Meng Lai106
1CHAKRAMANG kowi kiow büa diah,CHAKRAMANG kowi tek awmrawm lai büa diah.Tawngplawng kowchow panow aia dow aiungma chekhai,aia kowh achur uowi dowi mih sakraura dow chowngchowng saksakma anikma chekhai.2CHAKRAMANG kowh kri kraingra lup amia chow nowng tek?Aia kala kiowrira mih lup amia chow nowng tek?3Thurai kowh ana pek chün miuüa dow prasira uowima chekhai,now chang lup iung miuüa paw prasira uowima chekhai.4Aw CHAKRAMANG, en maru-uüa kowi en saksing sanaah mih khin khe hangkow tamata ang diah,amatni kowi en lawngah mih khin khe ang kowi paw khowngla ang diah.5Nahanow en lang kloah miuüa kowh iungra dow ang natawi khi kown towbowt,en chenchapuüa piaw mih khin khe ang paw natawi ka piaw kown towbowt,now en changla dawngthawnguan mih maru-uüa kiow en khe ang paw tawi ka kiow en kown towbowt.6Anging pipu-uüa iawng anging paw chang angak khai;anging chang lup ngak khai, now angakma anging chowm uowi khai.7Anging kowh pipu-uüa dow Aigupta pren kowi en kowh awdara lup khi khowk chepaw tuk büah dowi chekhai,en kowh achur uowi dowi mih sakraura laiklow paw sak kowi towah büah dowi chekhai.Amatni dow Sata Rik pang kowi kingküa en khai.8Nachenganchepaw aia kowh ming iung nang iung natownla kownkow amatni kowi aia lawngah khai,aia kowh kri kraingma mih kür tüng pe kownkow amatni kowi aia lawngah khai.9Aia kowh ana pek hown sata Rik dow uang kang khai,süngrüp süngkangma kowi mang khe kowh iawngabüpma mih sata iawng amatni kowi aia pawla khai.10Suiah miuüa hownia amatni kowi dow aia takhula khai,ransu-uüa rut hownia amatni kowi dow aia lawngah khai.11Amatni kowh ransu-uüa dow nami sata tui kowi tamir bowk khai,amatni dow lowk iachow paw nowngia plai büah dowi chekhai.12Nami kung kowi dow amatni mih CHAKRAMANG kowh laiklow owm büah khai bowt,now aia kiow müa meng tek büah khai bowt.13Nachenganchepaw amatni dow aia changah mih lup alenma tamata khai,aia nauang pe prengia iung kown mih kowi khowm nowng chawng büah dowi chekhai.14Amatni dow süngrüp süngkangma kowi chakkham sakkrai khai.Naiawng rakowi amatni dow Thurai kowi aplan plan chawk lai khai.15Amatni lü mih srui aia dow iu peah khai.Tawkche amatni kow kowi dow kramra uowi mih rawka paw aia uang chin pe khai.16Tangbung kowi amatni uowi mih khin khe amatni dow Mosi kowi irsiah büa khai,now CHAKRAMANG vüi kowi lang kloah mih uamow Arawn kowi paw irsiah büa khai.17Krawng dow awr talak phak hanow Dathan kowi iawnta khai,now Abiram kowh thumchakuüa kowi paw kowpta rap khai.18Amatni thumchakuüa pungmadawng kowi Thurai dow uang chin pe maih khai,nami maih dow maru ngakuüa kowi kamta bowk khai.19Israel krungchak aluchowuüa dow Sinai hungh kowi thawp chia chah rup lowk khai,now amatni dow nami sowah mih arup kowi chupiia büah khai.20Amatni dow kiowrira uowima mih Thurai kowi nuata khai,now cha pram mih chia rup kowi cham chupiia büah khai.21Amatni dow amatni kowh lawng miia Thurai kowi tamata büah khai,Aigupta pren kowi awdara uowima mih lup chang mih Thurai kowi tamata büa khai.22Ham pren kowi kowh aia changah mih awdara lup dow tamata büah khai,sata Rik pang kowi kowh aia changah mih kramra uowima mih lup maten paw tamata büah khai.23Naiawng rakowi Thurai dow amatni kowi napiakah kown pahai tek khai;nachenganchepaw aia lang kloah mih maru Mosi dow aia pur kowi hawt tahan khai.Nami dow amatni kowi piakah kown mih Thurai kowh kunmarau narimta pe kownkow chekhai.24Nami kung kowi amatni dow klangiungma mih Kanan pren kowi nakup kown nau dowi chekhai.Tawngplawng kowchow panow amatni dow CHAKRAMANG laiklow owm dowi chekhai.25Amatni