Meng Lai32
David kowh meng.
1Thurai kowi kingküa mih aprek lawtra ka mih,Thurai lawtta pe angak mih maru dow prasira uowima.2Thurai klowk pe angak dowi mih,kuan kown mih saktuak uowi dowi mih maru dow prasira uowima chekhai.3CHAKRAMANG, en tut-e dow atungma ang uang lü uang leng reng chowdiah.Tawkche ang kowh angak dow ang taphuang dowi chekhai.Naiawng rakowi ang lu prasi towng ang kow uak khai.4Nakhowk khe dow ni chut uar prowt chi en ripta ang hüah chekhai,ang kowh kür dow satma khin khe kowh tui kang mih iawng e rürü chekhai. [Sela]5Nakhowk khe ang kowh angak mih en tut-e ang uang taphuang khai,ang kowh aprek mih ang khuah dowi bowt chekhai.Ang tek mih, “Ang kingküaah mih laiklow CHAKRAMANG tut-e ang taphuang bowt kown,” pakhai.Now ang changta angak mih aprek dow en lawtta ang khai. [Sela]6Naiawng rakowi aw CHAKRAMANG, khin uowi reng tak khe en maru-uüa mih en tut-e pauang lü khowng lah.Nahanow tuikling mangma iawng mih phih uang ting khe paw amatni mih natawi piak kown nadowi bowt.7En dow ang kowh tapetra chekhai,en dow akrat pusara hownia uang towkala ang khai.En lawng ang rakowi how se ang rowsi en khai. [Sela]8En tek ang mih, “Ang dow CHAKRAMANG, ang nape en chanlaira kown,tawng mih tiama kowi chow amang kla mih ang natüng en kown;ang natüng nasang en hanow ang namingkhet en reng kown.9Tawngpaw tuk dowi mih kawrnga hai kawrngaramchük iawng hang uowi büa diah;amatni kowi dow mum pe nawrbawng hanow leng hown akhuowk takla,nadowi now en naura prakowi en cham ia pawla kown nadowi,” pakhai.10Maru ngakuüa dow lainowmma nakawm nakrat kown;CHAKRAMANG luk kowi kowh neplawng nesak miuüa dow aia sakraura naka kown,now amatni dow aia kowh achur uowi dowi mih saksing sanara naka reng kown.11Naiawng rakowi CHAKRAMANG maru-uüa low,aia luk kowi piaw hai awmrawm büa diah.Saktuak achinawmma miuüa low,enni bowkbowk tek awmrawm meng büa diah.The Seed Company