Meng Lai119
Alef
1Chownglawng kowi ngak uowi dowi miuüa dow prasira uowima chekhai,CHAKRAMANG kowh ari aiang chün miuüa dow prasira uowima chekhai.2Now aia kowh laiklow chün miuüa dow prasira uowima chekhai;sak maiow hown aia naukrang iawng chang miuüa paw prasira uowima chekhai.3Amatni dow tawng angak paw chang dowi;amatni dow CHAKRAMANG tiama kowi chowtaih mang reng.4En tiama kowi anging namang kaneu kownkowen pe anging ana khai.5En kowh rirow iawng namangla kownkowang kowh sak mih anikma uowi dit panü!6Naiawng e dow en kowh ana pek maten ang nowng chün diah,now ang naka rukrai kown nadowi tham diah.7En kowh anowmma mih rirow tasang hanowachinawmma mih sak hown ang natek en awmrawm lai kown.8En kowh ari aiang iawng ang namang kown,en mih hauang nuata ang diah. Bet9Klanguüa dow tawng iawng chow aia kowh chownglawng achinawmma nowng tow kown?Aia dow en kowh laiklow chün mih hownia chowtaih nowng tow kown.10Ang kowh sak maiow hown ang krawi cham en khai,en kowh ana pek hownia alakma hauang pe uowi ang diah.11Kingküala en mih angak ang nachang dowi kownkowen kowh laiklow mih sak kowi ang krümta hüah khowk.12Aw CHAKRAMANG, ang kiow en,en kowh rirow tüngsang ang reng diah.13En pe anging mih rirow maten dow naphuangah kown;naiawngün dow ang nawr hown ang naphuangah reng kown.14Ahuma ka dawngthawnguan mih lak-een kowh laiklow kowi ang sak lang piaw khai.15En ana pek lawnguan kowi ang natuak reng kown,now en tiama kowi namang kown mih ang nape ching reng kown.16En kowh rirow kowi ang sak piaw reng,en kowh laiklow ang natamata kown nadowi. Gimel17Ang naia singla kownkow hai en kowh laiklow naia chünla kownkowen kowh nar kowi peah iungra diah.18En kowh ari aiang kowi awdara lawnguan ang nakhila kownkowang kowh mik mih en uang thowi ang diah.19Ang dow lusa kowi khari kowi mih iawng krowngchow taih,en kowh ana pek mih ang hownia hangkow petah diah.20En kowh rirow natuk kown mih lainowmma ang sakkrai.Nami dow ang kowh sak mih atungma hing nauta hüah chekhai.21Chang bawri miuüa kowi dow en nangah reng;en kowh ana pek chün dowi miuüa dow pacham ka piati lah.22Amatni pe ang rukrai kown mih hai prawngren ang kown mih hownia alakma tow ang diah.Tawngplawng kowchow panow ang dow en kowh laiklow chün reng chekhai.23Pren kruitown miuüa dow tapu hanow kingküa ang büah khai.Tawkche en nar ang dow en rirow lawnguan atungma tuak reng chekhai.24Ang dow en kowh laiklow kowi ang sak piaw reng,nami laiklow dow pe ang prengia iung reng chekhai. Dalet25Ang dow dinchow dawng kowi taiüa khai,en kowh laikham iawng plan pe ang kür sar diah.26Ang kowh akrat pusa ang uang phowk en hanow en klang ang khai,kawmat dow en kowh rirow uang tüngsang ang diah.27En kowh tiama ang natukla kownkow uang khowng ang diah,nahanow en kowh awdara lup lawnguan ang natuak kown towbowt.28Tuak kawm tuak krat hown ang sak kawm mih nowm khowk,en takhamta mih iawng pe ang kür diah.29Kuanlama mih saktuak ang hownia henta ang diah,en kowh saksing sanara hown en kowh ari aiang tüngsang ang diah.30Kaah sakowmma tiama kowi nauowi kown mih ang khowmta khowk,en kowh rirow iawng nauowi kown mih ang tatuak khowk chekhai.31En kowh laiklow ang dowkta chen khowk,Aw CHAKRAMANG, hauang pe ka ang rukrai diah.32En kowh ana pek dow süngürma hown ang nachün kown.Tawngplawng kowchow panow en dow pe ang tukra khai. He33Aw CHAKRAMANG, en kowh ari aiang tüngsang ang diah.Nami dow ang sing uowi mowr ang nachün kown.34En kowh ari aiang iawng ang naia mangla