Meng Lai118
1CHAKRAMANG kowi tek pe awmrawm lai diah.Tawngplawng kowchow panow aia dow aiungma chekhai,aia kowh achur uowi dowi mih sakraura dow chowngchowng saksakma anikma chekhai.2Israeluüa dow maiawng hek se pacham tek büah lah:“Aia kowh achur uowi dowi mih sakraura dow chowngchowng saksakma anikma chekhai,” pakhai.3Arawn krungchakuüa dow maiawng pacham tek büah lah:“Aia kowh achur uowi dowi mih sakraura dow chowngchowng saksakma anikma chekhai,” pakhai.4CHAKRAMANG kowi ringkaw miuüa paw maiawng pacham tek büah lah:“Aia kowh achur uowi dowi mih sakraura dow chowngchowng saksakma anikma chekhai,” pakhai.5Ang kla phih khe CHAKRAMANG kowi ang hawah khai,now aia dow uang klang ang hanow uang lawt ang khai.6CHAKRAMANG dow tawi tangila ang reng rakowi ang nakram kown nadowi;tawng chow lusa maru nowng chang ang kown?7Ang kowh akhowng mih CHAKRAMANG dow tawi tangila ang reng.Naiawng rakowi ang kowh ransu-uüa sum mih dow ang nakhi kown.8Lusa maru luk kowi neplawng nesak mih lak-eCHAKRAMANG luk kowi neplawng nesak mih lang iung chekhai.9Maru iukuüa luk kowi neplawng nesak mih lak-eCHAKRAMANG luk kowi neplawng nesak mih lang iung chekhai.10Chenchapuüa maten dow umta ang lut khai.Nachenganchepaw CHAKRAMANG kür hown amatni kowi ang nowngta khai.11Chenchapuüa maten dow umta ang lut khai nowm.Tawkche amatni kowi dow CHAKRAMANG kür hown ang nowngta khai.12Amatni dow kuai hawmh iawng umta ang lut khai,amatni dow chuh mung maih kam alenma mih iawng kingküa ang khai.Nachenganchepaw CHAKRAMANG kür hown amatni kowi ang nowngta khai.13Amatni dow ang pacham tim lah pakowh nawt ang büah khai.Nachenganchepaw CHAKRAMANG dow uang khowng ang khai.14Ang kowh kür hai ang kowh meng dow CHAKRAMANG chowtaih,ang kowh lawngra dow aia tut-e chowtaih.15Thurai maru-uüa uowi rah tangbung kowi dow ka lawngra mih piaw meng klow ta reng chekhai.Amatni dow tek mih, “CHAKRAMANG dow aia kowh kür hown kri kraingma mih lup chang reng chekhai.16Anging awng mih dow CHAKRAMANG kowh kür hown chekhai,CHAKRAMANG dow aia kowh kür hown kri kraingma mih lup chang reng chekhai,” pakhai.17Ang nakowng kown nadowi, ang nasing reng kown,now CHAKRAMANG changah mih lawnguan ang naphuang reng kown.18CHAKRAMANG dow akraingma rip ang khai.Tawkche kowng pat dow aia rip ang dowi chekhai.19CHAKRAMANG kim kowi kowkup hanow aia tut-e kowtek awmrawm lai kown ang nau.Naiawng rakowi CHAKRAMANG kowh kimbüng kowho ang diah.20Mami chowbowt lowmow CHAKRAMANG kowh kimplawt;achinawmma miuüa uang kup mih dow mami iawng chekhai.21Aw CHAKRAMANG, ang natek en awmrawm lai kown;tawngplawng kowchow panow en dow ang kowh laiklow sünta ang khai,now en dow pe ang lawngra khai.22Kim chang miuüa nuata mih hua dow pankrima uang chowng khai;nami dow lang pankri mih hua uang chowng khai.23Nami dow CHAKRAMANG changah mih chowtaih,nami dow a-i mik kowi awdara uowima chekhai.24Mami dow CHAKRAMANG thawpah mih ni chekhai;chu, mami ni kowi a-i awmrawm diah sik, now piaw diah sik.25Aw CHAKRAMANG, sakrauma hown uang lawng anging diah,aw CHAKRAMANG, sakrauma hown uang pe awng anging diah.26CHAKRAMANG ming hown uang mih maru dow akiow pauowi lah,CHAKRAMANG kim hownia anging pe en prasi khowk.27CHAKRAMANG chowtaih Thurai,pe a-i anowi reng mih dow aia chowtaih.Phuchua chang müa uang pawla tawncher büa diah,now nami dow phuchuara nang kowi uang klikah diah.28En chowtaih ang kowh Thurai, ang natek en awmrawm lai kown;en chowtaih ang kowh Thurai, ang nakiow en kown.29CHAKRAMANG kowi tek pe awmrawm lai diah.Tawngplawng kowchow panow aia dow aiungma chekhai,aia kowh achur uowi dowi mih sakraura dow chowngchowng saksakma anikma chekhai.
The Seed Company