Meng Lai31
Mami dow David kowh meng chekhai.
1Aw CHAKRAMANG, en tut-e chowtaih ang tatung tanim reng.Naiawng rakowi tawng khe paw hauang pe ka ang rukrai diah.En dow achinawmma mih Thurai chekhai.Naiawng rakowi uang towkala ang reng diah.2Ang awr lü mih hawt sünta ang diah,now alenma uang lawng ang diah.Takhula ang kownkow uang chowng singku huamang diah,now akhawtma mih kangchawngra kim uang chowng diah.3Ang kowh Singku Huamang dow en chowtaih,ang kowh akhawtma mih kangchawngra kim paw en chowtaih.En kowh ming iung natownla kownkow uang tüng ang tiama diah,nami tiama prakowi dow en kruila ang reng diah.4Ransu-uüa chakta ang hüah mih leng hownia uang lawng ang diah.Tawngplawng kowchow panow en dow ang kowh tatung tanimra chekhai.5Aw CHAKRAMANG, ang kowh lümla mih en rut kowi ang uang apta khowk;tawngplawng kowchow panow en dow kaah sakowm mih Thurai chekhai,phih hownia uang lawng ang reng mih dow en chowtaih chekhai.6Asung uowi dowi mih arup aren kowi chup miuüa kowi ang sui reng chekhai.Nachenganchepaw ang dow CHAKRAMANG luk kowi chowtaih neplawng nesak reng.7En kowh achur uowi dowi mih sakraura ang ka rakowi napiaw hai ang naawmrawm reng kown;tawngplawng kowchow panow ang tuak krat mih en khi ang reng chekhai,now akawm akrat hown ang uowi mih paw en tuk reng chekhai.8Ang kowh ransu-uüa rut kowi en apta ang hüah dowi chekhai,ang nau rah kowi cham ia kowila kownkow thaulangma en tow ang khai.9Aw CHAKRAMANG, saksing sana ang diah.Tawngplawng kowchow panow akrat pusa hown ang uowi thüm chekhai,tuak krat lai rakowi ang kowh mik hai kow uak mih nowm khowk.10Akrat pusara kangowh hown ang nakowng kown chowbowt,tuak kawm tuak krat hown ang kowh chowng chur kown chowbowt.Ang kowh angak hu lai rakowi ang kowh kür uowi dowi bowt chekhai,ang kowh hut khowm padow raw bowk khowk chekhai.11Ang kowh ransu-uüa mih changla ang rensi kau khai,ang kowh kimping namkhetuüa khowm padow tawi changla ang rensi kau khai bowt.Tuk ang miuüa maten dow ang tut-e uang kown mih khowm kram khai bowt,amatni dow tiama rawng kowi krum ang hanow powt khai.12Kowng miuüa kowi maru tamata iawng ang kowi paw maru tamata ang khai bowt,ang dow kaah atawng dowk mih tuikawng teuia iawng towbowt.13Maru prawngren ang mih laiklow ang ta khai bowt,ang riaret kowi taum lut kramra kangowh chekhai.Amatni dow nakingküa ang kownkow thawp prengia khai,amatni dow nasaita ang kownkow sangkrang büa khai.14Nachenganchepaw aw CHAKRAMANG, en luk kowi ang neplawng nesak khai,“En chowtaih ang kowh Thurai,” pahai ang tek reng chekhai.15Ang kowh chownglawng dow en rut kowi chekhai;uang krawi ang mih ransu-uüa rut hownia lawng ang diah.16En nar luk kowi en kowh saksing sanara mih anowi iawng pauang tatüng lah,en kowh achur uowi dowi mih sakraura hown uang lawng ang diah.17Aw CHAKRAMANG, en tut-e ang uang lü khowng khai.Naiawng rakowi hauang pe ka ang rukrai diah.Maru ngakuüa kowi phai pe kaah rukrai diah,now makownguüa uowi rah ririmma pacham uowi lah.18Bawrima hai sui saktuak hown tek dai lai miuüa kowh nawr mih kowpta pe diah,amatni dow achinawmma mih maru-uüa kowi kingküala kownkow tek dai lai mih chekhai.19Ringkaw en miuüa kowi en peah iungra mih dow lainowmma kri kraing khai,en tut-e kowh tatung tanim miuüa kowi dow maru maten pur kowi en peah iungra reng chekhai.20Amatni kowi nakingküaah kownkow maru sangkrang khe en tut-e en petah reng chekhai,amatni kowi dow ransu-uüa prawng renra hownia en tut-e en pe tatung tanimah reng chekhai.21CHAKRAMANG dow akiow pauowi lah;ang uowiah mih marow kowi ransu-uüa uang rumta ang lut khe,awdara uowima hown aia dow aia kowh achur uowi dowi mih sakraura tüng ang khai.22“CHAKRAMANG powtta ang khai bowt,” padow ang takrow lai kowh ang tek khai.Nachenganchepaw nauang khowng ang kownkow ang haw en khe en sünta ang khai.23Thurai maru-uüa low, CHAKRAMANG kowi sakrauah büa diah;CHAKRAMANG dow kaah sakowm miuüa kowi takhula reng chekhai.Tawkche bawrima miuüa kowi dow achima aia peah ripra reng chekhai.24CHAKRAMANG luk kowi owmsak miuüa low,sakkhawtma hai sakkraingma uowiah büa diah.The Seed Company