kownkow pe ang tukra diah,now nami dow ang kowh sak maiow hown ang nachünla kownkow pe ang tukra diah.35Ang dow en kowh ana pek kowi ang sak piaw reng.Naiawng rakowi en kowh ana pek iawng mang kownkow krui ang diah.36Angak hown kureng kown mih tuak lak-een kowh laiklow nachün kown mih sakkraira phai pe ang diah.37Asung uowi dowi mih uanh hownia plengta ang mik diah,en tiama kowi namangla kownkow pe ang kür sar diah.38Ringkaw en miuüa tut-e kowh en takhamta mih iawngmami en kowh nar tut-e uang pe tachiah diah,39Ang kramah mih rukraira dow henta ang diah;en kowh rirow dow aiungma chekhai nowm!40En kowh ari aiang nachün kown mih lainowmma ang süngür khai,en dow achinawmma chedow pe ang kür sar diah. Vau41Aw CHAKRAMANG, en kowh achur uowi dowi mih sakraura tüng ang diah,en takhamta mih iawng dow uang lawng ang diah.42Nahanow khare ang miuüa kowi ang naia klangah kown towbowt.Tawngplawng kowchow panow ang dow en laiklow kowi neplawng nesak mih chekhai.43En kowh anowmma mih laiklow ang nawr hownia hauang rupta ang diah.Tawngplawng kowchow panow ang dow en kowh rirow kowi owmsak mih chekhai.44Ang dow atungma en kowh ari aiang nachün reng kown.Nami dow chowngchowng saksakma ang nachün reng kown.45Ang dow en kowh tiama prakowi pe ching reng chekhai.Naiawng rakowi athaulangma hown ang nauowi reng kown.46En tekah mih laiklow maten manguüa pur kowi ang natek kown,mapaw ang narukrai kown nadowi.47En kowh ana pek kowi ang sak piaw reng.Tawngplawng kowchow panow nami kowi ang sakrau chekhai.48En kowh ana pek nachün kown mih lainowmma ang süngür khai.Tawngplawng kowchow panow naiawngün kowi ang sakrau chekhai.En kowh rirow lawnguan dow abüpma ang tuakah reng chekhai. Zain49En nar tut-e kowh en takhamta mih sam tuakah madiah,ang kowh sakowmra dow nami takhamta mih lai kowi chekhai.50En kowh laikham hownia dow ang ka singra reng chekhai.Naiawng rakowi akrat pusa hown ang uowi chepaw ang ka sakkhawtra reng.51Chang bawri miuüa dow khare nichak ang reng.Nachenganchepaw en kowh ari aiang hownia ditchow khowm ang süt dowi chekhai.52Aw CHAKRAMANG, achük alai kowh rirow ang ka tuak reng,now nami rirow dow pe ang sakklamra reng chekhai.53Maru ngakuüa chang lup ngak mih ang khi hanow lainowmma ang kunmarau khai.Tawngplawng kowchow panow amatni dow en kowh ari aiang mih nuata büah khai.54En kowh rirow lawnguan kowi ang tek meng reng chekhai;nami meng dow mami lusa kowi kawmat mowr ang tek reng chekhai.55Aw CHAKRAMANG, uar-e khe en lawnguan kowi ang tuak reng.Naiawng rakowi en kowh ari aiang mih ang chün reng chekhai.56Ang chownglawng kowi ang ka prasira khai;nami dow en kowh laiklow ang chün mih chekhai. Het57Aw CHAKRAMANG, en dow ang kowh dawngthawnguan chekhai,en laiklow ang nachün reng kownkow ang takham khowk.58Saksing sana ang kownkow sak maiow hown ang uang lü khai,en kowh laikham iawng en mih uang saksing sana ang diah.59En kowh tiama kowi ang mang mih krang ang tatuak khai,now en kowh laiklow nachün kown mih ang takham khai.60En kowh ana pek nachün kownkow alenma ang tarowng khai,mapaw ang awi-ai dowi chekhai.61Maru ngakuüa kowh leng kowi ang cham tasowk khai.Nachenganchepaw en kowh ari aiang mih ang tamata dowi chekhai.62En kowh rirow dow achinawmma chekhai.Naiawng rakowi nakiow en kownkow uar dawng khe ang rü reng.63Ang dow ringkawma hown kram en miuüa maten kowh auiua chekhai,ang dow en kowh tiama kowi mang miuüa maten kowh auiua chekhai.64En kowh achur uowi dowi mih sakraura dow lusa kowi