dow tangbung lak kowi CHAKRAMANG kowi kingküala mih laiklow tek büah khai,CHAKRAMANG laiklow prakowi dow pe ching büah dowi chekhai.26Naiawng rakowi aia dow kunmarau kowh amatni kowisüngrüp süngkangma kowi nakowngta kown mih takham khai.27Nami klen kowi amatni krungchakuüa kowi mih akeng chenchapuüa pungmadawng kowi nape kowngah kown mih takham khai;pren towng nam towng kowi nauetah plawt kown mih paw aia dow takham khai.28Nami kung kowi Israeluüa dow Peor hungh kowi kowh Baal thurai kowi cham chupiia büah khai,now kowng miuüa vüi kowi kowh phuchuaah mih ngar paw cham tawi cha büah khai.29Naiawngün lup ngak hown amatni dow CHAKRAMANG kowi towkah kunmarau khai.Naiawng rakowi CHAKRAMANG dow amatni pungmadawng kowi uang chin pe makowng hawi khai.30Nakhowk khe uamow Pinehas dow awr rü hanow amatni kowi ripah khai;nahanow makowng hawi dow taing khai.31Naiawng chang rakowi Thurai dow Pinehas kowi achinawmma pahai dowkah khai,aia kowi dow chowngchowng saksakma achinawmma pahai dowkah khai.32Meriba tuikuam re-e amatni dow Thurai kowi towkah kunmarau khai,naiawng amatni chang rakowi Mosi dow tauowk khai.33Amatni dow Mosi kowi towkah kunmarau khai.Naiawng rakowi atek iung dowi mih laiklow pat aia tekta khai.34Amatni dow Thurai kowh ana pek chün dowi chekhai,Thurai pe piakah mih chenchapuüa kowi piakah büah dowi chekhai.35Naiawng nachang lak dow amatni dow kowbüah hown tawi taiua khai,now amatni chowm krang uowi krang iawng tawi uowi büah khai.36Israeluüa dow amatni kowh arup aren kowi cham tawi chupiia khai,naiawngün dow amatni vüi takhuowk müa leng iawng chekhai.37Amatni dow amatni kowh chapauüa kowi lümla ngakuüa vüi kowi changla phuchua khai,now amatni kowh chamauüa kowi paw lümla ngakuüa vüi kowi changla phuchua büa khai.38Amatni dow angak uowi dowi mih amatni kowh chauüa kowi saiah khai;amatni kowh chauüa kowi dow Kanan pren kowi kowh arup aren vüi changla phuchua müa khai.Nahanow Kanan pren dow naiawngün vi hown tasür talawk khai.39Amatni dow amatni kowh lup rakowi asür alawkma phaw büah khai,amatni dow arup aren kowi sakrau mih hown CHAKRAMANG kowi kuanah khai.40Naiawng rakowi CHAKRAMANG dow aia maru-uüa luk kowi kunmarau lün pluplup khai,aia changla dawngthawnguan mih aia kowh maru-uüa kowi dow aia suiah khai.41Amatni kowi dow akeng chenchapuüa rut kowi aia ap-ah khai,amatni kowi suiah miuüa dow amatni kowi kruitownah khai.42Amatni kowh ransu-uüa dow amatni kowi changah anowng apowng khai,now amatni dow ransu-uüa nimkrüa kowi uowi khai.43Amatni kowi dow Thurai mih plan plan lawngah khai.Nachenganchepaw amatni dow aia kowi kingküaah khai.Amatni kowh angak rakowi amatni dow piak khai.44Nachenganchepaw amatni awr kar mih khin khe aia sünta pe reng,now amatni krat pusara prakowi dow aia iu tang müah reng chekhai.45Amatni hown kowh aia tatowah mih sangbowk laitawm dow aia ka tuak khai,now aia kowh achur uowi dowi mih sakraura hown amatni kowi dow aia saksing sanaah khai.46Israeluüa kowi kowh khümla miuüa kowi dow Thurai leta pe saktuak khai;amatni kowi dow Israeluüa kowi saksing sanaah kown mih saktuak aia peah khai.47Aw CHAKRAMANG anging kowh Thurai, uang lawng anging diah,akeng chenchap hownia kua anging hanow arasang tow anging diah.Nahanow en ming chimsaima mih vüi kowi anging natek awmrawm lai kown,now apiawma hown anging natek en rowsi meng kown.48CHAKRAMANG Israeluüa kowh Thurai dow akiow pauowi lah,aia dow achük alai hownia chowngchowng saksakma akiow pauowi reng lah.Maru kawmuüa dow “Amen!” pahai pacham tek büah lah,CHAKRAMANG kowi kiow büa diah.
The Seed Company