Meng Lai105
1CHAKRAMANG tut-e tek awmrawm lai diah;aia kri kraing mih lawnguan phuang diah,now aia changah mih lup maten chen towng chap towng tut-e phuang büa diah.2Aia vüi kowi tek meng diah, aia kiow meng tek diah;aia changah mih awdara lup lawnguan maten krawi phuang büa diah.3Aia ming chimsaima mih kowi kiow büa diah;CHAKRAMANG kowi cham miuüa dow pacham piaw lah!4CHAKRAMANG kowi owmsak diah;aia kowh kür kowi owmsak diah,now atungma aia kowi cham diah.5Aw CHAKRAMANG kowh nar Abraham krungchakuüa,aia changah mih awdara lup tuakah reng diah.Aw Thurai kloah mih Jakawb krungchakuüa,aia kowh tara laiklow sak kowi towah reng diah.7CHAKRAMANG dow a-i kowh Thurai chekhai,aia kowh ana pek dow chen towng chap towng vüi chekhai.8Thurai kowh ana pek dow chowngchowng saksakma vüi chekhai,aia dow aia kowh sangbowk laitawm mih katpaw natamata kown nadowi.9Nami sangbowk laitawm dow Abraham hown kowh aia tatowah mih chekhai,Isak tut-e kowh aia khamah mih sangbowk laitawm paw nami chekhai.10CHAKRAMANG dow Jakawb hown tatow sangbowk laitawm khai,nami sangbowk laitawm dow Israeluüa tut-e chowngchowng saksakma vüi chekhai.11Aia tek mih, “Ang nape en Kanan pren kown.Nami dow en kowh dawngthawnguan naown kown,” pakhai.12Nami khin khe a-i kowh pipu-uüa dow maru iun a-echow chekhai.Nakhowk khe amatni dow Kanan pren kowi prenlang maru chowreng tak.13Amatni dow pachen süng hownia akeng mih chen süng kowi cham lenla pang khai,papren hownia akeng mih pren kowi cham mangla pang khai.14Nachenganchepaw amatni luk kowi dow mia iawng mih kowi paw aia pe changah nowng dowi;amatni kowi nalawngah kownkow manguüa kowi Thurai hangah reng chekhai.15Aia tek pe mih, “Ang lang kloah mih maru-uüa kowi enni naia kak kown nadowi,ang kowh risiuüa kowi paw enni naia piak kown nadowi,” pakhai.16Nami kung kowi aia dow amatni pren kowi uang pawla pe khown khai;nahanow amatni dow khawr chakkham khai.17Tawkche aia dow atainau-uüa dowi rawn Aigupta pren kowi Josef kowi kowchinah khai;Josef kowi dow atainau-uüa mih nar iawng hai sumah khai.18Aia kowh khawk kowi dow lawngha leng hown tawmah büah khai,now aia ngawng kowi dow lawngha leng kuar krua pe büah khai.19CHAKRAMANG dow Josef lawnguan aia tekah mih laiklow uang tachi dowi mowr,aia dow Josef kowh chowm krang uowi krang chaingah khai.20Aigupta pren mang kowh ana pek hown Josef kowi tawmla mih lawngha leng dow latta pe khai,now pren kruitown mih dow thawngrum hownia aia kowi lawtta khai.21Mang dow Josef kowi mang kim mingkhet mih towah khai,now mang kowh dawngthawnguan mingkhet mih aia towah khai,22tawngplawng kowchow panow Josef nau iawng maru iukuüa kowi naia kruitownla kownkow chekhai,now lawngtang aluchowuüa kowi paw aia naia pela prengia kownkow chekhai.23Nami kung kowi dow Israel mih Aigupta pren kowi kowkowi khai,Jakawb dow Ham pren kowi prenlang maru iawng kowuowi sangrum khai.24CHAKRAMANG dow aia maru-uüa kowi akawmma changah khai,now ransu-uüa lak-e amatni kowi dow akürma aia changah khai.25Aia dow aia maru-uüa kowi suiah kown mih saktuak ransu-uüa kowi chang pe khai;nahanow ransu-uüa dow aia kowh maru-uüa kowi kuanah khai.26CHAKRAMANG dow aia maru-uüa kowi nalawngah kownkow Mosi kowi Aigupta pren kowi uang chinah khai,now aia lang kloah mih Arawn kowi paw aia uang chinah khai.27Amatchi dow Aigupta pren kowi CHAKRAMANG kowh amatra lup maiow tüng iüah khai,Ham prenchakuüa pungmadawng kowi aia kowh awdara lup maiow tüng iüah khai.28CHAKRAMANG dow Aigupta pren kowi uang chin pe aiiu khai;amatni dow aia kowh laiklow sünta kown nau dowi chekhai.29Aia dow Aigupta pren kowi kowh tui maten vi kangowh changta pe khai;nahanow nakowi kowh dam maten dow kowng bowk khai.30Amatni pren kowi dow pur kawm chetla prung khai,naiawngün pur dow mang kim kowi pat kowkrawi kup khai.31Aia pe ana hanow ving kawm dow uang ting khai,now pren kowi dow changpauma kangowh chekhai.32Amatni luk kowi dow uang takcha kowi ria aia uang pe klaah khai,now paprenma kowi dow pla nowi pluplup khai.33Amatni kowh grep ruih hai uidut singh dow aia piakta pe khai,now pren kowi kowh singh kau maten paw aia uang piakta pe khai.34Aia pe ana hanow plawng hawmh dow akawmma uang khai,now tuiselengkeng nammow paw nowngia rüaah dowi mowr uang khai.35Naiawngün dow pren kowi kowh singh kau maten krawi kremta bowk khai,now üa hai laih kowi kowh luprak maten paw krawi kremta bowk khai.36Nami kung kowi dow Aigupta prenchakuüa kowh chapa ta maten aia kowngta pe bowk khai,aia dow pren kowi kowh kachakuüa chah ta maten saita pe bowk khai.37Aia dow Israeluüa kowi mih kuh hai tai hailawm nami pren hownia uang lawtla khai;amatni krungchakuüa pungmadawng kowi amiapaw kür uowi dowi kowh tawi ia mang dowi mih uowi dowi chekhai.38Israeluüa powt mih khi hanow Aiguptauüa dow lainowmma awmrawm khai.Tawngplawng kowchow panow amatni dow Israeluüa kowi kram khai.39Aia dow Israeluüa kowi natungah kownkow uang phat pe uangnim khai,now iak-e khe dow napeah nowi kownkow uang peah maih khai.40Israeluüa lü chakkham khe aia uang chin pe uamuk khai,mukuang hownia kowh kawmpah hown amatni kowh sakkraira dow aia rim pe khai.41Aia dow huaklu pe talakah phak hanow tui uang pe lawt khai;süngrüp süngkangma kowi nami tui dow aw tui iawng hawr dawilawi khai.42Tawngplawng kowchow panow aia dow aia kowh chimsaima mih laikham ka tuak khai,aia nar Abraham tut-e kowh aia takhamta mih laiklow dow aia ka tuak khai.43Thurai dow aia lang kloah mih maru-uüa kowi Aigupta pren hownia uang lawtla khai,amatni kowi dow apiaw apama hown tekla meng se aia uang lawtla khai.44Akeng chenchapuüa kowh pren dow Israeluüa kowi aia peah khai,now akeng chenchapuüa kawmah mih luprak dow aia maru-uüa kowi aia peah khai.45Naiawng aia changah mih dow aia kowh ari arow nachün büah kownkow chekhai,now aia kowh ari aiang paw nachün büah kownkow chekhai.CHAKRAMANG kowi kiow büa diah.
The Seed Company