atekma chekhai,aw CHAKRAMANG, en kowh rirow tüngsang ang diah. Tet65Aw CHAKRAMANG, iungra ahuma en pe ang khai,en kowh laikham iawng mami nar kowi en peah iungra khai.66Aiung angak tukra hai chanlaira nauowila kownkow tüngsang ang diah.Tawngplawng kowchow panow en kowh ana pek kowi ang neplawng nesak reng chekhai.67En rip ang dowi rawn dow tiama tawi kowi ang cham mang khai.Nachenganchepaw kawmat dow en laiklow ang chün reng chekhai.68En dow aiungma chekhai, now chang lup iung reng chekhai,en kowh rirow tüngsang ang reng diah.69Bawrima miuüa dow ang lawnguan kowi krawi küa dai khai.Nachenganchepaw ang dow sak maiow hown en kowh rirow chün reng.70Amatni kowh sak dow aiung angak tuk dowi chekhai.Nachenganchepaw ang dow en kowh ari aiang kowi ang sak piaw reng.71Ang ka ripra mih ang vüi lainowmma iung chekhai.Tawngplawng kowchow panow nami hownia en kowh rirow ang ka tasang khai.72En kowh ari aiang dow ang tut-e lainowmma asung uowi.Nami dow kuh hai tai athawng aiawng mih lak-e asung uowi chekhai. Iawd73En kowh rut hown en thawp ang hanow en tawng ang khai;en kowh ana pek ang natukla bowk kownkow pe ang tukra diah.74Ringkawma hown kram en miuüa dow khi ang hanow napiaw kown.Tawngplawng kowchow panow ang dow en kowh laikham kowi neplawng nesak mih chekhai.75Aw CHAKRAMANG, en kowh tara chet dow achinawmma pami ang tuk,en dow kaah sakowmma mih chekhai rakowi en rip ang mih chekhai.76Mami en kowh nar tut-e en takhamta mih iawngen kowh achur uowi dowi mih sakraura hown ang pacham ka sakklamra lah.77Ang naia singla kownkow en mih uang saksing sana ang diah.Tawngplawng kowchow panow ang dow en kowh ari aiang kowi ang sak piaw khai.78Bawrima hai dai lai hown piak ang kown nau miuüa dow pacham ka rukrai lah.Nachenganchepaw ang dow en kowh tiama lawnguan abüpma natuakah kown.79Ringkawma hown kram en miuüa dow ang tut-e pauang lah,nahanow en kowh laiklow natawi tuk büah kown.80En kowh rirow chün kowi ang kowh aser auowk hang pauowi lah,nahanow ang narukrai kown nadowi bowt. Kaf81En nauang takhula ang kown mih kowi chawng kangowh ang kowh kür khowk khai bowt.Nachenganchepaw en kowh laiklow kowi ang owmsak reng chekhai.82En kowh laikham nauang tachih kown mih hawt tang mü kangowh ang kowh mik ri khai bowt,tawng khe chow en nape ang sakklamra kown?83Towla grep tui mih im maikhük hown piak mih iawng ang piak khai bowt.Nachenganchepaw en kowh rirow ang tamata dowi chekhai.84Mün ni tak chow ang achawng natakla tak kown?Chang ang nowng miuüa kowi tawng khe chiang chow en nachet pe tara kown?85Bawrima miuüa dow ang dowla müa thai kuam khai,amatni dow en kowh ari aiang chün dowi chekhai.86En kowh ana pek maten dow sakowmra uowima kangowh chekhai.Dai lai hown maru chang ang anowng apowng khai.Naiawng rakowi sakrauma hown uang khowng ang diah.87Amatni dow kowngta ang kown chowbowt diah.Nachenganchepaw en kowh tiama mih ang nuata dowi chekhai.88En kowh achur uowi dowi mih sakraura hown pe ang singra diah;nahanow en nawr hown kowh laiklow ang nachün kown towbowt. Lamed89Aw CHAKRAMANG, en kowh laiklow dow anikma chekhai.Nami dow mukuang tama dowi mowr nauowi reng kown.90En kowh kaah sakowm mih rah dow chowngchowng saksakma uowi reng,en thawpah mih lusa dow anikma uowi reng chekhai.91En kowh ana pek rakowi lowra sia kawmat mowr paw anikma reng tak chekhai.Tawngplawng kowchow panow naiawngün dow en low kowi kowh uowi mih chekhai.92En kowh ari aiang kowi ang kowh sak piaw reng chekhai;naiawng nadowi e dow