Meng Lai33
1Thurai maru-uüa low, CHAKRAMANG kowi awmrawmma kowh how büa diah,achinawmma mih maru-uüa kowh lup dow aia lawnguan kowi natek meng kown mih chekhai.2Tepla taraw se CHAKRAMANG kowi tek pe awmrawm lai büa diah,aia vüi hamüt iang mih taraw tep büa diah.3Meng sar hown aia kowi kiowah büa diah,tünteu iungma hown awmrawmma tek meng büa diah.4Tawngplawng kowchow panow CHAKRAMANG kowh laiklow dow anowmma chekhai,aia kowh lup maten dow kaah sakowm reng chekhai.5CHAKRAMANG dow lup iung hai tara nowm kowi nau reng,aia kowh achur uowi dowi mih sakraura dow palusama kowi atekma chekhai.6CHAKRAMANG dow aia kowh ana hown mukuang mih thawpah khai,now nakowi kowh uowi mih maten paw aia kowh laiklow hown thawpah khai,7Aia dow sata kowi kowh tui arasang kuaah hanow chunah khai,naiawngün tui dow abüpma mih atowk rah kowi aia towah khai.8Lusa kowi kowh maru maten CHAKRAMANG kowi pacham kram lah,lusa kowi kowh maru maten mih aia kowi pacham ringkawah lah.9Tawngplawng kowchow panow aia laiklow hown lusa dow uang phaw khai,aia peta ana hanow lowra chap uang phaw khai.10Paprenma aluchowuüa kowh sangkrangra dow CHAKRAMANG piakta pe reng,amatni tuakta iawng CHAKRAMANG pe phawah dowi chekhai.11Nachenganchepaw CHAKRAMANG kowh sangkrangra dow anikma chekhai,aia kowh sangkrangra dow chowngchowng saksakma anikma uowi reng chekhai.12CHAKRAMANG kowi kham Thurai mih prenchakuüa dow prasira uowima chekhai,aia changla dawngthawnguan kownkow aia kloah mih chenchapuüa dow prasira uowima chekhai.13CHAKRAMANG dow mukuang pren hownia lusa kowi iu mü reng,aia dow maru maten luk kowi krawi tang mü reng chekhai.14Lusa kowi kowh uowi mih maru-uüa kowi dow aia iu müah reng,amatni kowi dow aia kowh uowi rah hownia aia iu müah reng chekhai.15Lusa maru maten kowh sak dow CHAKRAMANG thawpah mih chekhai.Naiawng rakowi lusa maru changah mih srui aia tuk bowk chekhai.16Siphai hawmh akawmma chepaw amia mang paw kowmatia kowi ia towkala dowi chekhai,now tasen kiakma mih siphai paw aia kowh kür hown kowmatia kowi nowng towkala dowi chekhai.17Kawrnga kowi neplawng nesak kowh naawng tasen kown tuak mih maru dow bualama chekhai.Tawngplawng kowchow panow kawrnga dow akürma chepaw ia towkala maru dowi chekhai.18Nachenganchepaw CHAKRAMANG kowi ringkawma hown kram miuüa kowi dow aia mingkhetah reng chekhai;aia kowh achur uowi dowi mih sakraura kowi owmsak miuüa kowi dow aia mingkhetah reng chekhai.19Amatni kowi dow kowngra hownia CHAKRAMANG lawngah reng,amatni kowi dow khown hownia aia pe plaiah reng chekhai.20Anging dow CHAKRAMANG luk kowi owmsak reng chekhai,aia dow anging kowh khowng mih hai anging kowh kawngma chekhai.21Aia rakowi anging kowh sak napiaw reng kown,anging dow aia kowh ming chimsaima mih kowi neplawng nesak reng kown.22Aw CHAKRAMANG, en kowh achur uowi dowi mih sakraura anging luk kowi pacham uowi reng lah.Tawngplawng kowchow panow anging dow en luk kowi chowtaih neplawng nesak reng.
The Seed Company