAMANG sünta pe reng,amatni kowi dow akrat pusara maten hownia aia lawngah reng chekhai.18Sak piak miuüa tut-e dow CHAKRAMANG tawi uowi reng chekhai,sak ter iawmlawm khowk miuüa kowi dow aia lawngah reng chekhai.19Achinawmma mih maru dow ahuma kla phih reng chekhai.Nachenganchepaw aia kowi dow atungma CHAKRAMANG lawngah reng.20Aia kowh hut maten CHAKRAMANG takhula pe reng,aiamat kowh hut dow lowkchow khowm nataklowk kown nadowi.21Maru ngakuüa dow amatni kowh lup ngak rakowi nakowng kown,lup iung chang miuüa kowi sui miuüa dow naka ripra kown.22Tawkche aia naruüa kowi dow CHAKRAMANG lawngah reng chekhai,aia tut-e tatung tanim miuüa dow miapaw sumra kowi nauowi kown nadowi.The Seed Company