akrat pusara hown ang napiak prang bowt.93En kowh rirow dow katpaw ang natamata kown nadowi.Tawngplawng kowchow panow en pe ang singra mih dow nami hown chekhai.94Ang dow en kowh chowtaih; naiawng rakowi uang takhula ang diah.Tawngplawng kowchow panow ang dow en tiama prakowi pe ching reng chekhai.95Maru ngakuüa dow napiakta ang kownkow pawm ang khai.Nachenganchepaw en kowh laiklow mih abüpma ang tuak reng chekhai.96Tawng chap paw achinawmma mih uowi dowi chekhai;tawkche en kowh ari aiang dow lowra prakowi achinawmma chekhai. Mem97En kowh ari aiang kowi lainowmma ang sakrau khai.Nami dow ni chut chi abüpma ang tuakah reng chekhai.98En kowh ana pek maten dow ang ransu-uüa kowi lak-e chanlaima chang ang khai.Tawngplawng kowchow panow nami dow ang hown atungma hing uowi hüah chekhai.99Ang kowh tüngsang miuüa maten lak-e ang lang chanlai chekhai.Tawngplawng kowchow panow ang dow en kowh laiklow abüpma ang tuak reng chekhai.100Lawngtanguüa lak-e paw ang lang tuk chekhai.Tawngplawng kowchow panow ang dow en tiama kowi mang reng chekhai.101Ang dow en kowh laiklow naia chünla reng kownkowtiama ngak maten hownia ang kowh khawk mih ang lang sütta reng chekhai.102Ang kowi dow en matia ngengche tüngsang ang khai.Naiawng rakowi en kowh rirow hownia ang süt dowi chekhai.103En kowh laikham maten dow ang dai kowi lainowmma ding khai.Nami dow ang nawr kowi kuai tui lak-e khowm lang ding chekhai.104En kowh tiama hownia dow aiung angak tukra ang ka reng.Naiawng rakowi anowm nadowi mih tiama maten ang sui chekhai. Nun105En kowh laiklow dow ang kowh tiama tüng mih maibu chekhai.Nami dow ang mangra tiama kowi kowh anowi pek mih chekhai.106En kowh rirow achinawmma mih nachün kown ang takham khowk,now nami laikham dow akhawtma ang takhamta mih chowbowt.107Aw CHAKRAMANG, lainowmma ang kham ngare khai.Naiawng rakowi en kowh laikham iawng pe ang singra diah.108Aw CHAKRAMANG, ang sak nau hown ang kiow en khai.Nami dow en vüi ang uang pawla mih uanap chekhai.Naiawng rakowi nami dow hawt paw ang diah,now en kowh rirow tüngsang ang diah.109Masing makowng nimkrüa kowi atungma ang uowi khai.Nachenganchepaw en kowh ari aiang mih ang tamata dowi chekhai.110Maru ngakuüa dow ang vüi chak ang leng khai.Nachenganchepaw en kowh tiama hownia ang süt dowi chekhai.111En kowh laiklow dow chowngchowng saksakma vüi ang kowh dawngthawnguan chekhai.Tawngplawng kowchow panow nami dow ang sak kowi kowh awmrawmra chekhai.112En kowh rirow atungma nachün kown mih ang tatuak khowk.Nami dow ang kowng dowi mowr ang nachünah reng kown. Samek113Saktuak pre chaing miuüa kowi ang sui chekhai.Nachenganchepaw en kowh ari aiang kowi dow ang sakrau reng.114Ang kowh tatung tanimra hai kawngma dow en chowtaih,ang owmsak reng mih dow en kowh laiklow kowi chowtaih.115Enni chang lup ngak miuüa low, ang hownia lang powt büa diah,nahanow ang kowh Thurai kowh ana pek ang naia chün kown towbowt.116Aw CHAKRAMANG, en kowh laikham iawng dowk ang reng diah,nahanow ang nasing reng kown towbowt.En luk kowi ang sakowm mih lawnguan kowi hauang pe ka ang rukrai diah.117Dowkta ang hüah diah; nahanow ang naplai kown towbowt,now en kowh rirow atungma ang nachün kown towbowt.118En rirow hownia alakma süt miuüa kowi dow en nuata khai.Tawngplawng kowchow panow amatni dow amatni lala takuan mih chekhai.119Lusa kowi kowh maru ngakuüa maten kowi dow mawngchawng iawng en henah reng.Naiawng rakowi en kowh laiklow maten ang chün reng chekhai.120Ang kram en rakowi ang chür