Meng Lai144
Mami dow David kowh meng chekhai.
1CHAKRAMANG kowi kiowah diah,aia dow ang kowh Singku Huamang chekhai.Aia dow sang ang tasen khai,aia dow sang ang saidawng dowk khai.2Aia dow ang kowh kaah sakowmma mih khowng mih chekhai,now ang kowh akhawtma mih kangchawngra kim chekhai.Aia dow ang kowh alowngma mih tatung tanimra hai lawng miia chekhai,aia dow ang kowh kawngma chekhai,now aia tut-e ang tatung tanim reng chekhai.Aia dow akeng chenchapuüa kowi ang nimkrüa kowi uang pawla reng chekhai.3Aw CHAKRAMANG, tawngplawng kowchow lusa maru kowi khowt pat en mingkhetah khai?Tawngplawng kowchow khowt pat lusa maru chauüa kowi en towah sak khai?4Lusa maru dow kawli krowngchow taih,aia kowh chownglawng dow nim tama rürü mih iawng tama reng chekhai.5Aw CHAKRAMANG, mukuang nitah lang hanow lusa kowi uang iu dowm diah,akhük nauang lawt kownkow hungma mawngma kowi uang iu kakah diah.6Ang kowh ransu-uüa kowi uang chin pe pla nowi hanow uang setta plawt diah,amatni kowi dow en kowh leba sek hown pe powtah diah.7Mukuang hownia iu towkala ang diah;tuikling mangma iawng mih kratra hownia uang pe plai ang diah,now akeng chenchapuüa rut hownia uang pe plai ang diah.8Amatni kowh nawr kowi dow dai lai kangowh chekhai,amatni dow hawmlawm rut chawkla se dai lai hown kham sawi reng chekhai.9Aw CHAKRAMANG, en vüi kowi ang natek en meng sar kown,hamüt iang mih tingteng tün hown ang natek en rowsi meng kown.10Manguüa kowi dow en pe awngah tasen reng chekhai,en kowh nar David kowi dow ransu-uüa kowh saidawng hownia en towkala reng chekhai.11Akeng chenchapuüa rut hownia uang towkala ang hanow pe plai ang diah.Amatni kowh nawr kowi dow dai lai kangowh chekhai,amatni dow hawmlawm rut chawkla se dai lai hown kham sawi reng chekhai.12Anging kowh chapauüa dow ngeuüa hownia akhawtma mih singh pawi iawng pacham iuksown lah,now anging kowh chamauüa paw mang kim kowi kowh klangiungma mih kimchüng iawng pacham phaw lah.13Anging kowh cha bawk kowi dow chakkham achap akawm atekma pacham uowi lah,anging kowh ruapur hawmh ün paw dowm kowi athawng aiawng pacham pen chah lah.14 Anging kowh chiala ün aiuk akauma hai akürma pacham phaw lah,naiawngün dow adik adikma mih uanh pacham ia tawn lah.Anging kowh tiama lengkawng kowi kar klow nguk klow hangkow pacham ta lah.15Naiawng uowi mih maru-uüa dow prasira uowima chekhai,CHAKRAMANG Thurai kowi owm mih chenchap dow prasira uowima chekhai.The Seed Company