reng chekhai,en kowh tara chet dow ringkawma hown ang kram reng chekhai. Aiien121Ang dow chang lup iung reng, now chet tara nowm reng chekhai;chang ang nowng miuüa rut kowi hauang ap ang diah.122En kowh nar naiungla kown mih kurdik en paw diah,bawrima miuüa hangkow pacham ka chang ang anowng lah.123En kowh laikham nauang tachih kown mih kowi chawng kangowh ang kowh mik ri khai bowt,en uang lawng ang kown mih kowi hawt chawng kangowh ang kowh mik rau khai bowt.124Mami en kowh nar kowi en kowh achur uowi dowi mih sakraura hown khetah diah,now en kowh rirow mih uang tüng uang sang ang reng diah.125Ang dow en kowh nar chekhai,en kowh laiklow natuktala kownkow pe ang tukra diah.126Aw CHAKRAMANG, kawmat mih en nachang lup kown mih khin chowbowt.Tawngplawng kowchow panow maru kawmuüa mih en kowh ari aiang chün dowi chekhai.127Ang dow en kowh ana pek maten kowi ang sakrau reng.Nami dow achangma mih kuh kowi lak-e khowm ang lang sakrau chekhai.128Naiawng rakowi en kowh ari aiang maten ang chün reng,now anowm nadowi mih tiama maten dow ang sui reng chekhai. Pe129En kowh laiklow dow lainowmma iung.Naiawng rakowi nami dow ang chün reng chekhai.130En kowh laiklow dow maru ta hanow ka anowi reng.Nami dow saktuak prawngma miuüa kowi peah tukra reng chekhai.131En kowh ana pek ka kown mih lainowmma ang prüa khai,ang prüa lai bowt kowh ang hawt chawng hüah towbowt.132En ming kowi kowh sakrau miuüa kowi en saksing sanaah reng iawng,ang prakowi uang dang diah, now saksing sana ang diah.133En kowh laiklow iawng anowmma mih tiama kowi naia mangla kownkowang kowh khawk anikma chang ang diah;nahanow ang luk kowi dow tawng iawng mih angak chap paw nauang kla kown nadowi bowt.134En tiama kowi ang nanowng mangla reng kownkowmaru nowng changra rut hownia uang lawng ang diah.135En kowh sanara mih anowi iawng en nar luk kowi pauang kla lah,en kowh rirow maten uang tüng uang sang ang diah.136Ang kowh mik tui mih hawr dawilawi towbowt.Tawngplawng kowchow panow en kowh ari aiang dow maru chün dowi chekhai. Sadhe137Aw CHAKRAMANG, en dow achinawmma,now en kowh tara chet paw anowmma chekhai.138En kowh laiklow dow achinawmma chekhai.Nami dow kaah sakowmma chekhai.139Ang kowh ransu-uüa dow en kowh laiklow tamata khai.Naiawng rakowi en kowh ringkawra natown en kown mih lainowmma ang süngür khai.140En kowh laikham dow tachi reng pami kaah amat khai bowt,nami laikham ang sakrau mih dow naiawng rakowi chekhai.141Ang dow tawngpaw nadowi, maru kaah anü aklowk dowi mih chekhai.Nachenganchepaw en kowh tiama mih ang tamata dowi.142En dow chowngchowng saksakma achinawmma,now en kowh ari aiang maten dow anowmma chekhai.143Akrat pusara mih ang luk kowi uang ting khai.Nachenganchepaw en kowh ana pek kowi ang sak piaw reng.144En kowh laiklow maten dow chowngchowng saksakma anowmma chekhai,ang naia singla reng kownkow nami ari aiang natukla kown mih kür pe ang diah. Kaf145Ang kowh sak maiow hown ang haw en khai.Aw CHAKRAMANG, uang klang ang diah,nahanow en kowh rirow maten ang nachün kown towbowt.146En kowi chowtaih ang haw en khai, uang lawng ang diah;nahanow en kowh laiklow ang nachün kown towbowt.147Uarthowi dowi rawn ang rü hanow naka khowng kownkow ang uang kar reng,ang dow en kowh laikham luk kowi owmsak reng chekhai.148En kowh laikham maten abüpma ang natuakah kownkowuar kowi dowi rawn ang thowr müi reng chekhai.149En kowh achur uowi dowi mih sakraura hown ang kowh laiklow sünta diah,aw CHAKRAMANG, en kowh ari aiang kowi uowi iawng pe ang singra diah.150Chang ang nowng mih maru ngakuüa dow uang tarü khowk,amatni dow en kowh ari aiang hownia alakma chekhai.151Aw CHAKRAMANG, en dow ang hown atawnchow taih chekhai,now en kowh ana pek maten dow anowmma kangowh chekhai.152En kowh laiklow dow chowngchowng saksakma nauowi reng kown.Nami dow achük alai hownia en kowh ari aiang sangra hown ang tuk khowk chekhai. Res153Ang kowh akrat pusara sam mü madiah, now uang takhula ang diah.Tawngplawng kowchow panow en kowh ari aiang ang tamata dowi chekhai.154Uang tangila ang hanow ang kowh angak uowi dowi mih uang tüng diah,now en kowh laikham iawng uang pe ang singra diah.155Maru ngakuüa dow naka lawngra kown mih alakma chekhai.Tawngplawng kowchow panow amatni dow en rirow prakowi pe ching dowi chekhai.156Aw CHAKRAMANG, en kowh sanara dow lainowmma hu chekhai,en kowh ari aiang kowi uowi iawng pe ang singra diah.157Ang ransu-uüa hai chang nowng miuüa dow lainowmma kawm khai.Nachenganchepaw en kowh laiklow hownia ang süt dowi chekhai.158Kuanlama miuüa kowi khi now lainowmma ang sui lawt.Tawngplawng kowchow panow amatni dow en kowh ari aiang iawng mang dowi chekhai.159Aw CHAKRAMANG, en tiama kowi mün khowt chow ang sakrau mih sam mü madiah,now en kowh achur uowi dowi mih sakraura hown pe ang kür sar diah.160En kowh laiklow maten dow anowmma kangowh chekhai,en kowh anowmma mih rirow maten dow chowngchowng saksakma anikma chekhai. Sin161Pren kruitown miuüa dow aiawnglowma chang ang nowng khai.Nachenganchepaw ang kowh sak mih en kowh laiklow kowi ringkawma hown kram reng chekhai.162Cham dowk tasen khe kala uanh now lainowmma maru awmrawm reng chekhai,nami powm iawng dow en kowh laikham kowi ang sak piaw reng chekhai.163Dai lai kowi ang sui reng; nami dow suiiai kaniaima ang tuakah khai.Nachenganchepaw en kowh ari aiang kowi dow ang sakrau reng.164Pani kowi ranit kat chi ang kiow en khai.Tawngplawng kowchow panow en kowh rirow dow achinawmma chekhai.165En kowh ari aiang kowi sakrau miuüa dow ka thaulangra reng,amatni kowi dow tawng chap paw nowng chüah dowi chekhai.166Aw CHAKRAMANG, en nauang lawng ang kown mih kowi sakowmma ang uowi khai,now en kowh ana pek maten ang chün reng chekhai.167En kowh ari aiang maten ang chün reng.Tawngplawng kowchow panow nami dow lainowmma ang sakrau chekhai.168Ang dow en tiama kowi mang reng hai en laiklow maten ang chün reng.Tawngplawng kowchow panow ang changah mih maten en khi bowk chekhai. Tav169Aw CHAKRAMANG, ang kowh kar klow hawt sünta ang diah,en kowh laiklow kowi uowi iawng pe ang tukra diah.170Ang awr lü awr leng mih maten hawt sünta ang diah,en kowh laikham kowi uowi iawng uang lawng ang diah.171Ang kowh ve hownia en kowh rowsi lai pacham ue reng lah.Tawngplawng kowchow panow en kowh rirow tüngsang ang mih dow en chowtaih.172Ang kowh nawr dow en kowh laikham hown pacham tek meng lah.Tawngplawng kowchow panow en kowh ana pek maten dow anowmma chekhai.173En kowh rut mih nakhowng ang kownkow kamrütma pacham uowi lah.Tawngplawng kowchow panow en tiama kowi namang kown mih ang kamrüt khowk.174Aw CHAKRAMANG, en nalawng ang kown mih kowi süngürma ang chawng khai,en kowh ari aiang kowi ang sak piaw reng chekhai.175Ang naia kiow en reng kownkow pe sing ang reng diah,now en kowh rirow mih pacham khowng ang reng lah.176Tama mih ruapur iawng dow tiama tawi kowi ang cham mang khai bowt;en kowh nar kowi uang krawi chamah diah,en kowh ana pek mih ang tamata dowi chekhai.The Seed Company